Ol Magasin Oli Talemaot Kingdom
1 Ol man oli save se ol Wetnes blong Jeova oli strong blong talemaot Kingdom blong God. Wajtaoa mo Wekap! we yumi stap seremaot, oli givhan bigwan long plante milyan man blong oli kasem save long stampa tingting blong God. Tok we i stap insaed long tufala magasin ya i gud nyus, from we i talemaot se Kingdom blong God long heven, hem nomo i hop blong ol man.
2 Tufala magasin ya oli tokbaot samting we ol man oli rili nidim long saed long—ol filing, fasin blong laef, mo wosip. Long ful wol, ol man oli no moa tinghae long famle laef mo ol gudfala fasin. Wajtaoa mo Wekap! oli givhan long laef blong ol man, from we oli eksplenem olsem wanem oli save folem ol rul blong Baebol long laef blong olgeta. Long manis Epril mo Mei, yumi glad blong soemaot tufala magasin ya mo askem ol man blong mekem sabskripsen.
3 Oli Pulum Intres: Wajtaoa mo Wekap! oli stap kamaot long kolosap olgeta lanwis we ol man long wol oli toktok. From samting ya, plante man oli savegud ol magasin ya. Hemia sam risen from wanem plante man oli laekem olgeta:
◼ From we oli tok stret mo tru, oli soemaot klia wanem fasin i gud mo wanem i nogud.
◼ Oli givim hop blong wan paradaes long fyuja we i gat stret fasin long hem. Hop ya i stanap long promes blong God se Kingdom blong hem bambae i rulum wol.
◼ Oli tokbaot plante samting we oli laenap wetem taem blong yumi, taswe ol man long olgeta kastom mo kantri oli laekem olgeta.
◼ Olgeta tok long ol magasin ya oli kliagud, oli tijim man, oli tru, oli no agensem sam man no grup blong man from we oli defren long plante narafala man, mo oli no jenisim trutok blong sapotem wan narafala tingting.
◼ Ol pija oli pulum ae blong ol man mo mekem olgeta oli intres kwiktaem. Mo fasin blong raetem ol tok i klia nomo, mekem se i isi blong ridim ol magasin.
4 Givimaot Plante: Blong givimaot plante magasin, fastaem yumi mas mekemrere gud ol tok blong yumi, yumi mas makemaot taem blong yumi, mo folem wan gudfala plan long wok blong prij. Gudfala advaes i stap long Kingdom Wok Blong Yumi blong Septemba 1995 mo Oktoba 1996, mo i gud we yumi lukluk bakegen long save ya mo yusum.
5 Yumi Mas Savegud Ol Magasin: Taem yu stap ridim wan magasin, tingbaot hu i save intres long magasin ya. Makem sam tok no sam vas we yu save yusum long storeyan blong yu. Tingbaot wan kwestin we yu save askem blong statem wan storeyan mo blong pulum man blong intres long magasin ya.
6 Jenisim Storeyan Blong Yu Blong Mekem i Stret Long Ol Wanwan Man: Mekemrere wan isi tok we yu save jenisim blong mekem i stret long wan man, wan woman, wan olfala, yangfala, nating se hem i wan man we yu save hem finis no wan strenja.
7 Stap Rere Oltaem Blong Givimaot Wajtaoa Mo Wekap! From we ol magasin oli no bigwan tumas yumi save karem sam wetem yumi long wan smol basket, paos, no long poket blong yumi nomo, taem yumi wokbaot, no taem yumi go long stoa. Mo tu, yu save givim sam long famle blong yu, long ol man we oli stap long ol haos kolosap long yu, long ol man we oli wok wetem yu, long ol fren blong yu long skul, mo long ol tija. Putum wan stret dei evri wik, blong seremaot ol magasin.
8 Soem Fasin Tangkyu From Ol Magasin: Ol save insaed long ol magasin oli stapgud oltaem nomo. Ol yia we oli stap pas oli no mekem se tok we i stap long ol magasin i no moa impoten. Be i tru se sipos yumi traehad blong givimaot ol magasin we yumi kasem, i sua se i no gat plante olfala magasin we oli stap slip long haos.
9 Tekem Jans Blong Prij i Wan Gudfala Rod: Hem i nambawan rod blong seremaot plante magasin long ol man. Sam pablisa oli prij long ol ples we plante man oli pas long hem blong go long maket no stoa.
10 Prij Long Ol Stoa i Karem Frut: Prij long ol stoa i no sem mak long prij long ol haos, from we long ol stoa, i no gat problem ya se sam man oli no stap. Bighaf blong ol bisnesman oli kaengud, mo plante oli glad blong karem ol magasin. Soem wan haf blong magasin we i stret long kaen stoa we yu stap prij long hem.
11 Ol Rod Magasin Oli Karem Frut: From we ol magasin oli stap kamaot tu taem long wan manis, i gud blong gobak long ol man we oli ridim ol magasin ya blong karem ol nyufala magasin long olgeta. Yumi mas gobak oltaem, i no blong givim ol magasin nomo, be tu, blong mekem intres we oli gat long Baebol i gru. Ol rod magasin oli save kam wan nambawan rod blong statem ol Baebol stadi.
12 Mekem Moa Long Epril Mo Mei: I gat plante milyan man we oli laekem mo oli bilif long ol tok long Wajtaoa mo Wekap! Tufala magasin ya oli gudfala tul blong talemaot Kingdom ya, taswe yumi mas tingbaot oltaem blong karem olgeta ya oli go wetem yumi mo givimaot olgeta long evri ples. I gud sipos yumi seremaot fulap magasin long manis Epril mo Mei.