Japan i Sapotem Fasin We Man i Fri Blong Wosip Olsem Hem i Wantem

PLANTE yia finis long Japan, ol yangfala studen we oli Wetnes blong Jeova, oli fesem wan strong disisen: ?Bambae oli folem tingting blong olgeta we i stanap long Baebol, no bambae oli folem program blong skul we i agensem stret tingting ya we oli gat? ?From wanem samting ya i wan problem? From we wan spot we i samting olsem judo mo karate i haf blong program blong edukesen long skul blong olgeta. Ol yangfala Wetnes ya oli harem se spot ya i no stret wetem ol rul blong Baebol, olsem hemia we i stap long Aesea japta 2, vas 4. Vas ya i talem se: “Bambae olgeta oli tekem hama, oli tanem ol naef blong faet blong olgeta oli kam aean blong brekem graon long garen, mo ol spia blong olgeta oli kam sisis blong katem han blong tri. Bambae wan nesen i no leftemap naef blong faet agens long narafala nesen, mo bambae oli no moa lanem fasin blong faet.”

Ol yangfala Kristin Wetnes ya oli no wantem lanem ol fasin blong faet, from we samting ya i mekem bodi blong narafala i soa. Ale, oli eksplenem long ol tija blong olgeta se oli no wantem joen long spot ya, from we samting ya bambae i stikim tingting blong olgeta. Afta we ol tija oli traem pulum ol studen ya blong folem program blong skul, plante tija oli kasem save long tingting blong ol studen ya. Nao oli agri blong respektem tingting ya blong olgeta, mo givim sam narafala wok long ol studen ya blong mekem.

Be, sam tija oli letem ol filing blong olgeta i kam nogud. Mo from we ol studen ya oli no joen long raf spot ya, sam skul oli givim mak we i nogud olgeta, long saed blong spot. Long 1993, i gat raonabaot naen Wetnes we oli no pas i go long nekiswan klas. Ale ol yangfala ya oli mas aot long skul ya, sipos no, skul bambae i sakemaot olgeta, from we oli no joen long spot we i mekem raf fasin long narafala.

I klia se, naoia i stret taem blong stanap strong long saed blong raet blong ol yangfala Kristin ya long skul, blong no joen long wan samting we i stikim tingting blong olgeta. Faef studen we skul i no letem olgeta i pas i go long seken klas long Kobe Munisipol Industrial Teknikol Kolej (we sotfala nem blong hem se Kobe Tek), oli mekem disisen blong tekem bisnes ya i go long kot.

Ol Poen Insaed Long Bisnes Ya

Taem ol tri oli stap putum flaoa long 1990, ol faef studen ya oli stat long Kobe Tek. Nao oli eksplenem long ol tija se oli no save joen long kendo (wan spot blong ol man Japan we tu man i faet wetem longfala naef), from bilif blong olgeta we i stanap long Baebol. Grup blong ol tija we oli lukaot long edukesen long saed blong spot, oli agensem olgeta strong, mo oli no wantem givim wan narafala spot long ol studen ya, blong oli save kasem gudfala mak long saed blong edukesen long spot. Biaen, ol studen oli no pas long eksam long saed blong spot, mo from samting ya oli mas stat bakegen long faswan klas (hemia faswan yia blong kos long haeskul). Long Epril 1991, ol studen ya oli putum bisnes ya long Distrik Kot blong Kobe. Oli talem se fasin we skul i mekem i agensem loa we i talem se man i fri blong wosip olsem we hem i wantem.a

Skul ya i talem se sipos oli givim sam narafala kos long ples blong spot ya, samting ya bambae i sem mak olsem we oli stap laekem moa wan skul i bitim ol narawan. Mo fasin ya bambae i agensem loa se ol skul oli mas mekem i sem mak nomo long olgeta studen. Antap moa, oli talem se skul i no gat naf samting mo naf tija, blong tijim wan narafala spot.

Disisen Blong Distrik Kot i Gat Paoa Long Olgeta We Oli Harem Nyus

Taem we bisnes ya i stap pas long kot, tu long ol faef studen ya oli mestem eksam blong olgeta bakegen long saed blong edukesen blong spot, mo tri narafala oli pas i go long nekis klas we kolosap oli mestem tu. Rul blong skul i talem se sipos wan studen i no kasem hae mak long skul wok blong hem, mo hem i stap long sem klas blong tu yia, skul i save sakemaot hem. From samting ya, wan long tufala studen ya i mekem disisen blong finis long skul ya bifo we skul i sakemaot hem. Be narafala studen, Kunihito Kobayashi, i no wantem lego. Taswe skul i sakemaot hem. Be, nating se Kunihito i no pas long edukesen blong spot we i kasem 48 poen nomo long hem, taem oli ademap olgeta tes blong hem wetem mak blong edukesen blong spot tu, hem i kasem 90.2 poen aot long 100. Long klas blong hem we i gat 42 studen, hem nao i kasem mak we i hae moa.

