Yusum Gud Ol Wajtaoa Mo Wekap!
1 Ol Wajtaoa mo Wekap! oli olsem wan sas samting, oli save givhan long ol man bitim ol narafala samting we oli stap ridim tede. ?From wanem? From ol trutok long saed blong speret oli save gat paoa blong olwe long laef blong ol man long rod we i gud tumas. Be, plante man oli no stap tingting fulwan long ol nid blong olgeta long saed blong speret, no oli no save weples blong lukluk blong kasem ol samting we oli nidim. Hem i wan jans blong yumi blong folem rod blong aposol Pol, taem yumi halpem ol man blong openem ae blong olgeta long saed blong speret.—Mat. 5:3; Ol Wok 26:18.
2 Gat Positif Tingting Mo Rere Gud: Sam man we oli olsem ol sipsip long teritori blong yufala, we oli save akseptem trutok. Sam long olgeta maet oli nidim nomo we yumi leftemap tingting blong olgeta blong ridim ol magasin. From samting ya, taem yu givimaot magasin, yu mas gat strong tingting mo fasin blong pulum man blong ridim ol Wajtaoa mo Wekap! Karem plante magasin wetem yu mo tekem evri jans blong seremaot olgeta, nating se long taem ya yumi stap seremaot ol narafala buk.
3 ?Wanem samting i save mekem se yumi save seremaot moa magasin? Faswan samting, yumi wanwan i mas luksave se ol magasin ya oli gud mo impoten tumas. Yumi mas save gud ol poen ya we i stap insaed long ol magasin ya we bambae yumi stap seremaot olgeta, mo samting ya bambae i mekem se yumi save gat strong tingting mo yumi wantem givimaot olgeta magasin ya. Taem yu ridim olgeta fastaem, yu mas lukaot ol poen we yu save yusum long minista wok blong yu. Askem yu wan: ‘?Poen ya i stret wetem wanem kaen man? ?Maet wan woman we i mared, no wan yangfala man, no maet wan bisnes man i save laekem? ?Maet poen ya i go stret long wan studen, no long wan mared man, no maet long wan man we i stap tingbaot fasin ya blong sakem doti long wora mo graon?’ Blong seremaot plante magasin, yumi mas talem ol gudfala toktok blong leftemap ol magasin ya, mo ol toktok ya i mas stanap long save we yumi wanwan i kasem long ol magasin ya mo fasin blong yumi blong laekem olgeta.
4 Yusum Gud Ol Olfala Magasin: Tingbaot, ol Wajtaoa mo Wekap! oli no lusum ol sas samting insaed long olgeta, nating sipos yumi no bin givimaot long wan manis no tu manis biaen we yumi kasem olgeta. Ol toktok we oli stap insaed oli impoten yet nating se taem blong hem i pas finis, mo yumi no mas stop blong givimaot ol magasin ya, sipos oli stap gud yet. Sipos yumi letem ol olfala magasin ya oli hif i stap, mo yumi no stap yusum olgeta, samting ya i soemaot se yumi no gat fasin tangkyu from nambawan tul ya. Wanwan long ol magasin ya i stap givim ol trutok we i save mekem man i luksave nid blong ol kakae long saed blong speret mo givim kakae ya we hem i wantem long hem. No putum long wan saed ol olfala magasin mo fogetem olgeta, i moa gud blong traehad blong givimaot olgeta long ol man we oli intres, no livim olgeta long ol haos we i no gat man, long wan ples we i no open ples tumas.
5 Magasin ya Wekap! hem i halpem plante man finis we oli no intres tumas long ol samting long saed blong speret blong oli tingtinggud long ol nid blong olgeta long saed blong speret. Wajtaoa hem i olsem wan nambawan tul we ol man blong Jeova oli gat blong givimaot ol kakae long saed blong speret. Tufala magasin ya oli joengud tugeta, mo oli mekem wan bigfala wok blong talemaot gud nyus.
6 Taem yumi tekem evri jans blong seremaot ol magasin, yumi save gat strong tingting se ol tok we oli stap insaed oli gat paoa blong fulumap ol nid long saed blong speret blong ol man we oli olsem sipsip. Yumi mas holem positif tingting, rere gud, mo stap oltaem long minista wok. Yumi ol pablisa blong gud nyus, yumi evriwan i mas gohed gud oltaem blong yusumgud magasin ya Wajtaoa mo Wekap!