?From Wanem Yumi Mas Givim Samting Long Jeova?

ANINIT long bigfala san we i stap kilim Sarefat, wan smol taon blong Saedon, i gat wan wido woman i stap bendaon blong pikimap faeawud. Hem i mas mekem wan faea blong kukum smol kakae​—⁠maet hemia laswan kakae we hem mo yangfala boe blong hem bambae tufala i karem. Hem i bin traehad blong faenem kakae blong hem mo boe blong hem, blong tufala i no ded from hanggri, tru long wan longfala draetaem we kakae i sot. Be, naoia i luk olsem se ol traehad ya oli blong nating nomo. Maet tufala i ded from hanggri.

Wan man i kam kolosap long hem. Nem blong man ya Elaeja, mo wido woman ya i luksave kwiktaem se hem i wan profet blong Jeova. I luk olsem se woman ya i harem tok finis long saed blong God ya. Jeova i defren long god ya Bal. Wosip blong Bal we i nogud we i nogud tumas, i kavremap kantri blong hem, Saedon. Taswe, taem Elaeja i askem hem blong givim smol wora long hem blong dring, woman ya i glad blong givim. Ating hem i tingting se sipos hem i mekem olsem, bambae Jeova i glad long hem. (Matyu 10:41, 42) Be Elaeja i gohed, i askem wan narafala samting bakegen, hemia smol kakae. Woman ya i eksplenem se smol kakae we hem i gat i naf blong wan laswan kakae nomo. Be, Elaeja i gohed blong askem long woman ya. Hem i talem se bambae Jeova i mekem merikel blong givim kakae long hem gogo kasem we draetaem i finis. ?Woman ya i mekem wanem? Baebol i talem se: “Ale, woman ya i go mekem samting we Elaeja i talem.” (1 King 17:10-​15) Smol tok ya i soemaot wan aksin we i kamaot from strong bilif​—!yes, bilif we i bigwan tumas, mekem se Jisas Kraes i toktokgud long saed blong woman ya kolosap wan taosen yia biaen!​—Luk 4:​25, 26.

Be, maet i luk olsem we i narakaen blong Jeova i askem bigfala samting long wan woman we i no gat plante samting, antap moa, sipos yumi tingbaot prea we wan haeman i bin mekem samtaem bifo. Taem King Deved i hivimap ol sas samting blong givim long pikinini blong hem Solomon, blong hem i yusum blong bildim haos prea, ol man oli givim plante samting. !Long taem blong yumi, olgeta presen ya we hem i hivimap oli kasem plante bilyan vatu! Be, Deved i talem long prea blong hem long Jeova, i se: “Mi mi nating nomo, mo ol man blong mi oli nating nomo, mifala i no naf blong givim ol presen olsem hemia long yu. Olgeta samting oli kamaot long yu, mo mifala i givim ol samting long yu we oli kamaot long prapa han blong yu nomo.” (1 Kronikel 29:14) Olsem Deved i talem, olgeta samting oli blong Jeova finis. Taswe, taem yumi givim presen blong sapotem trufala wosip, i olsem we yumi stap givim long Jeova samting we i blong hem nomo. (Ol Sam 50:10) Ale, kwestin i stanap se, ?From wanem Jeova i wantem se yumi givim samting i go long hem?

Wan Impoten Haf Blong Trufala Wosip

Ansa we i isi nomo, hemia se, stat longtaem bifo olgeta, Jeova i bin luk fasin ya blong givim presen, olsem wan impoten haf blong trufala wosip. Man ya blong bilif, Ebel, i kilim sam long ol beswan sipsip blong hem blong givim olsem sakrifaes i go long Jeova. Ol olfala blong bifo olsem Noa, Ebraham, Aesak, Jekob, mo Job, oli givim ol presen olsem tu.​—Jenesis 4:4; 8:​20; 12:7; 26:25; 31:54; Job 1:5.

Loa blong Moses i givim oda long ol man, mo i makemaot tu ol presen we ol man oli mas givim long Jeova. Eksampel, ol man Isrel oli kasem oda blong givim haf blong ol samting blong olgeta, hemia wan hif blong ol ten hif blong olgeta kakae blong garen mo ol nyufala buluk mo narafala anamol we oli gat, i go long Jeova. (Namba 18:25-​28) Ol narafala presen we man i givim, Loa i no makemaot hamas ol man oli mas givim. Wan eksampel, ol man Isrel wanwan oli mas givim faswan kakae blong garen blong olgeta mo fasbon blong ol anamol blong olgeta i go long Jeova. (Eksodas 22:29, 30; 23:19) Be, Loa i letem ol man wanwan oli makemaot hamas frut blong garen no anamol we oli wantem givim. Impoten samting se oli mas givim ol beswan. Mo tu, Loa i tokbaot ol presen blong talem tangkyu mo blong mekem promes, we man i save givim sipos hem i wantem givim nomo. (Levitikas 7:​15, 16) Jeova i pulum ol man blong hem blong givim namba blong presen we oli laenap wetem namba blong ol blesing we hem i givim long olgeta. (Dutronome 16:17) Olgeta man oli givim samting we hat blong olgeta i pusum olgeta blong givim, olsem we oli bin mekem long taem blong bildim haos tapolen, mo bakegen long taem blong bildim haos prea. (Eksodas 35:21; 1 Kronikel 29:​9) !I sua se Jeova i glad tumas long ol presen ya we oli givim from we oli wantem givim nomo!

