“?Mi Stap Drim Ya, No Samting Ya i Tru?” — Wajtaoa LAEBRI LONG INTENET

“?Mi Stap Drim Ya, No Samting Ya i Tru?”

Ripot we i kamaot biaen hem i kam long Malawi. Hem i long saed blong Distrik Asembli ya “Ol Hapi Man Blong Presem God” we ol Wetnes blong Jeova oli bin mekem long hot taem blong 1995.

“LONG wan bigfala rod, long saed blong bigfala Lek blong Malawi, kolosap long haf rod, i gat wan saen i stap. Hemia fastaem long 29 yia we wan saen olsem i stanap. Saen ya i talem se, ‘Distrik Asembli Blong Ol Wetnes Blong Jeova.’

“Wan bigfala trak i kam stop kolosap long saen ya, mo biaen long trak ya i gat bitim 200 man we oli aot long taon blong Msusu, oli kam long asembli ya. Olgeta ya oli karem klos, blangket, sospen, baket, kakae, faeawud, mo ol Baebol blong olgeta, blong joen wetem 3,000 brata mo sista blong olgeta we oli kam long ol ples raonabaot.

“Taem mifala i stap sekhan wetem olgeta we oli kamaot long bigfala trak ya, George Chikako, we i gat 63 yia, i kamtru. Hem i stap wokbaot long sanbij wetem baskel blong hem. Hem i aot long velej blong hem, Nkotakota, i ron long baskel tu dei blong kasem ples ya. Long ol yia we oli pas, Brata Chikako i bin stap long kalabus fo taem, from we hem i no wantem brekem loa blong Baebol. Kasen blong hem i ded from we oli kilim hem tumas taem hem i stap long kalabus. Brata Chikako i askem se: “?Mi stap drim ya, no samting ya i tru? !Tingbaot, yumi stap mekem asembli ya long bigfala delaet, mo yumi singim ol singsing blong Kingdom wetem bigfala voes! Man, hamas yia finis we yumi mas mekem miting long naet nomo, mo yumi mas singsing wetem smosmol voes nomo, mo yumi no save klaphan be yumi stap rabem han blong yumi nomo blong soemaot se yumi glad long toktok we i kamaot. !Be, naoia yumi mekem miting long open ples, mo ol man oli sapraes blong luk se yumi plante, from we oli bin ting se yumi smol nomo!’

“Ples blong asembli ya, oli wokem wan fenis long gras i goraon long hem, mo oli wokem ruf blong hem long waelken, blong blokem san. Mo tu, oli wokem sam smol gras haos mo sam narafala rum blong slip we oli no blokem ol saed blong olgeta, nao ol brata we oli wokbaot longwe blong kam long asembli ya oli save slip long olgeta. Long naet, man i save harem ol naesfala voes olbaot, ol grup blong brata sista we oli stap singsing mo oli glad. Oli singsing strong from oli no moa fraet se ol man bambae oli kam mekem trabol long olgeta.

“!Asembli ya i stret nomo long olgeta ya from we hem i karem nem ya ‘Ol Hapi Man Blong Presem God’!”

[Credit Line]