“?Mane Ya i Kam Long Weples?”

OL MAN oli sapraes tumas taem oli lukluk video blong Watch Tower Society, we nem blong hem “Jehovah’s Witnesses​—The Organization Behind the Name.” Oli luk ol man mo woman blong ol defren kala mo kantri we oli klin, oli stap smael mo oli stap wok tugeta wetem wan tingting nomo. Oli sapraes long ol plante taosen hapi man ya we oli stap wok. Be tu, oli sapraes long ol bigfala haos long hedkwota blong Sosaeti long Bruklin, mo long ol plantesin blong olgeta long Wolkil, Nyu Yok. Video ya i soem se, insaed long ol haos ya, yu save faenem ol nyufala teknik​—ol mesin we oli wok hareap blong prentem mo wokem plante milyan buk evri manis, plante defren kaen kompyuta, mo plante man we oli wok long ol mesin ya.

Samting ya i soem se oli spenem bigfala mane. Taswe, sam man oli askem se, “?Mane ya i kam long weples?”

Ol man we oli visitim wol hedkwota blong Sosaeti tu, oli sapraes tumas. Oli mas lukluk i go antap olgeta, blong luk nyufala haos ya we i gat 30 store blong hem. Hem i wan long plante haos we oli yusum olsem ples blong slip blong bitim 3,000 man mo woman we oli wok long ples ya. Plante man oli sapraes tumas taem oli visitim nyufala Watchtower Senta Blong Edukesen, we i stap samwe 110 kilomita long not blong Bruklin. Nating se oli no finisim haos ya yet, i gat 1,200 wokman oli slip long hem finis. Evri yia, tu klas blong ol misinari bambae oli kasem trening long ples ya, nao Sosaeti i save sanem olgeta oli go long ol narafala kantri. Mo tu, long ples ya, i gat ol ofis blong lukaot long bitim 10,000 kongregesen blong ol Wetnes blong Jeova long Yunaeted Stet. I no longtaem i pas, oli mekem plante branj ofis raonabaot long wol oli kam bigfala moa, mo oli stap mekem olsem long plante narafala naoia. I nidim bigfala mane blong mekem ol wok ya. Ol man oli askem se, “?Mane ya i kam long weples?”

Ansa blong kwestin ya, hemia se mane ya i kam long ol man olsem yumi. Hemia ol man long olgeta ples long wol we oli wantem tumas blong mekem evri samting we oli naf blong mekem, blong sapotem impoten Kristin wok ya blong talemaot gud nyus mo tijim ol man. Fasin ya blong wantem tumas blong givim wetem gladhat, i no wan nyufala samting.

Eksampel We Ol Man Isrel Bifo Oli Soem

Bitim 3,500 yia bifo, wan samting i hapen we i mekem se ol man oli mas givim plante presen. Jeova i bin talem long Moses blong wokem wan haos prea no “haos tapolen” we oli save yusum long wosip blong Hem. I nidim plante defren sas samting blong wokem haos ya folem plan we God i givim. Jeova i talem se: “Yufala i mas tekem ol samting blong yufala i kam long Jeova. Evriwan we hat blong hem i glad blong givim sam samting i mas karem samting ya olsem presen blong Jeova.” (Eksodas 35:​4-9, NW) ?Ol man ya oli mekem wanem? Store i soem long yumi se “olgeta evriwan we hat blong hem i pusum hem, oli kam, mo evriwan we tingting blong hem i pusum hem, hem i karem presen blong Jeova, blong givhan blong wokem haos tapolen mo blong olgeta wok blong hem mo ol tabu klos.” Sloslou, ol ‘presen ya we oli glad blong givim’ oli kam plante tumas, mekem se ‘i gat moa samting bitim we oli nidim blong mekem wok we Jeova i talem long olgeta blong mekem.’ (Eksodas 35:​21-29; 36:​3-5, NW) !Ol man ya oli no tingbaot olgeta nomo, oli glad blong givim!

