Man Blong Givim “Evri Gudfala Samting”
“Wan taem wan minista blong ‘Refom’ jyos i kam luk mi. Hem i wantem blong save olsem wanem mi lukaot long jyos blong mi. Mi mi talem long hem: . . . ‘Mifala i no stap givim pei long eni man; i no gat samting blong mekem ol man i rao. Neva mifala i tekem wan kleksin.’ Hem i askem, ‘?Olsem wanem yufala i kasem mane?’ Mi mi ansa, ‘Nao, Dr.——, sipos mi talem trutok we i isi bambae i hadwok blong yu save bilivim. Taem ol man oli intres long rod ya, oli no save faenem basket we oli putum aninit long nus blong olgeta blong tekem mane blong olgeta. Be oli luk se i gat kaon blong pem. Oli talem long olgeta wanwan, “I nidim mane blong pem bigfala rum ya. . . . ?Olsem wanem mi save putum wan smol mane i go blong givhan long ol samting ya?” ’ Hem i luk mi olsem we hem i ting se, ‘?Yu ting se mi mi olsem wanem—wan man we i no save samting?’ Mi talem, ‘Nao, Dr.——, mi talem trutok we i stret. . . . Taem wan man i karem wan blesing mo i gat sam samting, hem i wantem yusum blong Masta. Sipos hem i no gat samting, ?from wanem bambae mifala i mas askem hem blong givim?’ ”
—Charles T. Russell, faswan presiden blong Watch Tower Society, “Wajtaoa,” Julae 15, 1915.
YUMI givim from we Jeova God i faswan blong givim. Long taem bifo, yumi no save hamas yia bifo, hem i stat blong givim, taem hem i stat blong mekem olgeta samting—faswan samting we i mekem, hemia ‘stret pikinini blong hem, wan nomo we hem i gat.’ (Jon 3:16) From lav blong hem, hem i givim laef olsem wan presen long ol narafala.
Pikinini ya blong God, Jisas Kraes, i gudfala samting we i bigwan olgeta we Jeova i givim long yumi. Be Pikinini ya blong God, hem wan, i no laswan samting we God i givim. Aposol Pol i talem se ‘presen ya blong Jeova we i gud tumas, i bitim mak olgeta’ hemia ‘gladhat blong hem we i bigfala tumas.’ (2 Korin 9:14, 15) I klia se presen ya i minim tu olgeta samting we God i mekem tru long Jisas blong soem gudfala fasin mo lav wetem kaen fasin long man blong hem. Gladhat olsem i nambawan tumas we i bitim paoa blong man blong talem se i olsem wanem. Be, i gat moa rod yet we God i stap yusum blong soem fasin blong hem blong givim.
Long taem finis, wan king i waes mo i no flas taem hem i talem se olgeta gudfala samting we hem i givim olsem ol presen oli rili blong Jeova. Hem i talem: “Olgeta samting long heven mo long wol oli blong yu. Kingdom i blong yu, O Jeova, yu we yu leftemap yu antap olsem hed blong olgeta samting. . . . Be, ?mi mi hu mo ol man blong mi oli hu, blong mifala i naf blong givim ol presen olsem hemia? Olgeta samting oli kamaot long yu, mo mifala i givim ol samting long yu we oli kamaot long prapa han blong yu nomo.”—1 Kronikel 29:11-14.
Eksampel Blong God
Jemes, wan disaepol blong Jisas Kraes, i save se Jeova God i stampa blong olgeta samting we oli gud olgeta. Ol gudfala samting nomo oli kam long hem. Jemes i raetem: “Evri samting we oli gud mo evri presen we oli nambawan oli aot long heven nomo, oli kam long yumi. God ya we i mekem olgeta laet blong skae, hem i stap givim ol gudfala samting ya long yumi. Fasin blong hem i no save jenis, mo hem i no save tanem baksaed blong hem long yumi blong livim yumi long tudak.”—Jemes 1:17.
