Yusumgud Ol Magasin Long Wok Blong Prij
1, 2. ?Olsem wanem Wajtaoa mo Wekap! i bin gat paoa long laef blong sam man?
1 “Hem i [pulum] intres blong man, i kamaot long stret taem, mo i leftemap tingting.” “Ol magasin ya oli leftemap tingting blong man i bitim eni narafala magasin we mi bin ridim.” Ol tok ya oli soemaot tingting we ol man raon long wol oli gat long saed blong Wajtaoa mo Wekap! Yes, ol magasin blong yumi oli olsem ol gudfala tul blong kasem “olgeta man” wetem gud nius.—1 Tim. 2:4.
2 Wan bisnes man i karem wan Wekap! we i tokbaot samting we hem i intres long hem. Biaen, hem i ridim Wajtaoa we i stap wetem Wekap! ya. Wan haf blong Wajtaoa ya i pulum hem blong jekemgud bilif blong Triniti, we hem i bilif long hem long ful laef blong hem. Samting ya i pulum intres blong hem. Sikis manis biaen, hem i tekem baptaes. I gat wan narafala man we oltaem i tekem ol magasin, be hem i neva ridim olgeta. Waef blong hem we oltaem i ronwe taem ol Witnes oli kam, hem nao i stap ridim ol magasin we man blong hem i karem. Ol promes blong Baebol long saed blong paradaes long wol ya we bambae ol stret man oli stap long hem, i tajem hat blong woman ya. I no longtaem afta, woman ya, boe blong hem, mo sista blong woman ya trifala i kam ol man blong mekem wok blong Jeova.
3. ?From wanem i gud blong seremaot tufala magasin ya Wajtaoa mo Wekap! wantaem?
3 Givimaot Wajtaoa Mo Wekap! Wantaem: Ol stori ya oli soemaot se yumi no save hu bambae i ridim ol magasin blong yumi, mo wanem samting we bambae i wekemap intres blong olgeta. (Pri. 11:6) Taswe, i gud we yumi seremaot tufala magasin ya, Wajtaoa mo Wekap! wantaem, nating sipos yumi tokbaot wan nomo long tufala. Samtaem, maet i gud blong soemaot plante defren magasin long wan man.
4. ?Olsem wanem yumi save putum wok blong seremaot ol magasin i stap insaed long program blong yumi blong evri wik?
4 I gud sipos yumi makemaot wan dei long evri wik blong joen long wok blong seremaot magasin. Long kalenda blong ol Witnes blong Jeova blong yia 2005, oli makem evri Sarede se hem i “Dei Blong Magasin.” I tru se ples blong yumi mo laef blong yumi wanwan i defdefren, taswe maet samfala oli jusum wan narafala dei blong oli seremaot ol magasin. ?Olsem wanem? ?Yu yu putum wok ya i stap insaed long program blong yu blong evri wik?
5. ?Yumi mas tekem janis wetaem blong seremaot ol magasin, mo wanem samting i save givhan long yumi blong mekem olsem?
5 Putum Wan Mak: Sipos yumi putum wan stret namba blong magasin we bambae yumi seremaot evri manis, hemia i save halpem yumi blong traehad blong seremaot moa magasin. ?Yu yu gat wan rod magasin? ?Yu yu soemaot magasin long ol man we yu mitim long wok blong prij? ?Yu save seremaot magasin taem yu prij long ol rod, long ol stoa mo ofis, mo long ol pablik ples? ?Yu yu stap karem magasin wetem yu taem yu mekem trip i go long wan narafala ples, taem yu go long stoa, mo taem yu mas wet blong luk wan dokta no wet long wan narafala ofis? Yumi mas yusumgud evri janis we yumi gat blong seremaot Wajtaoa mo Wekap! we i save givhan long ol narafala.
6. ?Olsem wanem yumi save yusumgud ol olfala magasin?
6 Maet yumi save putum mak tu blong seremaot ol olfala magasin we yumi gat. Nating sipos ol magasin ya oli olfala olsem wan manis no tu, be ol save we i stap insaed i impoten yet. Seremaot olgeta long ol man we oli intres. Long tingting blong plante milian man, ol Wajtaoa mo Wekap! oli olsem wan “tok . . . long prapa taem blong hem.” (Prov. 25:11, NW ) Yumi mas yusum olgeta blong givhan long plante moa milian man blong oli save long Jeova mo mekem wok blong hem.