Hivap Wanples Wetem Olgeta We Oli Fraetgud Long God

“OL MAN long olgeta ples oli wantem kam fri from fasin fraet​—fraet long raf fasin, fraet blong no faenem wok, mo fraet long ol bigfala sik. Yumi gat sem tingting ya tu. . . . ?From wanem yumi tokbaot olsem wanem blong wokem fasin fraet? Brata we i givim bigfala tok long wanwan Distrik Asembli “Fraetgud Long God” we i stat long Jun 1994, i askem kwestin ya we i pulum intres.

Plante milyan man we oli kam long asembli ya​—fastaem long Not Amerika, afta long Yurop, Sentrol Amerika, Afrika, Esia, mo ol Aelan long solwora​—oli wantem lanem olsem wanem blong wokem fasin fraet olsem. ?From wanem? From we, blong kasem ol blesing we Jeova i gat blong ol man blong hem, hem i dipen long fasin blong yumi, blong fraetgud long God. Ol man we oli kam long asembli ya oli wantem lanem olsem wanem blong gat fasin fraetgud long God, mo long ol program blong tri dei ya, oli lanem plante samting long saed blong Kristin fasin ya we i impoten tumas.

‘Fraetgud Long God Mo Folem Ol Loa Blong Hem’

Hemia nao stampa tok blong faswan dei blong asembli, we i stanap long Eklesiastis 12:13. ?I minim wanem blong fraetgud long God? Long faswan haf blong program, jeaman blong asembli i eksplenem se fasin fraetgud long God i soem fasin blong tinghae mo gat wan dip fasin ona long Jeova mo tu fasin blong no wantem nating blong mekem Hem i harem nogud. Fasin fraetgud long God olsem i no wan samting we i mekem yumi harem nogud; hem i stretgud mo mekem man i haremgud long laef.

?Olsem wanem gudfala fasin ya we yumi fraetgud long God i save givhan long yumi? Tok we i kam biaen, “Yu No Mas Kam Taed Mo Lego,” i eksplenem se fasin fraetgud long God bambae i pusum yumi blong folem ol loa blong God wetem fasin glad. Taem fasin fraet olsem i joen long lav blong God mo ol man raonabaot long yumi, bambae hem i givim paoa long saed blong speret, long yumi. Yes, fasin fraetgud long God i save halpem yumi blong no kam slak long resis blong go kasem laef we i no save finis.

Nekis samting long program, hemia ol laef store we oli talemaot, blong soem ol pruf se fasin fraetgud long God i save mekem yumi stanap strong. Olgeta we oli askem kwestin long olgeta, oli talemaot olsem wanem fasin fraetgud long God wetem ona, i givim paoa long olgeta blong gohed long minista wok, nating se ol man oli no intres, oli no agri, no oli agens long olgeta. Mo tu hem i halpem olgeta blong stanap strong taem oli fesem ol traem long laef blong olgeta wanwan.

?From wanem sam man oli fraetgud long God be samfala oli no gat fasin ya? Long tok ya, “Wokem Mo Kasem Gudfala Samting From Fasin Fraetgud Long God,” man we i givim tok i eksplenem se long Jeremaea 32:​37-39, Jeova i promes se Hem bambae i givim wan hat we i gat fasin fraetgud long God, long ol man blong Hem. Jeova i putum fasin fraetgud long God long hat blong yumi. ?Olsem wanem? Tru long tabu speret mo Tok blong Hem, Baebol. Be, i klia se yumi mas traehad blong stadi long Tok blong God mo yusumgud olgeta samting long saed blong speret we Hem i bin givim. Samting ya i joen tu, wetem ol asembli blong yumi mo ol miting blong kongregesen, we oli halpem yumi blong lanem fasin fraetgud long Hem.

Program blong aftenun i open wetem gudfala advaes blong trastem Jeova mo tok blong hem. Biaen i gat wan storeyan long saed blong ol rod we Kingdom i save gat paoa long laef blong yumi we i Kristin.

Afta i gat wan tok we i gat tri haf blong hem. Stampa tok blong hem se, “Fraetgud Long God i Pusum Yumi Blong Obei Long Ol Samting We God i Askem Yumi Blong Mekem.” Hem i pulum tingting i go long famle. Hemia sam long ol advaes blong Baebol​—we oli save wok​—we oli kamaot long taem ya.

□ Blong ol hasban: Fasin fraetgud long God i mas pusum wan man blong laekem waef blong hem, olsem prapa bodi blong hem. (Efesas 5:​28, 29) Wan man i no gat tingting blong givim kil long prapa bodi blong hem, blong daonem hem wan fored long ol fren blong hem, no blong toktok smosmol long saed blong ol mastik blong hem wan. Ale, nao sem fasin mo respek we hem i gat long hem wan, hem i mas soem long waef blong hem tu.