Aninit long “loa blong Kraes,” olgeta presen we man i givim, hem i mas wantem givim nomo, i no se wan man i fosem hem. (Galesia 6:2; 2 Korin 9:7) Samting ya i no minim se ol man blong Kraes oli no moa givim samting no se oli givim smol nomo. !Defren olgeta! Taem Jisas mo ol man blong hem oli stap prij long Isrel, wan grup blong ol woman i stap folem olgeta, mo oli stap yusum ol samting we oli gat blong givhan long olgeta. (Luk 8:​1-3) Long sem fasin, aposol Pol i kasem sam presen we oli halpem hem long misinari wok blong hem. Mo hem i leftemap tingting blong sam kongregesena blong givim smol mane tu, long ol narafala we oli sot long sam samting. (2 Korin 8:​14; Filipae 1:​3-5) Hed kampani long Jerusalem i putumap sam gudfala man, blong seremaot ol samting we ol brata oli givim, long olgeta we oli gat nid. (Ol Wok 6:​2-4) I klia se, ol faswan Kristin oli luk se fasin ya blong givim presen i olsem wan gudfala rod blong sapotem trufala wosip.

Be, maet yumi stap tingting yet se, ?from wanem Jeova i talem se fasin blong givim presen i olsem wan haf blong wosip long hem? Tingbaot fofala risen ya.

From Wanem Yumi Givim

Faswan samting, Jeova i talem se fasin ya blong givim presen i olsem wan haf blong trufala wosip, from we fasin ya i mekem i gud long yumi. Fasin ya i soemaot klia se yumi gat tangkyu long gudfala kaen fasin blong God. Tingbaot: Sipos wan pikinini i pem no i givim wan presen long papa no mama blong hem, ?from wanem papa no mama ya i glad tumas? ?Hemia from we presen ya i wan samting we papa no mama i nidim tumas, mo we hem i no naf blong pem? Ating no gat. Papa no mama ya i glad tumas blong luk se pikinini blong hem i stap wokem gudfala tingting no fasin blong talem tangkyu mo givim presen. From semfala risen ya, Jeova i wantem se yumi givim presen, mo hem i glad tumas taem yumi mekem olsem. Hemia rod blong soemaot long hem se yumi gat bigfala tangkyu long nambawan kaen fasin blong hem, mo fasin blong hem blong givim plante samting long yumi. Hem i man ya we i stap givim “evri samting we oli gud mo evri presen we oli nambawan.” Taswe yumi neva save finis blong talem tangkyu long hem. (Jemes 1:​17) Antap long olgeta samting ya, Jeova i givim prapa Pikinini blong hem, we hem i laekem tumas, mo i letem hem i ded blong bambae yumi save kasem laef we i no save finis. (Jon 3:​16) ?I gat rod blong talem tangkyu we i bigwan naf, from wan presen olsem?

Namba tu samting, sipos yumi givim presen oltaem, yumi stap lanem blong folem fasin blong Jeova mo Pikinini blong hem, Jisas Kraes, long wan rod we i impoten tumas. Jeova i stap givim presen oltaem, mo oltaem hem i gat gladhat blong givim. Olsem Baebol i talem, hem i stap givim long yumi, ‘laef, win we yumi pulum, mo olgeta narafala samting.’ (Ol Wok 17:25) I stret nomo we yumi talem tangkyu long hem from evri win we yumi pulum, from olgeta kakae we yumi haremgud long hem, mo from evri menet blong laef we yumi glad long hem mo we i gat mining. (Ol Wok 14:17) Jisas tu i gat fasin blong givim presen, olsem Papa blong hem. Jisas i givim paoa mo taem blong hem fulwan. ?Yu yu save se taem Jisas i mekem merikel, hem i lusum sam samting? Sam vas blong Baebol oli talem se taem hem i mekem ol sikman oli kamgud bakegen, paoa i ‘aot long hem.’ (Luk 6:​19; 8:​45, 46) Fasin ya blong Jisas blong givim presen i bigwan we i bigwan, mekem se hem i givim prapa sol blong hem, laef blong hem, blong ded.​—Aesea 53:12.

