“Yumi Evriwan i Blong Sem Famle Nomo”
LONG ol yia we oli jes pas, fasin blong agensem narafala man from skul no kala blong skin blong hem, i kasem olgeta ples blong wol. Plante faet, raf fasin, mo nogud fasin blong kilim man i ded, oli bin kamaot from we man i agensem narafala we i blong wan defren kala no laen. Grup ya we oli kolem Amnesti Intenasnal, i givim ripot ya se, long 1994, bitim 23 milyan man long olgeta ples blong wol oli mas ronwe long ples blong olgeta from we man i no respektem raet blong narafala man.
Long Ruwanda, samwe 500,000 man oli ded mo bitim 2,000,000 narafala man oli kam refuji, taem faet i kamaot bitwin ol Tutsi mo ol Hutu. Nyuspepa ya blong Beljiom, Le Soir, i talem se: “Ol man oli ronem mo kilim ol Wetnes blong Jeova moa, from we oli no wantem karem ol tul blong faet.” Ol Wetnes blong Jeova oli no joen long ol faet. Nating se i olsem, ol man oli kilim plante handred blong olgeta oli ded long ol raf fasin we i kamaot. Samting ya i mekem yumi tingbaot ol tok we Jisas i talem long ol disaepol blong hem se: “Yufala i no man blong wol ya, . . . taswe ol man blong wol oli no laekem yufala.”—Jon 15:19.
Wan famle we oli Wetnes blong Jeova—Eugène Ntabana, waef blong hem, mo tufala pikinini blong hem—oli stap laef long bigfala taon blong kantri ya, Kigali. Taem Eugène i eksplenem long ol man raonabaot long hem, from wanem ol Kristin oli no joen long faet, plante taem hem i yusum pijatok blong hanisakel (bougainvillea), wan kaen rop we i stap gru long ol kantri we oli hot.—Matyu 22:21.
Eugène i eksplenem se: “Long ples ya Kigali, hanisakel i stap givim ol defdefren kala flaoa, olsem red, ping, mo sam waet flaoa tu. Be, olgeta evriwan oli blong sem famle nomo. Samting ya i sem mak long ol man. Nating se yumi kamaot long ol defren ples, defren kala skin, no defren laen, yumi evriwan i blong sem famle nomo, hemia famle blong man.”
Sore tumas, wan nogud grup blong man we oli laekem blong mekem blad i ron, oli kilim i ded famle ya Ntabana, nating se olgeta ya oli wantem pis mo oli no joen long faet. Be oli stanap strong long bilif blong olgeta gogo oli ded. Yumi save sua se bambae Jeova God i mekem promes blong hem i kamtru long ol man olsemia, nao bambae oli laef bakegen blong stap long wol ya, taem bambae i no moa gat fasin blong agensem ol man we oli defren. (Ol Wok 24:15) Long taem ya nao, famle Ntabana, wetem ol narafala tu, bambae “oli stap long pis, mo oli gat plante samting.”—Ol Sam 37:11.