Beswan Samting We Mi Yusum Laef Blong Mi Blong Mekem
OLSEM BOB ANDERSON I TALEM
Samwe long ten yia bifo, sam fren oli askem long mi se: “?Bob, from wanem yu stap longtaem long wok blong paenia?” Mi smael mo mi talem se, “Yes, ?yufala i save tingbaot wan wok we i moa gud bitim wok blong paenia?”
MI GAT 23 yia long 1931, taem mi joen long wok blong paenia. Naoia, mi gat 87 yia mo mi stap gohed yet long wok blong paenia. Mi save se i no gat wan samting we i moa gud, we mi save yusum laef blong mi blong mekem. I gud mi mi eksplenem from wanem. Long 1914, wan man i livim wan traket long haos blong mifala. Ol Intenasnal Baebol Studen nao, (nem blong ol Wetnes blong Jeova long taem ya) oli prentem. Taem Wetnes ya i pas bakegen, mama blong mi i askem plante kwestin long hem long saed blong hel faea. Mama i gruap olsem wan woman we i strong long Wesleyan Metodis. Be hem i neva agri long tijing ya se, God we i gat lav i save mekem man i harem nogud blong olwe. Taem hem i lanem trutok long bisnes ya, hem i talem se: “!Mi harem se mi glad moa bitim ol narafala glad we mi kasem long laef blong mi!”
Stret long taem ya, mama blong mi i no moa tijim Sande skul blong Metodis. Nao hem i joen wetem smol grup blong ol Baebol Studen. Hem i stat blong prij long stret taon blong hem, Bikenhed, we i stap fored long haba blong Livapul. Hemia narasaed long Reva Mesei. Mo biaen, hem i gohed blong ron long baskel, i go long plante narafala taon we oli stap kolosap. Hem i prij long bigfala eria ya long olgeta laef blong hem biaen, mekem se ol man oli savegud hem. Hem i soem nambawan eksampel long ol pikinini blong hem. Mo hem i ded long 1971, taem hem i gat 97 yia. Wan Wetnes we i wok strong go kasem en.
Mi mo sista blong mi, Kathleen, mitufala i aot long Sande skul blong Metodis, mo mitufala i folem Mama, mifala i go long ol miting blong hem wetem ol Baebol Studen. Biaen, papa blong mi tu i joen wetem mifala. Ale, hem mo Mama, tufala i mekem plan blong mifala i mekem famle stadi long buk ya The Harp of God. Long taem ya, wan stadi olsem i nyu long mifala. Be ol stampa trutok blong Baebol we mifala i lanem, oli kasem bigfala frut. From we biaen, mi mo sista blong mi, mitufala i joen long wok blong paenia.
Mama i bilif se long 1920, taem mifala i wajem “Sinema Blong Ol Samting We God i Wokem” (“Photo-Drama of Creation”) long Livapul, samting ya i jenisim tingting we mitufala pikinini i gat, long saed blong speret. Mo tok blong hem i stret. Nating se mi yang nomo, sinema ya i mekem wan klia pija long tingting blong mi. Mi tingbaot yet haf ya we i soem laef blong Jisas, antap moa, hemia we i soem hem we i stap go blong ded. Fulwan ekspiryens ya i halpem mi blong tingting dip long wok we i moa impoten long laef—!hemia wok blong prij!
Jes biaen long ol yia 1920, mi stat blong joen wetem mama long ol Sande aftenun blong mi blong seremaot ol traket. Fastaem, oli talem long mitufala blong livim ol traket ya long ol haos. Afta, oli talem se bambae mitufala givimaot long ol man blong haos, mo visitim bakegen olgeta we oli intres. Oltaem, mi tingbaot samting ya olsem faswan rod blong mekem visit bakegen mo Baebol stadi long taem blong yumi, we tede, i stap karem plante frut.
!Joen Long Wok Blong Paenia!
Mi mo Kathleen, mitufala i baptaes long 1927. Long 1931, mi stap wok long Livapul, olsem wan man blong jekemap ol samting we oli mekemap ol kemikol. Long taem ya, mi harem bigfala disisen blong tekem nem ya, ol Wetnes blong Jeova. Long ol ples blong bisnes long Livapul, plante taem, mi luk ol kolpota (naoia oli kolem paenia) blong Sosaeti, oli stap prij. Mo, eksampel blong olgeta i pulum tingting blong mi bigwan. !Mi wantem tumas blong no moa joen wetem ol fren blong wol, blong mi spenem laef blong mi long wok blong Jeova!