Long Febuwari 22, 1993, Distrik Kot blong Kobe i mekem disisen se Kobe Tek i win. Hem i se: “Samting we skul i mekem i no agensem loa blong kantri.” Be hem i agri se “i tru, loa blong skul se ol studen oli mas joen long spot ya kendo, i blokem ol studen smol, blong folem fasin blong wosip olsem oli wantem.”

Olsem aposol Pol long faswan handred yia, ol studen ya oli mekem disisen blong karem bisnes ya i go long kot we i hae moa. (Ol Wok 25:11, 12) Bisnes ya i go long Hae Kot blong Osaka.

Ol Studen Oli Soem Se Oli No Stap Tingbaot Olgeta Nomo

Wan man blong hae save, Tija Tetsuo Shimomura long Yunivesiti blong Tsukuba, i agri blong toktok blong givim wetnes long fored blong Hae Kot blong Osaka. From we hem i gat hae save long saed blong edukesen mo loa, hem i makem se fasin blong skul ya i soem se oli no tingbaot ol studen ya nating. Kunihito Kobayashi i talemaot filing blong hem long kot, mo tok ya we i kamaot long hat blong hem i gat paoa long ol man we oli stap long kot ya. Antap moa, long Febuwari 22, 1994, wan grup we oli kolem Kobe Ba Asosiesen, i talem se skul i mas karembak Kunihito, from we aksin blong skul ya i agensem fasin ya we Kunihito i fri blong wosip olsem hem i wantem, mo raet blong hem blong kasem edukesen.

Kolosap long taem we Hae Kot blong Osaka i mas mekem wan disisen, olgeta yangfala Kristin we oli joen long bisnes ya oli wantem tumas blong stanap strong gogo kasem en blong hem. Oli harem se oli stap traehad blong win long kot blong givhan long plante taosen yangfala Wetnes we oli stap fesem semkaen problem long ol skul long Japan. Be from we skul i no bin sakemaot ol studen ya, i luk olsem se kot i no wantem mekem disisen. Mo tu, ol studen ya oli luksave se sipos oli karemaot tok we oli bin putumap agensem skul, bambae i klia moa se skul i mekem i no stret nating taem hem i sakemaot Kunihito. Taswe, olgeta studen oli lego bisnes ya, be Kunihito nomo i gohed.

Long Desemba 22, 1994, Jif Jaj Reisuke Shimada blong Hae Kot blong Osaka, i mekem disisen we i jenisim disisen we Distrik Kot blong Kobe i bin mekem. Kot i faenem se, risen blong Kunihito blong no wantem joen long spot ya kendo, i rili kamaot long hat blong hem, mo se hem i lus bigwan from samting we hem i mekem folem bilif blong hem. Jif Jaj Shimada i talem se skul i mas gat wan narafala spot bakegen, we ol yangfala olsem oli save joen long hem. Gudfala disisen ya i mekem plante man we oli sapotem raet blong olgeta man long wol, oli glad. Be, skul i karem bisnes ya i go kasem Saprim Kot blong Japan. From samting ya, Kunihito i no save go long skul blong wan ful yia bakegen.

Long Saprim Kot

Wan store blong nyuspepa ya Kobe Shimbun i tokbaot samting ya biaen, i se: “Kobe Siti Skul mo komiti blong hem tu, oli mestem taem oli no tekem Masta Kobayashi i gobak long skul afta long samting ya [afta long disisen blong Hae Kot blong Osaka]. . . . Strong fasin blong olgeta blong agensem hem, we i blong nating nomo, i mekem se wan yangfala i mestem wan impoten haf blong yangtaem blong hem.” Be, Kobe Tek i gohed blong holem strong fasin blong olgeta long bisnes ya. From samting ya, bisnes ya i kam wan bigfala toktok long ol nyus blong kantri. Ol tija mo ol haeman long saed blong edukesen long kantri ya oli intres long bisnes ya. Disisen blong kot we i hae moa long ol narafala kot blong kantri, bambae i mekem wan loa we kantri i save folem long olgeta bisnes olsem we maet i kamaot bakegen long fyuja.