□ Long ol waef: Fasin fraetgud long God we Jisas i gat i pusum hem blong ‘mekem samting we God i wantem.’ (Jon 8:29) Hemia wan gudfala tingting we ol waef oli save folem long saed blong ol hasban blong olgeta.

□ Long ol papa mama: Ol Kristin papa mama oli save soem fasin fraetgud long God taem oli mekemgud wok blong olgeta olsem papa mama, mo oli luk ol pikinini blong olgeta olsem ol presen we oli kam long Jeova. (Ol Sam 127:3) Faswan mak blong ol papa mama i blong tijim ol pikinini blong olgeta blong oli kam olsem tru Kristin.

□ Long ol pikinini: Jeova i givim oda long ol pikinini blong obei long ol ‘papa mama blong olgeta from oli joen long Masta blong yumi.’ (Efesas 6:1) Taswe, taem oli obei long papa mama blong olgeta i olsem we oli obei long God.

Laswan tok blong dei i pulum filing blong yumi, from i tokbaot dip filing we yumi evriwan i kasem, taem yumi lusum wan we yumi laekem tumas long ded. Be, kolosap long medel blong tok, i gat wan sapraes. Man we i givim tok i mekem ol man we oli stap lesin oli glad, taem hem i soemaot nyufala buklet we i kamaot, When Someone You Love Dies. Buklet ya we i gat 32 pej mo ful kala long hem, i tokbaot plante samting we i save halpem olgeta we oli harem nogud, blong kasem save mo winim ol filing mo tingting we oli kamaot, taem wan we oli laekem tumas i ded. ?Yu yu bin tingbaot sam taem, wanem blong talem long wan man we i harem nogud? Wan haf blong buklet ya i tokbaot olsem wanem yumi save halpem olgeta we oli harem nogud. Taem oli stap lesin long man we i givim tok, plante oli stap tingbaot wan man we nyufala buklet ya i save givhan long hem.

‘Mekem Tabu Wok Blong God Wetem Fasin Fraetgud Mo Dip Ona Long Hem’

Hemia nao stampa tok blong seken dei, we i stanap long Hibrus 12:28. Long program blong moning i gat seken tok, we i gat ol defren haf long hem: “Ol Kongregesen We Oli Wokbaot Long Fasin Fraetgud Long Jeova.” Faswan haf i tokbaot fasin blong go long ol miting. Fasin blong yumi blong stap long ol miting i soem respek blong yumi long God mo long ol samting long saed blong speret we Hem i givim. Taem yumi go long ol miting, yumi soem se yumi fraetgud long nem blong hem mo yumi wantem tumas blong mekem laef blong yumi i laenap wetem wil blong hem. (Hibrus 10:​24, 25) Seken man blong givim tok i eksplenem se blong ful kongregesen i wokbaot long fasin fraetgud long Jeova, wanwan man i mas mekem wan samting blong holemtaet gudfala fasin. Laswan man blong givim tok i tokbaot wan responsabiliti mo wok we ol Kristin oli gat​—blong talemaot gud nyus we oli no kam slak. ?Bambae yumi gohed blong prij go kasem wetaem? Go kasem taem we Jeova i talem se inaf.​—Aesea 6:11.

Stampa tok blong nekis tok, se “Glad Blong Jeova i Stap Protektem Yufala,” we ol haf blong stadi long magasin oli tokbaot. (Nehemaea 8:10) ?From wanem ol man blong Jeova oli glad? Man blong givim tok i tokbaot plante risen. Wan impoten wan hemia se wan gudfala fasin fren wetem God i mekem yumi kam ol man we i glad moa long wol. Jes tingbaot, man blong givim tok i mekem ol man we oli kam long asembli ya oli tingbaot, se hem i wan blesing blong yumi stap long medel blong ol man we Jeova i pulum i kam long Jisas Kraes. (Jon 6:44) !Hemia wan bigfala risen blong stap glad!

Wan bigfala samting long evri asembli hemia baptaes, mo oli no mestem samting ya long Distrik Asembli ya, “Fraetgud Long God.” Long tok ya “Givim Laef Long Jeova Mo Baptaes Long Fasin Fraetgud Long God,” man blong givim tok i eksplenem se ol man wanwan we oli baptaes, oli mas mekem fofala samting ya: (1) Yumi mas stadi long Tok blong God mo yusum ol buk we oli halpem yumi blong kasem save mo mekem i wok; (2) yumi mas prea; (3) yumi mas joen wetem ol narafala man blong bilif long ol miting blong kongregesen; mo (4) yumi mas givim wetnes long nem blong Jeova mo Kingdom.