Taswe, taem yumi givim wan samting, maet taem no paoa blong yumi, no sam sas samting blong yumi, yumi stap folem eksampel blong Jeova, mo yumi mekem hat blong hem i glad. (Proveb 27:11; Efesas 5:1) Mo tu, yumi folem nambawan eksampel we Jisas Kraes i soem long yumi, long saed blong ol stret fasin blong folem long laef.​—1 Pita 2:​21.

Namba tri samting, fasin blong givim presen i fulumap sam bigfala nid we oli impoten. Tru tumas, i isi nomo long Jeova blong fulumap ol nid long saed blong wok blong Kingdom, hem i no nidim we yumi halpem hem. I sem mak olsem we hem i save mekem ol ston oli singaot, sipos hem i no wantem yusum yumi blong talemaot tok blong hem. (Luk 19:40) Be hem i jusum blong ona long yumi taem hem i letem yumi blong mekem gudfala wok ya. Taswe, taem yumi givim ol samting we yumi gat blong givhan long wok blong Kingdom, yumi save haremgud, from we yumi save se yumi stap givhan long wok we i impoten moa bitim ol narafala wok long wol.​—Matyu 24:14.

Yumi evriwan i save finis se i nidim mane blong givhan long wok blong ol Wetnes blong Jeova raonabaot long wol. Long sevis yia blong 1995, Sosaeti i spenem kolosap 60 milyan dola (6 bilyan vatu) blong lukaot nomo long ol spesel paenia, ol misinari, mo ol elda we oli goraon long ol kongregesen, long wok blong prij we oli mekem. Be, mane ya i smol nomo taem yumi skelem wetem mane blong bildim ol hedkwota mo faktri blong prentem ol buk raon long wol. !Ol wok ya i save gohed nomo from ol presen mane we ol man oli givim!

Ol man blong Jeova wanwan, oli no gat tingting ya se sipos oli no gat plante mane, bambae oli letem ol narafala nomo oli givim presen. Tingting olsem i save lidim yumi blong mestem wan haf blong wosip blong yumi. Olsem aposol Pol i talem, ol Kristin blong Masedonia “oli puaman tru.” Be nating, oli askem bakegen mo bakegen sipos oli save joen long blesing ya blong givim presen. !Mo Pol i talem klia se, samting we oli givim i ‘bitim mak blong mane blong olgeta’!​—2 Korin 8:​1-4.

Namba fo samting, Jeova i mekem se fasin blong givim presen i wan haf blong trufala wosip, from we fasin ya blong givim presen i halpem yumi blong stap glad. Jisas hem wan i bin talem se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Jeova i wokem yumi olsem ya. Hemia i wan narafala risen bakegen, from wanem yumi save harem se nomata hamas samting we yumi givim long hem, bambae i no naf blong soem bigfala tangkyu we yumi gat long hem long hat blong yumi. Be, yumi glad se Jeova i no askem long yumi blong givim moa i bitim samting we yumi naf blong givim. !Yumi save sua se bambae hem i haremgud tumas taem yumi glad blong givim samting we yumi naf blong givim!​—2 Korin 8:​12; 9:7.

Ol Blesing Oli Kamaot From Fasin Blong Givim Presen

Tingbaot eksampel we yumi bin tokbaot fastaem. ?Olsem wanem sipos wido woman ya blong Sarefat i mekem eskyus se wan narafala man i save givim kakae we Elaeja i nidim. !Bambae hem i mestem wan nambawan blesing!

I klia se, Jeova i stap blesem ol man we oli soemaot se oli glad blong givim presen. (Proveb 11:25) Wido woman blong Sarefat i no kasem hadtaem from we hem i givim kakae ya we hem i ting se hemia laswan kakae blong hem. Jeova i blesem hem tru long wan merikel. Olsem Elaeja i bin promes, hem i gat flaoa mo oel we i naf long hem, gogo kasem we draetaem i finis. Be wido ya i kasem wan blesing we i bigwan moa tu. Taem pikinini boe blong hem i sik mo i ded, Elaeja, man blong trufala God, i mekem boe ya i laef bakegen. !Ating samting ya i rili mekem woman ya i strong gud long saed blong speret!​—1 King 17:⁠16-​24.

