Ansa Long Wan Kwestin
◼ ?Wanem sam samting blong lukaot long hem taem yumi prij long ol presina?
Raon long wol i gat samting olsem eit milian presina. Sam long olgeta ya oli soem intres long gud nius. (1 Tim. 2:4) Wan branj ofis i kasem samting olsem 1,400 leta evri manis we ol presina no famle blong olgeta, oli raetem i kam blong askem buk no blong man i go visitim olgeta. Ol samting we i hapen finis oli soemaot se, plante long olgeta ya oli rili intres, be i gat sam we oli giaman nomo from we oli wantem yusum ol man blong God blong kasem samting. From risen ya nao, yumi evriwan i mas folem ol advaes ya we oli kam biaen, taem yumi prij long ol presina.
Plante taem, yumi raetem leta blong prij long ol presina. Mifala i talem strong se ol sista oli no mas raetem leta i go long ol presina we oli man, nating sipos sista i wantem givhan nomo long presina ya long saed blong spirit. Wok ya i mas stap long han blong ol brata nomo we oli gat ekspiriens. Ol sista we oli gat ekspiriens oli save raetem leta i go long ol woman presina we oli rili intres long ol trutok blong Baebol. Yumi no mas sanem mane no presen i go long ol presina, nating se maet oli askem samting long yumi.
Taem wan presina i soem intres, yumi mas sanem nem blong hem mo adres blong kalabus, i go long kongregesen we i lukaot long teritori we kalabus ya i stap long hem. Plante taem, ol brata we oli gat ekspiriens oli save wanem blong mekem long saed ya. Sipos yumi no save wanem kongregesen we i lukaot long kalabus ya, ale yumi mas sanem ol save ya i go long branj ofis.
I no rong we ol brata oli holem miting wetem sam presina blong mekem stadi wetem plante blong olgeta wantaem. Be yumi no mas mekem ol narafala spesel samting long kalabus we i givim janis long ol brata blong storian mo joen plante wetem ol presina. Antap long hemia, i no waes nating we wan pablisa i visitim wan kalabus folem prapa tingting blong hem nomo, mo ol brata oli no mekem gud plan fastaem, ale i stat frengud wetem ol presina.
Yes, taem yumi talemaot gud nius long ol presina, i gud yumi ‘waes long ol trik, olsem snek, be yumi kwaet man tu, olsem sotleg.’—Mat. 10:16.