Program blong Sarede aftenun i stat wetem wan poen we i mekem yumi haremgud se “Ol Man We Jeova i No Save Lego Olgeta.” Tri taosen faef handred yia bifo, taem nesen blong Isrel i fesem ol hadtaem, Jeova i mekem wan promes tru long Moses, se: “Jeova God blong yufala . . . bambae i no save lego yufala i stap yufala nomo no livim yufala olgeta.” (Dutronome 31:6) Jeova i pruvum se promes blong hem i tru, taem Hem i protektem Isrel taem oli go insaed long promes lan blong karem i blong olgeta. Tede, taem yumi fesem ol hadtaem, yumi tu yumi save trastem Jeova fulwan se bambae Hem i no save lego yumi, sipos yumi fasgud long hem mo folem advaes blong Tok blong hem.

?Olsem wanem yumi save faenem glad taem yumi ridim Baebol? Long tok ya “Ridim Tok Blong God, Tabu Baebol, Evri Dei,” man blong givim tok i pulum tingting blong rid wetem wan tingting we yumi wantem save moa mo askem ol kwestin yumi wan olsem se: ?Store ya i tijim mi wanem long saed blong ol gudfala fasin mo ol rod blong Jeova? ?Olsem wanem mi save folem fasin blong Jeova long saed ya? Ridim Baebol long rod ya i wan samting blong haremgud from mo wan ekspiryens we i karem blesing.

Folem tok ya ol man oli lesingud long wan narafala tok we i gat defren haf blong hem se, “Ol Samting Blong Givhan Long Olgeta We Oli Fraetgud Long Jeova.” Nating se Jeova i no mekem ol merikel blong halpem ol man blong wok blong hem tede, hem i halpem olgeta we oli fraetgud long Hem. (2 Pita 2:9) Tok ya we i gat defren haf blong hem i tokbaot fo samting we Jeova i yusum, blong halpem yumi long ol hadtaem ya: (1) Tru long speret blong hem, Jeova i givim paoa long yumi, blong mekem ol wok we oli bigwan moa bitim paoa blong yumi. (2) Tru long Tok blong hem, Hem i givim ol advaes mo i lidim yumi. (3) Tru long ransom, hem i mekem yumi gat wan voes blong hat mo tingting we i klin. (4) Tru long ogenaesesen blong hem, wetem ol elda, hem i lidim yumi mo i protektem yumi. (Luk 11:13; Efesas 1:7; 2 Timote 3:16; Hibrus 13:17) Taem yumi yusum ol samting ya fulwan, bambae yumi save stanap strong mo Jeova i save agri long yumi.

Stampa tok blong laswan tok long Sarede aftenun, hem i “Dei Blong Jeova Blong Mekem Ol Man Oli Fraet i Kolosap.” Hem i stanap long profet tok blong Malakae. I bin gat ol dei blong mekem ol man oli fraet long taem bifo, olsem taem jajmen i kam agensem Jerusalem long yia 70 K.T. Be bigfala dei blong mekem ol man oli fraet we ol man oli neva luk bifo, hemia dei blong Jeova we i stap kam. Taem we bambae ‘Jeova i givimbak long olgeta we oli no save God mo long olgeta we oli no obei long gud nyus long saed blong Jisas Masta blong yumi.’ (2 Tesalonaeka 1:​6-8) ?Wetaem bambae samting ya i kamaot? Man blong givim tok i makemgud se: “!En i kolosap! Jeova i save dei ya mo haoa blong hem. Bambae Hem i no jenisim plan blong hem. Hem i askem yumi blong stanap strong wetem longfala tingting.[17]”

I had blong bilivim se tu dei i pas finis. ?Bambae program blong laswan dei i olsem wanem?

“Fraetgud Long God Mo Presem Hem”

Stampa tok blong namba tri dei i stanap long Revelesen 14:7. Long program blong moning, i gat ol defren tok we oli soemaot sam stampa tijing, we oli mekem ol Wetnes blong Jeova oli defren long ol narafala skul.

Long tok ya “Bambae Ol Stret Man Oli Laef Bakegen,” man blong givim tok i stanemap wan impoten kwestin se: “?Long jajmen dei blong wan taosen yia ya, wetaem olgeta we oli holem strong kasem oli ded long ol laswan yia blong wol ya blong Setan, bambae oli laef bakegen?” ?Ansa? Man blong givim tok i eksplenem se, “Baebol i no talem. Be, ?yufala i ting se i stret, se olgeta we oli ded long taem blong yumi, bambae oli laef bakegen fastaem, blong oli save joen wetem bigfala kampani we oli laef tru Amageden, long bigfala wok blong tijim ol man we bambae i stap, long ful taem blong Jajmen Dei? !Yes, i stret nomo!” ?Bambae i gat sam man we oli sef? Yes, bambae i mas gat. Ol tijing mo eksampel blong Baebol we oli mekem yumi sua long samting ya oli eksplenem klia long nekis tok, “Stap Sef Mo Laef Tru Long Bigfala Trabol.”[20]

