Jusum Ol Haf Blong Magasin We Oli Stret Long Intres Blong Ol Man
1 Ol man blong sut wetem bonara oli luklukgud mak we oli wantem kasem wetem ol ara blong olgeta. Long sem fasin, plante pablisa mo paenia long ol kongregesen, oli stap kasem nambawan frut taem oli jusum ol haf long Wajtaoa mo Wekap! we oli stret long intres blong ol man. Oli tingbaot fastaem se, ol wanwan haf blong magasin oli stret long wanem kaen man. ?Be, olsem wanem oli mekem samting ya?
2 Fas samting se, oli ridim evri magasin fulwan. Nao oli stap tingting se, ?wanem kaen man i save intres long ol wanwan haf blong magasin ya? Afta, oli go visitim ol man we oli ting se bambae oli laekem ol haf blong magasin ya. Taem oli ting se wan haf blong magasin we bambae i kamaot i no longtaem i save pulum intres blong plante man, ale oli mekem oda blong kasem moa long ol magasin ya.
3 Plante Man Oli Respektem Ol Magasin Blong Yumi: Wan man blong Naejeria we i gat sabskripsen blong Wekap! i wok blong wan intenasnal magasin we ol man oli stap ridim i bitim ol narafala magasin long Naejeria. Long saed long Wekap! hem i talem se: “Mifala i wantem talem tangkyu long yufala from magasin ya we i nambawan long wol, long saed blong ol samting we ol man oli intres long hem.” Wan man we i laekem tumas blong ridim Wajtaoa mo Wekap! i talem se: “!Tru, oli fulap long ol sas ston blong waes! Mi save faenem enikaen save we mi intres long hem, insaed long ol magasin ya.”
4 Ol Wajtaoa mo Wekap! oli tokbaot plante defren samting olsem, Baebol, wanem i stap hapen long wol, ol wari long famle, ol problem long laef blong ol man, histri, sayens, ol anamol mo flaoa. Hemia i samfala samting nomo we oli stap tokbaot. I sua se man i intres moa blong ridim save we i laenap wetem samting we hem i nidim, laef blong hem, mo wok blong hem. Yumi tok wetem plante man we oli laekem ol defren samting mo fesem ol defren problem. Taswe, sipos yumi jusum wan stret haf blong magasin we i laenapgud wetem laef blong olgeta, hemia i save karem gudfala frut.
5 Tingbaot wanem i hapen taem tu Wetnes oli givim Wekap! blong Septemba 8, 1996, long wan man we i raetem ol store long nyuspepa. Man ya i raetem se: “Bifo we mi gat jans blong talem long tufala se mi no intres, wan long tufala i talem se: ‘I gat wan haf long saed long ol Indian blong Amerika. Mitufala i save se yu bin raetem plante store long saed ya.’ ” Man ya i karem magasin ya mo taem hem i stap dring ti, hem i ridim store ya long saed long ol Indian. Afta, hem i agri se “ol tok ya i nambawan mo i tru we i tru.”
6 ?Ol Man Long Ples Blong Yu Oli Intres Long Wanem? ?Yu yu luk wanem tok long ol magasin long ol manis we oli jes pas, we i save pulum intres blong wan man we i lukaot long stoa, wan bisnesman, man we i stap long wan haos kolosap long yu, ol man we yu wok wetem olgeta, mo ol fren blong yu long skul? ?Wanem haf long magasin i save pulum intres blong wan loea, tija, man we i givim advaes long saed long famle, advaes long ol pikinini long skul, advaes long ol yangfala, ol man we oli wok blong givhan long ol narafala we oli trabol, mo ol dokta? Sipos yu stap tingbaot ol defren kaen man long ples blong yu taem yu stap ridim ol magasin, bambae hemia i givhan long yu blong faenem ol nambawan rod blong seremaot trutok.
7 Taem yu faenem wan man we i intres tumas long wan Wajtaoa no Wekap! nao hem i karem magasin ya, maet yu talem long hem, se: “Sipos i gat wan haf long nekis magasin we bambae mi ting se yu save intres long hem, mi mi glad blong karem i kam long yu.” Maet yu save ademap nem blong man ya long rod magasin blong yu, mo yu save visitim hem sam samtaem wetem ol nyufala magasin. Hemia nao samting we plante oli bin mekem blong pulum ol man blong letem olgeta oli kambak wetem ol magasin we wan haf blong olgeta i stret long intres blong ol man ya.
8 Traehad Blong Lidim Man Blong Tokbaot Baebol: Sam yia bifo, wan man we i tingting tumas long wok blong hem, i karem wan Wekap! from we hem i intres long wan haf blong hem. Be man ya we i strong long skul blong hem, i ridim Wajtaoa tu we i stap wetem Wekap! ya. I gat wan haf insaed long Wajtaoa ya, we i pusum man ya blong skelem tijing long saed blong Triniti we hem i bin bilif long hem long ful laef blong hem. !Sikis manis afta, hem i tekem baptaes! Taswe, yu no mas fraet blong pulum ol man we oli ridim magasin blong yumi, blong tokbaot ol samting long saed long Baebol. Yu save soemaot buklet ya ?Wanem samting we God i Wantem Yumi Blong Mekem? mo askem man ya sipos hem i gat smoltaem blong tokbaot wan japta evri taem we yu karem ol nyufala magasin oli kam long hem.
9 Traem tingbaot sam visit blong yu mo sam bisnesman we yu save olgeta, we maet oli laekem blong ridim ol nyufala Wajtaoa mo Wekap! Nao traehad blong karem ol magasin ya oli go long olgeta. Traem kasem plante man wetem ol nambawan magasin ya. Mo yu no mas fogetem se, taem yu stap wok strong blong pulum moa man blong ridim ol magasin blong yumi, yu stap ‘sakem bred blong yu i go long wora.’ Long fyuja, maet yu save faenem sam man we bambae oli kam ol nyufala disaepol.—Ekles. 11:1, 6.