Long saed blong fasin ya blong givim ol gudfala samting, Jemes i luk olsem wanem God i defren long ol man. Ol man oli save givim ol gudfala samting be oli no stap mekem olsem oltaem. Maet oli givim ol gudfala samting ya wetem tingting blong kasem wan samting blong olgeta nomo, no blong pulum wan man blong mekem samting we i nogud. Long saed blong Jeova ol fasin blong hem oli stap sem mak oltaem; hem i no jenis. Olsem nao, ol gudfala samting we i givim oli no jenis. Oli klin oltaem. Oli blong mekem i gud long ol man mo blong mekem olgeta oli glad oltaem. Oltaem oli soem kaen fasin blong hem mo oli blong givhan long man, neva oli blong spolem hem.
Ol Stampa Risen Blong Givim Ol Gudfala Samting
Long taem blong Jemes, ol lida blong skul we ol man oli laekem olgeta oli stap givim ol gudfala samting blong mekem ol man oli luk olgeta. Oli givim wetem wan tingting we i no stret. From we oli wantem ol man i glad long olgeta, stret rod blong olgeta i jenis. Be, olgeta Kristin, oli mas stap defren. Jisas i talem long olgeta: “Taem yu givim presen blong givhan long olgeta, i nogud yu blou pupu from, olsem we olgeta ya we oli gat tu tingting oli stap mekem. Olgeta ya oli stap talemaot ol gudfala wok blong olgeta insaed long ol haos blong prea, mo afsaed long ol open ples, blong mekem ol man oli ona long olgeta. Tru mi talem long yufala, olgeta ya oli tekem pei blong olgeta finis. Be taem yu yu givim presen long ol puaman blong givhan long olgeta, yu mas mekem, olsem we lef han blong yu i no save samting we raet han blong yu i mekem. Yu mas haedem ol gudfala wok ya blong yu long fes blong ol man olbaot. Nao Papa blong yu we i save luk ol wok ya we ol man oli no save luk, hem bambae i givim pei long yu from.”—Matyu 6:2-4.
Risen blong ol Kristin blong givim ol presen i blong halpem ol narafala blong fulumap nid blong olgeta no blong mekem olgeta i glad no blong leftemap trufala wosip. I no blong presem bigwan olgeta wanwan. Tingbaot, ae blong Jeova i save luk tru i go dip insaed long las kona blong hat blong yumi. Hem i save lukluk insaed olgeta long tingting we i pusum yumi blong givim ol gudfala samting wetem fasin sore.
Ol Wetnes blong Jeova oli traem blong folem eksampel blong Jeova mo Pikinini blong hem long fasin ya blong givim ol gudfala samting. Oli givim wanem we oli gat. Oli gat gud nyus blong Kingdom, mo oli givim samting ya we i save givim blesing long ol narafala. Oli save se Proveb 3:9 i talemaot: “Ona long Jeova wetem ol sas samting mo wetem ol faswan frut blong ol samting we yu wokem.” From we olgeta branj blong Watch Tower Society, evri kongregesen, mo wanwan man oli traehad blong mekem i gud long evriwan, ful ogenaesesen blong ol brata i strong long saed blong speret mo i karem frut. Ol samting blong bodi i no save lidim yu blong kam bigman blong speret, be ol blesing long saed blong speret oli save givim ol samting long saed blong bodi we yumi nidim blong mekem wok blong Jeova.
Ol Rod Blong Serem Samting
I gat plante rod blong olgeta man wanwan we i save givhan blong sapotem gud nyus. Wan rod, hem i long saed blong Haos Kingdom. Olgeta memba blong kongregesen oli yusum Haos Kingdom. Samfala oli bin givim mane we oli yusum blong bildim no rentem, pem laet, eakondisen, mo mane we oli nidim blong fiksimap sam samting long hem. From we kongregesen i nidim sapot blong evriwan, bokis blong putum mane i stap long Haos Kingdom, mo ol presen mane we oli kasem, oli yusum blong pem ol kaon blong kongregesen. Aot long haf presen mane we i stap, oli stap givim presen mane i go long lokol branj blong Watch Tower Society, folem disisen we kongregesen i mekem.