Ol Wetnes blong Jeova oli bin kasem save longtaem finis, se Baebol i tokbaot tu hop​—laef we i no save finis long wol blong plante milyan man mo laef long heven blong wan stret namba blong man we oli no save ded bakegen samtaem, we bambae oli rul wetem Kraes long Kingdom blong hem. Oli tokbaot hop blong heven long tok ya, “Yufala Ol Sipsip Blong Mi, Yufala i No Plante, Be Yufala i No Fraet.” (Luk 12:32) From fasin blong laef long wol ya tede, smol sipsip ya i no mas fraet; evriwan blong olgeta i mas stanap strong gogo kasem en. (Luk 21:19) Man blong givim tok i talem se “fasin blong olgeta blong no fraet i leftemap tingting blong olgeta blong bigfala kampani. Olgeta tu oli mas wokem fasin blong no fraet taem oli wet blong kam fri long bigfala trabol we wol i neva luk samtaem.”

Long en blong program blong moning, ol man we oli stap lesin oli glad blong lukluk drama ya, Ol Disisen We Yu Yu Fesem. Long taem blong Josua, mo blong profet Elaeja tu, ol man Isrel oli mas mekem wan disisen. Oli gat wan jus blong mekem. Elaeja i talem se: “?Go kasem wetaem bambae yufala i stanap long tu tingting? Sipos Jeova i trufala God, yufala i folem Hem; be sipos Bal i trufala god, yufala i folem hem.” (1 King 18:21) Tede, tu, ol man oli mas jusum. I no taem blong stanap long tu tingting. ?Wanem nao stret disisen? Hemia sem wan we Josua i bin mekem bifo. Hem i talem se: “Long saed blong mi mo famle blong mi, bambae mifala i mekem wok blong Jeova nomo.”​—Josua 24:15.

Nao i Sande aftenun mo i taem blong pablik tok we stampa blong hem, “From Wanem Yumi Mas Fraetgud Long Trufala God Naoia.” Revelesen 14:​6, 7, i talem long olgeta man se: “Yufala i mas fraetgud long God mo leftemap nem blong hem.” ?From wanem i impoten blong fraet long God naoia? From, olsem vas i gohed blong talem, “taem i kam finis blong hem i jajem olgeta man.” Tru long Pikinini blong hem, we i stap King finis long Kingdom long heven, Jeova bambae i finisim wol ya we i no klin mo i gat fasin rebel long hem. Man blong givim tok i eksplenem se rod ya nomo i save mekem olgeta we oli fraetgud long God oli haremgud mo tu i save sevem mo holem hop blong yumi, long wol ya i stap. !From we yumi stap long en blong fasin blong naoia, i impoten se yumi fraetgud long trufala God naoia!

Afta tok long Wajtaoa stadi blong wik ya, laswan man blong givim tok i kam long platfom blong mekem tok blong hem. Hem i eksplenem se, olsem frut blong program blong asembli ya, fasin fraetgud long God i gat bigfala mining long ol man we oli kam long hem. Hem i makemgud plante blesing, we ol man we oli fraetgud long God oli kasem. Man blong givim tok i talemaot wan nyufala kaset video we i jes kamaot​—United by Divine Teaching. Video ya i soem ol nambawan samting blong Intenasnal Asembli “Tijing Blong God” we oli holem long 1993-1994. Taem tok i kasem en blong hem, plante oli stap tingbaot nomo se, ‘?Yumi save tingbaot wanem long nekis yia?’ Tri-dei distrik asembli long plante ples.

Blong finisim, man blong givim tok i pulum tingting long Malakae 3:​16, we i talem se: “Long taem ya olgeta we oli fraetgud long God oli stap toktok long olgeta wanwan, wanwan wetem fren blong hem, mo Jeova i gohed blong lesin. Mo oli stat blong raetem wan buk long fored long hem blong tingbaot olgeta we oli fraetgud long Jeova mo blong olgeta we oli stap tingbaot nem blong hem.” Ol man we oli kam long asembli ya, oli gobak wetem wan strong tingting blong tingbaot nem blong Jeova, mo mekem wok blong hem wetem fasin fraetgud.

[Tok blong pija long pej 24]

Olgeta we oli baptaes oli nidim blong gohed blong soem fasin fraetgud long God

[Tok blong pija long pej 25]

Drama “Ol Disisen We Yu Yu Fesem” i pulum ol man we oli stap lesin wetem nid blong gat strong tingting blong mekem wok blong Jeova

[Tok blong ija long pej 26]

Ol man we oli kam long asembli ya oli glad blong kasem nyufala buklet ya “When Someone You Love Dies”