Ripot Long Wok Blong Kingdom

Sakem Sid Blong Kingdom Long Evri Jans We Yumi Gat

TOK blong God, Baebol, i leftemap fasin blong wok strong. King Solomon i talem se: “Long moning, sakem sid blong yu, mo go kasem naet, yu no mas letem han blong yu i spel; from we yu no save weples bambae oli save gru, long ples ya no longwe, no long tufala ples ya tugeta.”​—Eklesiastis 11:6.

Long evri jans we i stret, ol Wetnes blong Jeova oli sakem “sid,” taem oli talemaot gud nyus blong Kingdom blong God. Long bitim 230 kantri mo aelan, “oli stap tijim ol man, mo oli stap talemaot gud nyus ya blong Jisas, se hem i Mesaea.” (Ol Wok 5:​42) Ol store we oli kam biaen, oli soemaot olsem wanem ol Wetnes blong Jeova oli ‘no letem han blong olgeta i spel’ long wok blong prij.

◻ Long Ripablik blong Kep Ved, wan Wetnes blong Jeova i pas kolosap long wan kalabus taem hem i stap prij. Long yad blong kalabus ya, sam presina oli stap antap long wan tri. Oli luk Wetnes ya mo oli singaot long hem blong givim sam buk long olgeta. Wetnes ya i fasem sam Wajtaoa mo Wekap long wan ston, mo hem i sakem olgeta oli go insaed long yad blong kalabus. Risal we i kamaot se, 12 blong ol man ya we oli soem intres fastaem, oli stat stadi Baebol. Naoia, tri long ol presina ya oli givim laef blong olgeta long God finis, mo oli tekem baptaes long wora. Wan long olgeta i kam fultaem paenia bitim wan yia finis nao. Be, ?olsem wanem oli mekem wok blong prij insaed long kalabus? Fastaem, oli seraotem kalabus long ol defren teritori. Biaen, oli givim wanwan teritori long trifala Wetnes ya, ale trifala i go long olgeta rum blong kalabus wanwan. Ol man ya blong talemaot Kingdom oli gobak long ol man we oli intres, olsem ol Wetnes blong Jeova oli stap mekem long olgeta ples blong wol​—oli mekem ol visit. Wan samting nomo we i no sem mak long kalabus ya, hemia se, hamas taem oli mekem Baebol stadi evri wik. Oli no stadi Baebol wan no tu taem long wan wik blong wan haoa, !be sam presina oli stadi evri dei! Mo tu, man we i lukaot long kalabus i givim raet long ol Wetnes blong mekem olgeta miting blong kongregesena insaed long kalabus.

◻ Wan woman long Potugal i kasem sam buk blong Watch Tower Sosaeti we bubu woman blong hem i livim long hem taem hem i ded. Woman ya i no wan Wetnes blong Jeova, taswe hem i no intres blong holem ol buk ya. Be hem i no wantem spolem olgeta tu. Wan dei, taem wan Wetnes blong Jeova i kam long haos blong hem long wok blong prij, hem i tokbaot ol buk blong bubu blong hem. Wetnes ya i askem hem sipos hem i save ol gudfala samting we oli stap insaed long ol buk ya. Woman ya i ansa se: “Mi talem tru, mi no rili save sipos ol buk ya oli gat ol gudfala samting insaed long olgeta, be ?olsem wanem mi save faenemaot ol samting ya?” Woman ya i agri blong stadi Baebol, mo i no longtaem biaen, hem i luksave se ol buk blong bubu blong hem oli gud tumas. Naoia, hem tu i baptaes finis olsem wan Wetnes blong Jeova. Antap long hemia, gel blong hem wetem wan gudfala fren blong famle oli stap stadi Baebol tu. !I olsem we woman ya i kasem wan samting we i sas tumas, taem hem i kasem ol buk ya!

[Futnot]