Long hot taem blong sem yia ya, fren blong mi, Gerry Garrard i talem long mi se hem i agri, taem Joseph F. Rutherford, seken presiden blong Watch Tower Society, i askem hem blong go prij long India. Jes bifo we hem i klaem long sip mo i go, hem i visitim mi mo i tokbaot jans blong joen long fultaem Kristin minista wok. Taem hem i talem tata, bakegen, hem i leftemap tingting blong mi blong mekem wok ya, taem i talem se: “!Mi save se i no longtaem, bambae yu mekem wok blong paenia, Bob!” Mo i kamaot olsem we hem i talem. Long Oktoba long sem yia, mi joen long wok blong paenia. !Mi mi glad tumas, mi mi fri! !Mi ron long baskel, mi pas long ol smosmol rod, mo mi stap prij long ol man we oli stap longwe! Mi save se mi stap mekem wok we i moa impoten bitim ol narafala wok long laef blong mi.
Faswan ples we mi mekem wok blong paenia long hem, hemia long Saot Wels. Long ples ya, mi wok wetem Cyril Stentiford. Biaen, Cyril i maredem Kathleen, mo tufala i mekem wok blong paenia blong sam yia. Biaen, dota blong tufala, Ruth, hem tu i mekem wok blong paenia. Long 1937, mi mi stap long Flitwud, Lankasia—mi stap wok wetem Eric Cooke. Kasem taem ya, ol paenia oli prij nomo long ol ples afsaed long Briten, longwe long eria blong kongregesen. Be Albert D. Schroeder, we long taem ya, hem i lukaot long branj ofis blong Sosaeti long London, i mekem disisen blong sanem mitufala long taon blong Bradford, Yoksir. Hemia i fastaem we oli sanem sam paenia blong Engglan, oli go blong givhan long wan spesel kongregesen.
Eric i go long Wajtaoa Baebol Skul blong Gilead long 1946, mo oli sanem hem long Saot Rodesia, naoia Simbabwe. Mo hem mo waef blong hem, tufala i stap gohed yet long wok misinari long Duban, Saot Afrika.
Long 1938, mi mekem wan narafala wok. Mi wok olsem son elda (naoia oli kolem seket elda) long not-wes blong Lankasia mo naesfala ‘Ples blong Lagun.’ Long ples ya, mi mitim Olive Duckett, mo taem mitufala i mared, kwiktaem nomo hem i joen wetem mi long wok blong seket.
Long Ol Yia Blong Faet Long Aerlan
Smoltaem afta we Engglan i talem se bambae hem i mekem faet wetem Jemani long Septemba 1939, oli sanem mi long Aerlan. Long Engglan, oli stat finis blong tekem enikaen man blong faet. Be long Ripablik blong Aerlan, long saot, oli no mekem samting ya. Hem i wan kantri we, long taem ya, hem i no tekem saed long faet. Ripablik blong Aerlan mo Not blong Aerlan, bambae oli kam wan seket nomo. Be from we oli putumap ol tabu, mi mas kasem wan pepa we i givim raet long mi blong aot long Engglan, mo go long narafala haf blong Aerlan. Ol haeman blong gavman oli talem long mi se mi save go. Be oli talem se, mi mas kambak kwiktaem long Engglan, taem mi gat inaf yia blong joen long ami. !Mi agri long toktok nomo, be mi sapraes se, oli sanem pepa blong mi i kam, i no gat wan samting nating we i joen wetem samting we oli askem!
Long taem ya, i gat bitim 100 Wetnes nomo long ful Aerlan. Taem mitufala i kasem Dublin long Novemba 1939, Jack Corr, we hem i mekem wok blong paenia longtaem, i mitim mitufala. Hem i talem long mitufala se i gat tu narafala paenia long wan taon we i stap kolosap, mo sam man we oli intres, samwe 20 long olgeta, oli stap long Dublin. Jack i rentem wan rum long Dublin. Mo evriwan oli agri blong joen long hem long evri Sande. Oli mekem olsem gogo kasem we kongregesen i stanap long 1940.
