“Yufala i Jenisim Tingting Blong Mi Long Saed Blong Ol Witnes Blong Jeova”

HEMIA tok we wan haeman blong kalabus long Polan, i talem taem hem i ridim Wajtaoa blong Oktoba 15, 1998, we i tokbaot wok blong ol Witnes blong Jeova. Nem blong atikol ya se, “Taem Ol Man We Hat Blong Olgeta i Olsem Ston Oli Jenis.” Hem i tokbaot gudfala frut we ol Witnes blong Jeova oli kasem, taem oli wok wetem ol presina blong Wolow, long Polan.

Bifo we Wajtaoa we yumi tokbaot antap, i kamaot long pablik, oli mekem wan spesel miting long Septemba 13, 1998, wetem ol presina long kalabus blong Wolow, blong oli save ridim magasin ya fastaem. Long olgeta we oli kam long miting ya, i gat sam Witnes we oli blong ples ya, ol presina we oli baptaes finis, ol presina we oli gat intres long trutok, mo sam haeman blong kalabus. Haf we i kam biaen, i givim toktok blong sam long olgeta we oli bin stap long miting ya.

Jerzy i wan Witnes blong Jeova we i tekem baptaes long kalabus, bitim faef yia bifo. Hem i talem se: “Mi glad tumas from we tede mi save ridim toktok ya we i soemaot olsem wanem ol brata blong ol kongregesen we oli stap klosap long mifala, oli traehad blong givhan long mifala.” Hem i gohed se: “Mi traehad blong mekem fasin blong mi i kamgud moa, mo mi luk se Jeova i stap trenem mo tijim mi.”

Wan narafala presina we nem blong hem Zdzislaw, i talem tok ya long saed blong wok we ol Witnes blong Jeova oli mekem long kalabus, se: “Naoia, fo presina oli rere blong tekem baptaes, mo ol niuwan we oli soem intres, oli gohed blong joenem ol miting long haos kingdom blong mifala. Atikol ya i givim paoa long mifala blong mekem moa wok long ples ya.” !Zdzislaw i rili soemaot wan gudfala tingting, taem yumi tingbaot se hem i mas spenem 19 yia yet long kalabus!

Wan haeman blong kalabus, we i ridim atikol ya long saed blong kalabus long Wolow, hem i talem se: “Hemia wan ona we mifala i kasem. Mi neva ting se wan buk bambae i save talem ol gudfala toktok long saed blong kalabus ya long 130 lanwis long wol. Mi laekem yufala, mo mi tangkiu long ol traehad blong yufala blong halpem ol presina.” Wan narafala haeman i talem se: “Yufala i jenisim tingting blong mi long saed blong ol Witnes blong Jeova. Fastaem, mi stap luk yufala olsem wan skul we i krangke. Nao mi luksave se yufala i man blong folem rul.”

Marek Gajos, we i daerekta blong kalabus blong Wolow, i smael mo i talem se: “Fastaem mifala i ting se bambae yufala i mekem smol wok nomo. Mifala i ting se yufala i olsem ol narafala skul, we oli gat strong tingting blong stretem ol presina nomo wetem ol tijing blong Baebol. Be taem mifala i luk risal we wok blong yufala i karem long stat blong hem nomo, mifala i mekem disisen blong givhan moa long yufala. Yufala i gohed oltaem blong kam long ples ya gogo kasem naen yia nao, mo mi glad tumas long bigfala wok we yufala i bin mekem.”

?Olsem wanem long ol narafala man we oli stap long kalabus blong Wolow, taem oli kasem atikol ya? Ol presina oli soem bigfala intres, mekem se ol Witnes oli seremaot olgeta magasin we oli gat. Ol haeman blong kalabus tu, oli soem intres, taswe oli askem 40 kopi moa, antap long ol kopi we oli kasem finis. From we plante man oli askem ol kopi blong magasin ya, ol kongregesen we oli stap raonabaot long kalabus ya, oli givhan taem oli givim 100 kopi moa long ol brata blong kalabus ya. Long semtaem, namba blong ol man we oli joen long ol miting i kam antap.

Piotr, wan haeman blong kalabus we i givhan plante long ol Witnes blong Jeova, i talem se: “Mifala i hangem atikol ya long notisbod blong kalabus ya blong soemaot long olgeta we oli kam visitim kalabus ya. Mifala i hop se olgeta presina we oli no stadi Baebol yet wetem yufala, bambae oli save ridim magasin ya.”

Gudfala eksampel mo strong tingting blong ol Witnes long wok blong prij, i gohed blong karem gudfala frut. Antap long 15 presina we oli tekem baptaes finis, i gat 2 haeman blong kalabus we oli givim laef blong tufala i go long Jeova. Mo wan narafala haeman blong kalabus i askem blong stadi Baebol. Tru ya ol brata we oli prij long kalabus blong Wolow, oli luksave se sipos oli kasem gudfala frut long wok ya, hemia from we Jeova i blesem olgeta.​—Skelem wetem 1 Korin 3:6, 7.

[Tok Blong Pija Long Pej 28]

Trifala witnes mo wan presina long taem we oli soem magasin ya long rum blong stadi long kalabus