Yusum Ol Magasin Blong Yumi Long Ol Haos Wanwan
1 Stampa tingting blong Wekap! i klia long tok we i stap long pej 4 blong ol wanwan namba: “Nyuspepa ya i pulum ol man blong trastem promes blong God blong wokem wan nyufala wol we pis mo seftaem nomo bambae i stap long hem. Mo hem i promes se ol man we oli bin luk ol samting we oli kamaot long yia 1914, bambae oli no lus evriwan, samfala bambae oli luk nyufala wol ya taem hem i kamtru.” !Tru tumas i nidim blong seremaot fulap magasin olsem long wok blong prij long ol haos wanwan!
2 Wekap! i wan gudfala rod blong wekemap intres blong ol man we maet oli no intres tumas long ol samting long saed blong speret. Taem yu ridim ol wanwan namba, traem faenem sam gud poen we bambae yu serem wetem ol narafala. Samfala pablisa oli makem sam samting long prapa kopi blong olgeta, mo bifo oli go long wok blong prij wetem magasin ya, oli luk bakegen ol samting we oli makem blong oli save gat sam stret poen long tingting blong olgeta blong tokbaot wetem ol man blong haos.
3 Maet yumi save jusum blong statem tok blong yumi taem yumi tokbaot wan poen long Wekap! we yumi stap seremaot.
Sipos man blong haos i soem intres, yumi save soem magasin mo talem se:
◼ “Wekap! ya i tokbaot moa long poen ya.” Nao ridim wan no tu fultoktok we yu jusum finis, mo gohed olsem se: “From we i luk olsem se yu intres long poen ya, ?yu wantem ridim haf ya mo ol narafala haf we oli stap long Wekap! ya? Sipos i olsem, mi mi glad blong livim wetem fren blong hem Wajtaoa, long yu long wan kontribusen blong 60 vatu.”
4 Sipos man blong haos i soem intres long ol samting blong speret, yumi save tokbaot sam tok blong Baebol, olsem 2 Timote 3:1-5 long saed blong lasdei. Afta long hemia, blong wekemap intres blong hem long ol magasin blong yumi, yumi save ridim stret long pej 2 long wan nyufala Wajtaoa we i jes kamaot haf ya we i stat olsem: “Stampa tingting blong Wajtaoa.” Afta, yu save askem hem blong karem tufala nyu namba blong Wajtaoa mo Wekap!
5 Long sam teritori we ol man oli intres long sam kaen skul, i moa gud blong no tokbaot ol magasin, maet yu save talem se:
◼ “Long komuniti ya, mifala i faenem plante man we oli stap long ol defren skul we ol skul ya oli defren long hemia blong mifala. Ol man oli folem plante defren rod blong lukaot God. [Ridim Ol Wok 17:26, 27.] ?Yu yu agri se ol man oli stap folem nomo skul blong papa mama blong olgeta be oli no lukaot God olgeta nomo? [Wet long ansa.] Hemia nao poen we i stap long faswan japta blong buk ya, Mankind’s Search for God. [Talem ol bigfala toktok long paragraf 12 long pej 8.] Lanem moa long saed long ol nara skul i givim save mo tijim yumi. Buk ya i eksplenem stat, fasin, mo ol tijing blong bigfala skul long wol.” Sipos i gat i naf taem, soem lis blong ol japta mo wan no tu eksampel we oli stap long buk long man blong haos.
6 Taem yumi go long ol haos wanwan, yumi mas tingbaot se yumi gat tu nambawan tul long wol blong halpem ol man blong gru long saed blong speret, Wajtaoa mo Wekap! Yumi mas wok blong wekemap intres blong ol man blong haos long ol magasin ya mo holem jans blong seremaot olgeta.