Presen mane i save go long branj blong Sosaeti stret blong trenem mo sapotem ol misinari mo ol spesel paenia long ol ples blong wol we gud nyus i no kasem bighaf blong ol man yet. Wan narafala rod we oli yusum mane blong mekem gud nyus i goaot i joen wetem wok blong ol elda we oli go raon. Long faswan handred yia, aposol Pol i soemaot eksampel long wok ya blong goraon, nao hem i leftemap tingting blong kongregesen long Filipae: “I no wan taem nomo we yufala i givhan long mi, taem we mi trabol long mane.” (Filipae 4:14-16) Antap long ol kaon we olgeta branj oli gat blong mekem fultaem minista wok i gohed long ol rod ya, i nidim mane blong lukaot long ol wanwan Betel haos mo olgeta we oli stap mo wok long hem. Wok blong raetem mo prentem ol buk we oli karem nambawan mesej blong gud nyus i nambawan blesing we God i givim, be i nidim tu blong seraotem ol buk ya, mo samting ya i nidim mane. Mo tu i gat ol samting blong pem blong asembli mo ol distrik asembli mo antap long ol samting ya, i gat ol kot kes we oli bin mekem blong ‘blokem ol enemi blong Kraes mo stap wetnes long gud nyus.’—Filipae 1:7.
I stap long tingting blong wanwan man blong Jeova, hamas taem oli stap spenem long wok blong talemaot gud nyus, mo samting ya i tru tu long saed blong fasin blong givim presen mane. Aposol Pol i givim advaes se oltaem i gud blong putum smol mane i stap blong yusum blong sapotem trufala wosip mo mekem i kam bigwan moa: “Nao long bisnes ya blong kleksin blong givhan long ol Kristin man . . . evri wik, long Sande, yufala evriwan i mas putumgud sam mane blong yufala i stap blong ol Kristin man ya, stret long mak blong ol mane we yufala i kasem.”—1 Korin 16:1, 2.
Taem wan man i givim mane olsem wan presen, samtaem hem i no save stret olsem wanem bambae oli yusum, be hem i luk frut blong samting ya long wok blong talemaot gud nyus blong Kingdom we i stap kam bigwan. Ol ripot blong 1993 Yearbook of Jehovah’s Witnesses i soem se moa long 4,500,000 Kristin minista oli stap talemaot gud nyus blong Kingdom long bitim moa long 200 kantri mo aelan blong solwora. Ol ripot ya oli mekem yumi harem gud long hat blong yumi. Taswe, presen mane, nating se i big wan no i smol, i stap halpem gud nyus blong i go aot long olgeta ples long wol.
Mane blong evri wan i joen blong sapotem wok ya. Sam oli naf blong givim moa, we i givhan bigwan long wok blong prij. Sam narafala oli givim smol. Be olgeta we oli givim smol nomo oli no nid blong sem no harem se presen blong olgeta i no impoten. Jeova i no tingting olsemia. Jisas i mekem samting ya i klia taem hem i soemaot olsem wanem Jeova i glad long smol mane we wido ya i givim. “Nao hem i luk wan wido i kam we hem i pua, nao hem i sakem tu smol mane we i olsem ten sen nomo. Nao Jisas i talem se: ‘Tru mi talem long yufala, kleksin we wido ya i sakem i moa long ol mane we olgeta narafala man ya oli sakem. From we ol narafala man ya, taem oli sakem kleksin blong olgeta, oli stap sakem haf mane ya nomo blong olgeta we i stap nating. Be woman ya we i pua, hem i sakem olgeta mane blong hem, we i blong pem kakae blong hem.’ ”—Luk 21:2-4.
