Yu No Mas Stap Kros Longtaem
I NO isi nating blong blokem kros taem narafala i mekem i nogud long yumi. Baebol i givim advaes we i save givhan long taem olsem. Aposol Pol i raetem se: “Sipos yufala i kros, yufala i no letem we kros ya i lidim yufala, blong yufala i mekem sin. Yufala i mas no stap kros, gogo kasem san i godaon.”—Efesas 4:26.
Taem wan man i mekem i nogud long yumi, i no rong blong harem se yumi kros. Taem Pol i talem se “sipos yufala i kros,” hem i soem se samtaem, maet i stret we yumi kam kros—maet from wan man i mekem i no stret long yumi, no i jajem yumi long fasin we i no stret. (Skelem wetem 2 Korin 11:29.) Be nating se yumi gat gudfala risen blong kros, taem yumi stap kros longtaem tumas, samting ya i save mekem bigfala trabol i kamaot, mo i save lidim yumi blong mekem bigfala sin. (Jenesis 34:1-31; 49:5-7; Ol Sam 106:32, 33) ?Nao, yu save mekem wanem sipos yu harem se kros i stat blong kam antap?
Taem yu kros from ol smosmol rong nomo, plante taem yu save stretem trabol ya long hat blong yu we ‘yu no tokbaot.’ Sipos no, yu save go luk man ya we i mekem i no stret long yu mo tokbaot bisnes ya wetem hem. (Ol Sam 4:4; Matyu 5:23, 24) Nomata wanem rod yu jusum blong folem, i moa gud blong stretem trabol ya kwiktaem, blong mekem se kros i no kam bigwan moa long tingting blong yumi mo biaen i karem nogud frut.—Efesas 4:31.
Jeova i fogivim yumi long gladhat blong hem, nating se samfala sin yumi mekem be yumi no save. ?Olsem wanem long yumi? ?Yumi save folem fasin ya mo fogivim ol smosmol rong we wan brata blong yumi i mekem long yumi?—Kolosi 3:13; 1 Pita 4:8.
I gud blong save se Grik wod we oli tanem i kam “fogif,” stret mining blong hem se “lego.” From samting ya, taem wan man i fogivim narafala, i no minim se hem i ting nating no i agri wetem rong we hem i mekem. Samtaem, hem i minim nomo se yu ‘lego’ olgeta tingting long saed blong samting we i hapen, yu luksave se sipos yu stap kros longtaem, bambae yu harem nogud moa mo bambae i spolem fasin joen long Kristin kongregesen. !Mo tu, sipos yu holem kros, samting ya i save spolem helt blong yu!—Ol Sam 103:9.