“Wan Nambawan Presen We Jeova i Givim”

WAJTAOA blong Mei 1, 1996, i eksplenemgud fasin blong ol Kristin blong no joen long ami, mo olsem wanem blong skelem ol wok we yumi mas mekem i go long Jeova, mo long “Sisa.” (Matyu 22:21) Plante man oli bin talemaot tangkyu from ol nyufala save ya we i kamaot. Leta we i kam biaen i wan long olgeta ya. Wan Wetnes blong Gris i raetem leta ya i kam long Hed Kampani blong ol Wetnes blong Jeova:

“Mi wantem talemaot bigfala tangkyu long yufala ol gudfala brata, from we yufala i lukaotgud long mifala long saed blong speret. Mi bin stap naen yia long kalabus from Kristin bilif blong mi. Taswe, mi glad tumas long ol nambawan save we i stap long Wajtaoa blong Mei 1, 1996. (Aesea 2:4) Hemia wan nambawan presen we Jeova i givim.​—Jemes 1:​17.

“Taem mi stap ridim mo haremgud long Wajtaoa ya, mi tingbaot tok blong wan narafala Wajtaoa we i kamaot samtaem bifo (Ogis 1, 1994, pej 14): ‘I klia nomo, fasin blong no mekem i strong tumas long narafala i wan nambawan fasin, wan fasin we i pusum yumi blong gat moa lav long Jeova.’ Yes, ol brata, mi tangkyu long Jeova se mi mi stap insaed long ogenaesesen blong hem we i kaengud mo i gat lav, mo we i soemaot waes blong hem i klia nomo.​—Jemes 3:​17.

“Ol brata long ples ya long Gris, oli glad tumas blong kasem nyufala save ya long Wajtaoa blong Mei 1. Antap moa, olgeta we oli bin stap long kalabus blong plante yia, mo sam narafala we oli stap yet long kalabus, from bilif blong olgeta. Tangkyu bakegen. Bambae Jeova i givim speret blong hem long yufala, blong yufala i gat paoa blong gohed blong givim ol impoten kakae long saed blong speret long mifala, long taem ya we laef i fulap tumas long trabol.”