Samwe long 500 yia biaen, ol man Isrel oli kasem wan narafala oda blong givim presen wetem gladhat. Solomon i rere blong mekem tingting blong papa blong hem, King Deved, i kamtru. Deved i wantem bildim wan haos blong Jeova we i save stap oltaem long Jerusalem. Deved i bin hivimap mo givim bighaf blong ol samting we bambae oli nidim blong wokem haos ya. Sam narafala man tu oli givim sam samting taem Deved i askem olgeta blong karem “wan presen i kam long Jeova.” ?Wanem samting i kamaot? “Ol man oli singaot wetem glad, taem oli givim ol presen olsem we olgeta nomo oli wantem. Hat blong olgeta i no hafhaf taem oli stap givim ol presen we olgeta nomo oli wantem givim long Jeova. Mo King Deved, hem tu i haremgud tumas.” (1 Kronikel 22:14; 29:​3-9) !Ol selva mo gol nomo we oli givim olsem presen, praes blong olgeta i samwe long 50 bilyan dola (samting olsem 5 taosen bilyan vatu)!​—2 Kronikel 5:1.

Makemgud long ol eksampel ya se, i no gat wan we i fosem ol man ya blong givim presen. “Olgeta nomo” oli glad blong givim mo oli givim wetem “fulhat blong olgeta.” Jeova i no save glad sipos man i givim presen ya from we narafala i pusum hem blong givim. Long sem fasin, taem ol man oli gat jans blong givim presen mane blong givhan long ol Kristin we oli gat nid, aposol Pol i raetem se oli mas givim we “i no gat man i fosem” olgeta. Hem i gohed, i se: “Nao evri man i mas givim sam samting, olsem we evri man wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem. From we God i laekem tumas man we i save givim long gladhat blong hem.”​—2 Korin 9:​5, 7.

Nid We i Stap Tede

?Olsem wanem tede? ?I gat nid blong givim presen? Yes, i nidim, mo bambae i nidim plante moa taem ol yia oli stap pas. ?From wanem?

Ol Kristin oli bin kasem ol klia tijing long saed blong ol samting we oli mas mekem long taem ya blong en. Jisas i talem long ol disaepol blong hem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu speret. Mo yufala i mas tijim olgeta blong oli folem olgeta tok ya we mi mi givim finis long yufala.”​—Matyu 28:​19, 20.

Taem yumi kam kolosap moa long en blong ‘ol las dei blong wol ya,’ i nidim plante taem mo mane blong finisim bigfala wok ya blong tijim ol man mo blong talemaot gud nyus. ?From wanem? From we plante samting oli joen wetem wok blong talemaot gud nyus blong Kingdom blong God long “olgeta ples long wol.” (Ol Wok 1:8) Bighaf blong ol man oli no savegud Baebol, olsem sam long ol man Jyu long faswan handred yia. Mo tu, plante man long wol oli no bin luk wan Baebol mo oli no ting se hem i Tok blong God. Ol man blong talemaot gud nyus oli mas kasem trening blong oli save go long ol narafala ples long wol. (Rom 10:​13-15) !Mo tingbaot hamas lanwis oli mas save blong mekem wok ya! Olgeta we narafala i talemaot gud nyus long olgeta, oli nidim ol Baebol mo ol buk long prapa lanwis blong olgeta, blong givhan long olgeta blong rid mo stadi long Baebol. I nidim wan nambawan plan blong visitim olgeta man oltaem, blong mekem se sloslou oli kam bigman long saed blong ol save blong Baebol, nao bambae olgeta tu oli save givhan long ol narafala.​—2 Timote 2:2.

Jisas i talem se, fastaem ol man oli mas ‘talemaot gud nyus blong Kingdom. Bambae oli talemaot long olgeta ples long wol, blong oli wetnes long hem long fes blong olgeta man. Nao biaen, en i save kam.’ (Matyu 24:14) Taswe, naoia i taem blong givim olgeta samting we yumi save givim blong mekem impoten wok ya. I no gat wan narafala rod we i moa gud blong yusum mane blong yumi long hem, bifo we ol sas samting blong wol ya oli kam olsem nating nomo.​—Esikel 7:19; Luk 16:9.

?Mane Ya i Go Wea?