Long Janewari 17, 1995, raonabaot wan wik afta we skul i putum bisnes ya i go long Saprim Kot, graon i seksek bigwan long Kobe mo long Asiya Siti, ples ya we Kunihito mo famle blong hem oli stap long hem. Raonabaot long haf pas faef long moning ya, sam menet nomo bifo we graon i seksek, Kunihito i lego haos blong hem blong go long wok we hem i stap mekem haftaem. Hem i stap ron long baskel blong hem long rod we i pas aninit long bigfala rod we oli kolem Hansin. Taem graon i seksek bigwan, hem i stap kam kolosap long haf blong rod ya we i foldaon. Kwiktaem nomo hem i gobak long haos blong hem, mo i faenem se haf blong store haos ya i foldaon finis. Kunihito i luksave se sipos hem i bin stap long haos taem graon i seksek, bambae hem i ded. Hem i talem tangkyu long Jeova from we hem i laef i stap. Sipos hem i ded long taem ya, ating Saprim Kot bambae i no mekem disisen long saed blong spot ya kendo.

Plante taem Saprim Kot blong Japan i skelem ol bisnes blong man from ol ripot long pepa nomo, nao i jajem sipos narafala kot i bin mekem stret disisen no no gat. Sipos i no gat wan impoten risen blong jenisim disisen we narafala kot i bin tekem fastaem, ale, Saprim Kot i no lesin long tok blong ol wanwan man. Saprim Kot ya i no talemaot fastaem long tufala saed we oli joen long bisnes ya, stret taem we bambae i givimaot disisen blong hem. Taswe Kunihito i sapraes bigwan long moning blong Maj 8, 1996, taem hem i harem se Saprim Kot bambae i givimaot disisen blong hem long moning ya. Hem i glad mo i haremgud tumas long nyus ya se Saprim Kot i sapotem disisen we Hae Kot blong Osaka i mekem finis.

I gat fo jaj wetem Jaj Shinichi Kawai we hem i jeaman blong grup ya. Olgeta ya oli agri fulwan se “samting we skul i mekem i no stret nating folem ol stret rul we ol man oli akseptem. Skul ya i bitim mak blong ol samting we loa i givim raet long hem blong mekem, taswe i klia se hem i brekem loa.” Kot i agri se disisen blong Kunihito blong no wantem joen long spot ya kendo i kamaot long hat blong hem, mo i talem se: “Risen from wanem yangfala ya i no wantem joen long spot ya kendo i kamaot stret long hat blong hem, mo i joen fulwan wetem stampa blong bilif blong hem.” Saprim Kot i jajem se skul i gat rod blong givim mo i mas givim long yangfala ya, wan narafala spot blong tekem ples blong kendo, blong soem respek long bilif blong hem.

Risal Blong Bisnes Ya i Gat Bigfala Paoa

I sua se, bambae disisen ya i sapotem gud raet blong ol yangfala long skul, blong wosip olsem oli wantem. Nyuspepa ya The Japan Times i talem se: “Hemia faswan taem we Saprim Kot i mekem wan disisen long saed blong edukesen mo raet blong man blong wosip olsem hem i wantem.” Be, disisen ya i no tekemaot wok we ol studen wanwan oli gat, blong mekem prapa disisen blong olgeta we tingting blong olgeta i no jajem olgeta from, taem oli fesem sam samting we i traem bilif blong olgeta.

Tija Masayuki Uchino blong Yunivesiti blong Tsukuba, i tokbaot wan samting we i pusum ol jaj blong sapotem Kunihito, hemia se, hem i “wan studen we i traehad wetem fulhat blong hem mo we i kasem nambawan mak long skul wok blong hem.” Baebol i givim advaes ya long ol Kristin we oli kasem sam traem long bilif blong olgeta, se: “Yufala i mas mekem fasin blong yufala i stret gud long fes blong olgeta, blong bambae oli luk ol gudfala wok blong yufala. Nao long Lasdei, taem God bambae i kam blong jajem olgeta, bambae oli save leftemap nem blong God from ol gudfala wok ya blong yufala.” (1 Pita 2:​12) Taem ol yangfala Kristin we oli stanap strong long bilif blong olgeta, oli traehad blong mekem fulwan laef blong olgeta i laenap wetem ol rul blong Baebol, oli soemaot se oli naf blong kasem respek from ol fasin blong olgeta we oli stanap long Baebol.

Afta we Saprim Kot i mekem disisen ya, Kobe Tek i letem Kunihito Kobayashi i gobak long skul. Bighaf blong ol studen we oli bin statem skul wetem Kunihito bifo, oli pas finis i go long narafala skul. Naoia Kunihito i stap skul wetem ol studen we oli faef yia moa yangfala long hem. Long tingting blong plante man blong wol, hem i westem faef yia blong yangtaem blong hem. Be, fasin blong Kunihito blong obeigud long Baebol, i sas tumas long tingting blong Jeova God, mo ol samting we hem i livim blong holemstrong long God i no blong nating nomo.

[Futnot]

[Tok blong pija long pej 20]

Lefsaed: Haos blong Kunihito afta we graon i seksek

Daon: Kunihito naoia