Not blong Aerlan, olsem haf blong Yunaeted Kingdom, i stap faet wetem Jemani. Taswe, taem mitufala i muf i go long not, long Belfas, mitufala i mas fesem problem long saed blong kakae mo laet long naet. Taem ol plen blong Nasi, oli flae 1,600 kilomita antap long mifala blong go long Belfas mo kambak long ol ples blong olgeta long Yurop, oli traem blong sakem bom long taon. Long faswan taem we oli sakem bom, Haos Kingdom blong mifala i kasem trabol. Mo oli spolemgud ren haos blong mifala taem mifala i stap visitim sam brata long nara haf long taon. Ale, mifala i gat wan gudfala taem blong ronwe. Long sem naet ya, wan famle we i Wetnes i resis i go wan haos we ol man oli go long hem blong haed long bom. Taem oli kasem haos ya, oli faenem se hem i fulap finis. Nao oli gobak long haos blong olgeta. Wan bom i foldaon long stret haos ya, mo evriwan we oli stap insaed, oli kasem kil. Be ol brata blong yumi, oli sef, oli kasem smol kil nomo. Long ol yia ya blong faet we laef i strong, i no gat wan brata blong yumi we i kasem bigfala kil. Wan samting we yumi evriwan i talem tangkyu long Jeova from.
Kasem Ol Kakae Long Saed Blong Speret
Taem faet i stap gohed, ol tabu oli kam strong moa. Biaen, oli putum wan rul blong jekemap evri leta we oli pastru long postofis. Samting ya i minim se, oli putum tabu long Wajtaoa, mo oli no letem blong i kam insaed long kantri. Mifala i no save se bambae mifala i mekem wanem. Be han blong Jeova i no sot. Wan moning, mi kasem wan leta long wan “kasen” long Kanada. Hem i raet long mi blong tokbaot ol bisnes blong famle. Mi no save se hem i hu. Be insaed long leta ya, hem i talem se hem i sanem “wan nambawan haf we i tokbaot Baebol,” blong mi ridim. Hem i wan Wajtaoa, be from we i no gat raeting long bak blong hem, ol man blong jekemap ol leta oli no spolem.
Kwiktaem nomo, ol Wetnes long ples ya oli halpem mi mo waef blong mi, mo famle Maggie Cooper, we oli bin wok long saed blong “Photo-Drama,” mifala i stat blong wokem Wajtaoa ya i kam plante. Smoltaem biaen, taem ol fren long Kanada, Ostrelya, mo Amerika, oli sanem ol nyufala Wajtaoa i kam, mifala i plan blong sanem 120 long narafala haf blong kantri. From waes mo kaengud fasin blong olgeta, mifala i neva mestem wan namba blong Wajtaoa long olgeta taem ya we i gat faet.
Mifala i mekem ol asembli tu. Wan nambawan samting i kamaot long asembli blong 1941, taem mifala i kasem nyufala buk ya Children. !I luk olsem se ol man blong jekemaot leta oli no agensem wan buk long saed blong ol pikinini! Ale mifala i kasem buk ya we i no gat trabol. Wan taem, mifala i kasem buklet ya Peace—Can It Last? Buk ya, mifala nomo i prentem from we mifala i no save oda long London. Nating se oli putum ol tabu wok blong mifala, mifala i kasem olgeta kakae long saed blong speret.
Winim Fasin Agens
Long Belfas, i gat wan lida blong skul we i stap laef long haos blong ol olfala, we haos ya, ol Wetnes blong Jeova oli lukaot long hem. Man ya i sanem buk ya Riches, long waef blong hem long Engglan. Waef blong hem i agensem trutok, mo taem hem i ansa long man ya, hem i talemaot klia samting ya. Hem i talem tu se mifala i “wan ogenaesesen we i no sapotem kantri.” Ol man blong jekemap leta oli faenem leta ya, nao oli ripotem bisnes ya long ofis blong ‘Criminal Investigation.’ Ale, oli singaot mi blong go long ples blong ol polis blong eksplenem samting ya mo oli askem mi blong karem buk ya Riches, wetem mi. Wan samting we i intres se, taem oli givimbak buk ya long mi, ol haf we oli makem laen long hem, oli tokbaot Roman Katolik Jyos. Mi harem se samting ya i gat mining, from we mi save se ol polis oli blokem wok blong IRA (Irish Republican Army).