Watch Tower Society i wokem ol buk we oli tokbaot Baebol long bitim 230 lanwis. Mo tu, oli wokem ol buk we ol blaen man oli save ridim wetem han blong olgeta, mo ol video we oli soem ol man we oli toktok wetem han blong olgeta, blong givhan long olgeta we sora blong olgeta i fas. Blong mekem olsem, i nidim ol man we oli save tanem wan lanwis i go long narafala lanwis, mo ol man blong jekem wok blong olgeta. Man i sapraes bigwan taem hem i tingbaot olsem wanem olgeta wok ya oli gohed. Oli wokem Wajtaoa long 121 lanwis evri manis, mo 101 long olgeta lanwis ya oli gat ol semfala storeyan insaed long olgeta. I mas olsem, blong mekem se ol man raonabaot long wol oli save ridim sem toktok nomo. Evri yia, praes blong pepa, blong ol samting we oli yusum blong prentem mesej blong Kingdom, blong ol kaset mo video, i go antap. Blong pem ol samting ya, Sosaeti i yusum presen mane we ol brata oli givim.

Raonabaot long wol, i gat moa long 75,000 kongregesen blong ol Wetnes blong Jeova we oli stap mekem wok blong talemaot gud nyus mo tijim ol man. Blong mekem oli joengud mo blong leftemap tingting blong olgeta, sam elda we oli kasem gudfala trening oli visitim ol wanwan kongregesen samwe long tu taem evri yia. Ol asembli tu oli mekem wan impoten wok blong tijim man. Oli mas rentem ol bigfala haos blong mekem ol asembli ya we oli mekem bilif blong yumi i strong. Oli yusum presen mane blong yu blong givhan long rod ya.

Oli mekem ol asembli tri taem nomo long wan yia, be ol kongregesen wanwan oli joen wanples blong mekem faef miting evri wik. (Skelem wetem Eksodas 34:​23, 24.) Plante moa man oli stap lesin long gud nyus. Taswe, evri yia, i gat plante taosen nyufala kongregesen oli stanap. Evri yia, Sosaeti i givim plante milyan vatu olsem lon, blong wokem plante handred nyufala Haos Kingdom, mo blong mekem sam narafala Haos Kingdom oli kam bigwan moa no nyuwan bakegen. Nating se ol kongregesen oli stap pembak lon blong olgeta, i nidim moa presen mane blong wokem sam narafala Haos Kingdom bakegen.

Wan ples we naoia plante man oli stap kam long trutok bitim bifo, hemia ol kantri blong Is Yurop we bifo oli kolem Soviet Yunion. !Yumi glad tumas long nyus ya we i bin kamaot se oli tekemaot tabu long ol kantri ya! Naoia, Sosaeti i stap sanem ol misinari long plante long ol kantri ya. Oli wokem ol nyufala branj ofis long sam kantri. Mekem se, long ol Betel raonabaot long wol, namba blong ol man we oli wok be oli no kasem pei i go antap bitim 15,000. Yes, Sosaeti i mas pem mo bildim ol nyufala haos, blong ol man ya oli stap long olgeta. Presen mane blong yu i givhan long saed ya.

Setan mo ol enjel blong hem oli stap makemgud ol wok ya we i stap gohed. Oli yusum ful paoa blong olgeta blong traem blokem ol traehad blong ol man blong Jeova mo mekem trabol long olgeta. (Revelesen 12:17) Samting ya i minim se ol man blong God oli mas go plante taem long kot blong traem kasem raet blong talemaot gud nyus mo folem ol gudfala loa blong God long laef blong olgeta. Mo tu, ol trabol we oli stap kamaot from ol faet long wol ya blong Setan, mo from ol hariken mo graon i seksek, oli mekem se plante taem ol brata mo sista blong yumi mo ol narafala man we oli stap long ol ples ya oli nidim ol saplae. Presen mane blong yu i givhan long impoten wok ya.

Bambae Jeova i Blesem Yu

Sipos yumi yusum taem mo mane blong yumi blong sapotem wok blong Masta wetem gladhat, bambae yumi kasem bigfala blesing. ?Olsem wanem? God ya, we olgeta samting oli blong hem nomo, bambae i blesem yumi. Proveb 11:25 i talem se: “Sol we i gat gladhat blong givim, bambae hem i kam fatfat, mo man we i givim wora fri nomo long narafala man, bambae hem i kasem bakegen wora we i fri nomo.” Yes, Jeova i glad taem yumi wok blong sapotem wosip blong hem. (Hibrus 13:​15, 16) Hem i promes long ol man Isrel bifo, we oli karem ol presen we kontrak blong Loa i askem, se: “ ‘Testem mi, plis, long samting ya,’ Jeova blong ol ami i talem, ‘bambae yu luk sipos mi mi openem doa blong heven blong ol blesing oli kamdaon long yufala mo mi givim olgeta samting ya long yufala gogo yufala i no moa nidim.’ ” (Malakae 3:10) Ol gudfala samting long saed blong speret we ol man blong Jeova oli stap haremgud long olgeta tede oli pruvum se God i holem promes ya blong hem.

