Seremaot Wajtaoa Long Mei
1 Tok blong eksplenem wok blong Wajtaoa oltaem i stap long pej 2 blong hem. ?Yumi mas mekem wanem wok blong i laenap wetem wok blong Wajtaoa nao yumi save givhan long plante man? Long manis Mei, bambae yumi traehad blong leftemap tingting blong ol man we oli soem intres long mesej blong Kingdom blong oli ridim Wajtaoa oltaem.
2 Yumi save talem long wan man we hem i talem se hem i wan Kristin se:
◼ “Mifala i stap askem ol man raonabaot long mifala wan kwestin mo mifala i wantem save tingting blong yu long hem. ?Taem Jisas i tijim yumi blong prea from Kingdom blong God blong i kam mo blong wil blong God i kamaot long wol olsem we i kamaot long heven finis, yu rili ting se wil blong God bambae i kamaot long wol ya?” Letem hem i ansa, mo yu openem Baebol i go long Aesea 55:10, 11 mo askem man blong haos blong hem i luksave olsem wanem ol promes blong God bambae oli kamtru.—rs, p. 12, namba tu fastok aninit long haf ya “Kingdom.”
3 Maet yu save gohed blong talem se:
◼ “Wan long olgeta wok blong magasin ya Wajtaoa i blong pulum tingting blong ol man long ol profet tok blong Baebol we oli stap kamtru. Traem luk long haf ya.” Nao pulum tingting blong hem long faswan haf blong Wajtaoa Mei 1, “1914—Yia We i Mekem Ol Man Blong Wol Oli Sek” mo talem se: “Maet yu save ting se, ‘?From wanem yumi mas intres long 1914?’ Makem tok long haf 2 we i tokbaot 1914 mo Wajtaoa.” Nao ridim haf ya.
4 Yu mas glad taem yu askem sabskripsen, yu save eksplenem ol blesing we man i save kasem from sabskripsen. Man blong haos i save kasem magasin oltaem. Sipos hem i no akseptem sabskripsen yu save seremaot ol magasin we yumi kasem i no longtaem.
5 Sipos yu wantem storeyan moa wetem hem, yu save yusum sem tok ya blong tokbaot Revelesen 21:3-5 tu, olsem we i stap long Reasoning buk.
Nao, afta we yu ridim Aesea 55:10, 11, yu save talem se:
◼ “Wan gudfala profet tok long saed blong plan blong God long wol ya bambae i no longtaem i kamtru. Samting ya bambae i save mekem laef blong yu mo laef blong mi oli defren. Traem lesin long wanem i stap long Revelesen 21:3-5.” Nao yu save ridim ol vas ya mo storeyan long ol blesing we bambae oli kamaot aninit long Kingdom rul blong God. Soemaot olsem wanem Wajtaoa i talemaot gavman ya we bambae i kamaot.
Maet yu save talem se:
◼ “Magasin ya blong Mei 1 i tokbaot “?Bambae Hu i Kasem Sef Long ‘Hadtaem’?” Bambae i givhan long yu blong luk olsem wanem yu save laef long nyufala wol we stret fasin nomo bambae i stap long hem aninit long Kingdom blong God we yumi ridim long Revelesen 21.”
6 Yusum Wajtaoa Olsem Wan Rod Blong Statem Baebol Stadi: Mak blong yumi blong kasem se yumi wantem givhan long ol narafala man blong oli lanem trutok, nao olgeta tu oli save kam man blong wok blong Jeova mo joen long wok blong talemaot Kingdom blong hem. Taswe, taem yumi faenem ol man we oli intres, yumi wantem raetemdaon nem blong olgeta blong yumi save visitim olgeta kwiktaem.
7 Taem yumi stap talemaot trutok long ol narafala man wetem help blong Wajtaoa, i gud se yumi askem Jeova blong i lidim yumi long wok ya, blong yumi save faenem mo givim kakae long ol man we oli olsem sipsip.—Jon 21:15-17.