Oli askem plante kwestin long mi from fasin ya we mifala i no tekem saed long faet. Yes, from we ol polis oli faenem se i had blong kasem save long disisen ya blong mifala. Be neva ol haeman, oli tekem wan aksin agens long mifala. Biaen, mifala i askem sipos mifala i save mekem wan asembli. Nao ol polis oli talem se bambae oli sanem tu polisman blong mekem sam ripot. Mi talem se: “!Bambae mifala i welkamem tufala!” Ale, tufala i kam, mo tufala i stap long fulwan miting blong aftenun, we tufala i stap tekem sam not. Long en blong program, tufala i askem se: “?From wanem oli sanem mitufala i kam long ples ya? !Mitufala i haremgud tumas long olgeta samting ya!” Tufala i kam bakegen long nekis dei, mo tufala i glad blong akseptem buklet ya Peace—Can It Last? we tufala i kasem fri. Asembli i finis, we i no gat wan trabol i kamaot.
Taem faet i finis mo oli tekemaot ol tabu blong go long narafala kantri, Pryce Hughes blong Betel long London, hem i kam long Belfas. Hem i kam wetem Harold King, we biaen i go blong wok olsem misinari long Jaena. Afta we mitufala i stap sikis yia afsaed long branj ofis blong London, ol tok we ol brata ya oli givim oli leftemap tingting blong mitufala bigwan. Smoltaem biaen, oli sanem wan narafala brata we hem i holemstrong longtaem long wok blong paenia, i kam long Engglan blong givhan long wok long Belfas blong gohed strong moa.
Gobak Long Engglan
Mitufala i wokem wan strongfala fasin lav wetem ol brata blong Aerlan. Taswe, i had long mitufala blong gobak long Engglan. Be nating. Oli sanem mi mo waef blong mi long Manjesta, mo biaen mitufala i muf i go Nyuton-le-Wilows, wan narafala taon blong Lankasia, we i gat bigfala nid long hem. Lois, dota blong mitufala, i bon long 1953, mo mitufala i glad tumas blong luk we hem i joen long wok blong paenia, taem hem i gat 16 yia. Afta we hem i mared long David Parkinson, we hem tu i wan paenia, tufala i gohed long fultaem Kristin minista wok long Not blong Aerlan. Long plante samting, tufala i folem rod we mi mo Olive, mitufala i bin folem. Naoia, tufala wetem ol pikinini blong tufala, oli stap long Engglan, mo mifala evriwan i stap wok long sem kongregesen.
Nating se i gat ol defren jenis long laef blong mitufala, mi neva stop long wok blong paenia—Olive mo mi, mitufala i neva wantem stop long wok ya. Oltaem, mi harem se sipos waef blong mi i no bin sapotem mi wetem lav, bambae mi neva save gohed long fultaem Kristin minista wok. Naoia, kwiktaem nomo mitufala i stap kam taed, be mitufala i glad yet blong prij. Mitufala i harem glad moa taem mitufala i save prij tugeta, mo mekem Baebol stadi wetem ol man we oli stap kolosap long mitufala. Long ol yia we oli pas, mitufala i bin gat jans blong halpem samwe long wan handred man blong oli givim laef blong olgeta long Jeova. Oli kam olsem man blong wok blong hem we oli tekem baptaes. !Samting ya i givim bigfala glad long mitufala! Mo mi ting se naoia, namba ya i go antap bigwan tumas, taem ol famle we oli Wetnes, oli stap kam bigwan moa.
Plante taem, mi mo Olive, mitufala i tokbaot plante jans mo ekspiryens we mitufala i kasem long ol yia we oli pas. !Ol yia ya oli rili ol hapi ya, mo oli pas kwik nomo! Taem mi stap mekem wok blong paenia long ol yia ya, mi save se i no gat wan wok, we mi save yusum laef blong mi blong mekem, we i moa gud bitim wok blong Jeova, God blong mi. Naoia, nating se mi stap tingtingbak wetem fasin tangkyu no mi stap wet long fyuja, mi faenem se ol tok blong Jeremaea oli gat bigfala mining: “Hemia nao ol wok blong Jeova we i kaen gud, we yumi no lus olgeta, from we ol fasin sore blong hem oli no save finis. Evri moning oli nyu bakegen. . . . ‘Taswe bambae mi mi stap wet long hem.’ ”—Lamentesin 3:22-24.
[Tok blong pija long pej 26]
Bob mo Olive Anderson