Tede, yumi no mas tingting se bambae yumi kasem ol blesing tru long ol merikel. (1 Korin 13:8) Be Jeova i promes blong givhan long olgeta we oli mekem wok blong hem wetem fulwan laef blong olgeta. (Matyu 6:​33) Taswe, yumi save mekem samting ya olsem wido blong Sarefat. Yumi save givim presen wetem gladhat, from we yumi save se bambae Jeova i lukaot long yumi. Mo tu, yumi save haremgud long plante gudfala blesing long saed blong speret. I gud we yumi givim presen oltaem folem wan program, bitim we yumi givim sam samtaem nomo, taem wan tingting i kasem yumi nao yumi givim. Samting ya bambae i halpem yumi blong mekem ae blong yumi i kliagud we i lukluk i go nomo long wok blong Kingdom, olsem Jisas i bin talem long yumi blong mekem. (Luk 11:34; skelem wetem 1 Korin 16:​1, 2.) Samting ya bambae i halpem yumi tu, blong harem se yumi stap kolosap moa long Jeova mo Jisas, olsem ol man blong wok wetem tufala. (1 Korin 3:9) Mo bambae i mekem se gudfala fasin ya blong givim presen wetem gladhat, we i makemaot ol man blong Jeova long olgeta ples blong wol, i kam bigwan moa.

[Futnot]

[Bokis blong pija long pej 31]

OL ROD WE SAMFALA OLI JUSUM BLONG GIVIM PRESEN

PRESEN MANE BLONG GIVHAN LONG WOK LONG OLGETA PLES BLONG WOL

Plante man oli makemaot no mekem plan blong stret mane we bambae oli putum long bokis blong presen mane, we oli raetem long hem se: “Presen Mane Blong Wok Blong Sosaeti Long Olgeta Ples blong Wol​—Matyu 24:14.” Evri manis ol kongregesen oli sanem mane ya i go long hedkwota blong wol long Bruklin, Nyu Yok, no long branj ofis blong kantri blong olgeta.

Mo tu, yu save sanem ol presen mane i go long ofis blong Sosaeti we i lukaot long kantri blong yu. Ol gol jen mo sas ston mo ol narafala sas samting, yu save givim tu olsem presen. Yu mas sanem wan sotfala leta i go wetem presen ya blong talemaot se yu givim samting ya olsem wan presen nomo.

PRESEN MANE WE MAN I SAVE KASEMBAK SIPOS I NIDIM

Man i save givim mane long Watch Tower Society blong oli kipim go kasem we man ya i ded, be sipos hem i nidim mane ya, bambae Sosaeti i givimbak long hem. Blong kasem moa save long saed ya, plis raet i go long branj ofis we i lukaot long kantri blong yu.

PLAN WE MAN I FOLEM BLONG GIVIM PRESEN

Antap long ol presen mane we man i save givim stret, mo mane we hem i save kasembak sipos i nidim, i gat sam narafala rod blong givim presen we oli save givhan long wok blong Kingdom long olgeta ples blong wol. Sam long olgeta ya hemia:

Insurens: Man i save mekem se Watch Tower Society i kasem mane blong wan laef insurens, no mane blong pem yia blong hem taem i ritae long wok, no mane we sam kampani oli givim long ol olfala. Sipos wan man i wantem folem wan plan olsem, hem i mas talemaot long Sosaeti.

Ol Bang Akaon: Man i save mekem se bang i holem mane blong bang akaon blong hem, ol stefeket blong putum mane long bang, no ol akaon blong hem taem i ritae, gogo Sosaeti i nidim. Sipos no, hem i save mekem se mane ya i go long Watch Tower Sosaeti taem hem i ded, folem ol rul blong bang long ples blong hem. Sipos wan man i wantem folem wan plan olsem, hem i mas talemaot long Sosaeti.

Ol Stok mo Bon: Man i save givim stok mo bon long Watch Tower Society olsem presen nomo, no folem wan plan we ol profit blong ol stok mo bon ya oli stap go oltaem long man we i givim.

Graon no Haos: Man i save givim graon no haos blong hem i go olsem presen long Watch Tower Society, blong oli salem biaen. Sipos no, man i save folem plan se Sosaeti i kasem haos no graon ya taem hem i ded, be man ya i save gohed blong stap long haos ya long fulwan laef blong hem. Man i mas toktok wetem Sosaeti bifo we hem i givim graon no haos blong hem long Sosaeti.

Lastok Blong Man Bifo We Hem i Ded Mo Plan Blong Holem Mane i Stap Kasem Ded: Man i save givim graon no haos no mane blong hem long Watch Tower Society taem hem i raetem wan pepa folem loa, we i olsem lastok blong hem bifo we hem i ded. Sipos no, bang i save holem mane ya i stap blong i go long Sosaeti taem man ya i ded. Mane we bang i holem blong givhan long wan skul, maet man i no nidim blong pem takis long hem. Man we i wantem se bang i holem mane blong hem i stap blong Sosaeti, hem i mas sanem kopi blong promes ya no lastok blong hem long Sosaeti.

Ol man we oli intres long eniwan long olgeta plan ya blong givim presen, oli mas raetem leta i go long ofis blong Sosaeti we i lukaot long kantri blong yu.