Nating we pei blong yumi i bigwan no i smol nomo, yumi save givim long ol rod we i mekem Jeova i glad. Man blong raetem Ol Sam i talemgud olsem wanem yumi save givim ona i go long King mo Jaj blong yumi. Hem i talem: ‘Yumi presem Jeova, nem blong hem i hae we i hae; yumi karem presen i kam long haos blong hem.’ (Ol Sam 96:8) Taswe, i gud yumi folem eksampel blong fasin lav blong Papa blong yumi long heven taem yumi gat gladhat blong givim presen from we hem i givim fastaem long yumi.
[Bokis blong pija long pej 30]
OLSEM WANEM SAMFALA OLI GIVIM PRESEN MANE I GO LONG WOK BLONG TALEMAOT KINGDOM
◻ PRESEN MANE BLONG SAPOTEM WOK LONG OLGETA PLES LONG WOL: Plante oli putum gud i stap no makemaot wan stret mane we oli stap putum long bokis blong presen mane we oli raetem long hem se: “Presen mane we i blong wok blong Sosaeti long olgeta ples long wol—Matyu 24:14.” Evri manis kongregesen i sanem mane ya i go long hedkwota blong Sosaeti long ful wol long Bruklin, Nyu Yok, no i go long branj ofis we i kolosap.
◻ OL PRESEN: Ol presen mane oli save sanem i go stret long Watch Tower Bible and Tract Society of Pennsylvania, 25 Columbia Heights, Brooklyn, New York 11201, no i go long ol lokol branj ofis blong Sosaeti. Ol jen we oli mekem long ol sas samting no ol narafala sas samting tu oli save givim olsem presen. Oli mas raetem wan sot leta se hemia ol presen we oli givim nomo.
◻ PLAN WE OLI GIVIM MANE BE OLI SAVE TEKEMBAK TAEM OLI NIDIM: Oli save givim mane i go long Watch Tower Society blong holem long tras go kasem taem hemia we i givim i ded, wetem tingting ya se sipos man ya i gat nid, oli save givimbak presen mane ya we hem i givim.
◻ INSURENS: Watch Tower Society i save kasem mane blong wan polisi blong laef insurens no wan plan we man i kasem taem hem i ritae/no mane we oli givim long ol olfala. Ol man we oli wantem mekem wan plan olsem oli mas talemaot long Sosaeti.
◻ OL BANG AKAON: Ol bang akaon, stefeket blong putum mane, no wanwan akaon blong man we i finis long wok taem i olfala oli save putum long tras no mekem se oli pem long Watch Tower Society taem oli ded finis, folem ol samting we lokol bang i talem. Oli mas talemaot ol plan olsem long Sosaeti.
◻ OL STOK MO BOND: Ol stok mo bond oli save givim olsem presen i go long Watch Tower Society tu olsem wan presen nomo no folem wan plan we profit we oli winim i save go bak oltaem long hemia we i givim fastaem.
◻ GRAON MO OLTING: Ol graon oli save givim long Watch Tower Society tu olsem wan presen nomo, no folem plan we wan we i givim i save stap long hem kasem taem hem i ded. Wan man olsem i mas toktok i go long Sosaeti bifo i givim eni pepa blong graon i go long Sosaeti.
◻ OL LAS TOKTOK MO OL TRAS: Man i save raetem wan pepa folem loa we i talem se graon no mane blong hem i save go long Watch Tower Bible and Tract Society of Pennsylvania taem bambae hem i ded no Sosaeti i save kam olsem wan we i kasem ol samting long tras. Wan tras we i go long wan skul i save givhan long saed blong takis, long man we i givim tras. Wan kopi blong pepa blong las toktok no tras i mas go long Sosaeti.
Blong kasem moa save long bisnes ya, yu save raet long Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, no long ofis blong lokol branj blong Sosaeti.
[Tok Blong Pija Long Pej 31]
Olsem wanem oli yusum ol presen mane we yu givim:
1. Ol volontia long Betel
2. Bildim ol ofis blong branj
3. Pem ol samting we oli nidim long taem blong bigfala trabol
4. Ol Haos Kingdom
5. Ol misinari