Bambae bigfala wok ya blong talemaot dei blong God blong sevem man, mo blong halpem olgeta we hat blong olgeta i stret blong folem rod blong laef, bambae i no save gohed foreva. (Matyu 7:14; 2 Korin 6:2) Be oli mas hivimap ol “narafala sipsip” blong Masta. (Jon 10:16) !Hem i impoten tumas we yumi mekem wok ya tede! Mo bambae yumi evriwan i glad tumas, taem yumi stap long nyufala wol ya we i gat stret fasin long hem, nao yumi tingtingbak long ol samting we yumi bin mekem. Bambae yumi save talem se: ‘!Mi bin joen fulwan long laswan wok ya blong hivimap ol man!’​—2 Pita 3:13.

[Bokis blong pija long pej 30, 31]

Rod We Samfala Oli Folem Blong Givim Presen Mane Long Wok Blong Talemaot Kingdom

GIVIM PRESEN MANE LONG WOK RAONABAOT LONG WOL: Plante man oli makemaot no plan from stret mane we oli putum long bokis blong presen mane, we oli raetem long hem se: “Presen Mane Blong Wok Blong Sosaeti Raonabaot Long Wol​—Matyu 24:14.” Evri manis ol kongregesen oli sanem mane ya i go long wol hedkwota long Bruklin, Nyu Yok, no long branj ofis we i stap long ol wanwan ples.

OL PRESEN: Yu save sanem ol presen mane i go stret long ofis blong Watch Tower Society we i stap lukaot long kantri blong yu. Ol naesfala ston no ol nara gudfala samting, ol man oli save givim tu olsem presen. Oli mas sanem wan sotfala leta i go wetem presen ya blong talemaot se oli givim samting ya olsem wan presen nomo.

OL STOK MO BON: Man i save givim stok mo bon long Watch Tower Society olsem presen nomo, no folem wan plan we ol profit blong ol stok mo bon ya oli stap go oltaem long man we i givim.

OL BANG AKAON: Man i save mekem se bang i holem mane blong bang akaon blong hem, ol stefeket blong putum mane, no ol akaon blong hem taem i ritae, no hem i save putum i stap long nem blong Watch Tower Sosaeti gogo taem we hem i ded, folem ol rul blong bang long ples blong hem. Sipos wan man i wantem mekem wan long ol samting ya, hem i mas talemaot long Sosaeti.

INSURENS: Man i save mekem se Watch Tower Society i kasem mane blong laef insurens, no mane blong pem yia blong hem taem i ritae long wok, no mane we oli givim long olgeta we oli olfala. Sipos wan man i wantem folem wan long ol plan ya, hem i mas talemaot long Sosaeti.

PRESEN MANE WE MAN I SAVE KASEMBAK SIPOS I NIDIM: Man i save givim mane long Watch Tower Society blong i kipim go kasem we man ya i ded, be sipos hem i nidim mane ya, bambae Sosaeti i save givimbak long hem.

GRAON NO HAOS: Man i save givim graon no haos blong hem i go olsem presen long Watch Tower Society, blong oli salem biaen. Hem i save mekem plan se Sosaeti i kasem haos no graon ya taem hem i ded, be man ya i save gohed blong stap long hem go kasem we hem i ded. Man i mas toktok wetem Sosaeti bifo we hem i givim graon no haos long Sosaeti.

LASTOK BLONG MAN BIFO WE HEM I DED MO PLAN BLONG HOLEM MANE I STAP KASEM DED: Man i save givim graon no haos no mane blong hem long Watch Tower Sosaeti taem hem i raetem wan pepa we i folem loa, no bang i save holem mane ya i stap blong i go long Sosaeti taem man ya i ded. Mane we i blong givhan long wan skul, maet man i no nidim blong pem takis long hem. Man we i wantem se bang i holem mane blong hem i stap blong Sosaeti, hem i mas sanem kopi blong promes ya no lastok blong hem long Sosaeti.

Blong kasem moa save long bisnes ya, raet i go long ofis blong Sosaeti we i stap lukaot long kantri blong yu.