Wajtaoa Mo Wekap!​—⁠Tufala Magasin Blong Trutok Long Stret Taem

‘Yu bin sevem mi, O Jeova God ya blong trutok.’​—⁠OL SAM 31:⁠5.

1, 2. (a) ?Wanem filing blong wan sista long samting we hem i ridim long Wajtaoa? (b) ?Wanem ol kwestin we oli stap askem long saed blong ol magasin blong mifala?

WAN Kristin sista i raetem se, “Tangkyu tumas from nambawan advaes long atikol ya blong Wajtaoa, ‘Yu Save Haremgud Long Taem Blong Trabol.’a Plante poen we yufala i tokbaot oli stret gud long ol filing we mi gat; i olsem se yufala i raetem atikol ya i kam stret long mi. Fastaem we mi ridim, ol wora blong ae blong mi oli ron. !I gud tumas blong save se i gat samfala oli kasem save filing blong mi! Mi glad tumas blong stap olsem wan long ol Wetnes blong Jeova. !I no gat wan narafala ples we yumi save faenem promes blong laef we i no save finis long Paradaes we bambae i kamtru i no longtaem mo, naoia we i mekem yumi haremgud! Tangkyu tumas. Wan milyan taem tangkyu tumas.”

² ?Yu bin harem olsem samtaem? ?Samtaem yu stap tingting se wan haf long Wajtaoa no fren blong hem, Wekap! magasin, oli raetem i stret long yu? ?Wanem samting long saed blong ol magasin blong yumi we i tajem hat blong ol man? ?Olsem wanem yumi save givhan long ol narafala blong haremgud from mesej blong sevem laef we i stap long tufala magasin ya?​—⁠1 Timote 4:⁠16.

Ol Magasin We Oli Leftemap Trutok

3. ?Wanem gudfala risen we i mekem se Wajtaoa mo Wekap! magasin i tajem hat blong plante man we oli ridim?

³ Jeova i ‘God ya blong trutok.’ (Ol Sam 31:⁠5) Tok blong hem, Baebol, i wan buk blong trutok. (Jon 17:17) Ol man we hat blong olgeta i stret oli lesin long trutok. (Lukluk Jon 4:​23, 24.) Wan risen we i mekem se Wajtaoa mo Wekap! magasin i bin tajem hat blong plante milyan man we oli ridim, hemia se ol tok blong tufala oli stret mo oli tru. Olsem nao, kwestin long saed blong fasin ya blong holem strong long ol trutok blong Baebol i mekem se oli stat blong prentem Wajtaoa.

4, 5. (a) ?Wanem samting we i mekem se C. T. Russell i stat blong prentem Watch Tower? (b) ?Olsem wanem ‘slef we i stret mo waes’ i yusum Wajtaoa magasin?

⁴ Long 1876, Charles T. Russell i bin joengud wetem Nelson H. Barbour, blong Rojesta, Nyu Yok. Russell i givim mane blong statem bakegen wok blong prentem magasin ya Herald of the Morning, we i stap kamaot oltaem long skul blong Barbour. Barbour i lidim wok ya blong raetem mo Russell i namba tu long hem. Be, samwe long wan yia haf biaen, long kopi blong Ogis 1878 blong Herald, Barbour i raetem wan atikol we i daonem praes blong sakrifaes blong Kraes we i pemaot ol man. Russell, we i kolosap 30 yia yangfala moa long Barbour, i ansa long wan atikol long nekis kopi blong magasin ya we i leftemap ransom, we hem i tokbaot olsem “wan long ol impoten tijing long tok blong God.” (Matyu 20:28) Afta we Russell i traehad blong mekem plante toktok wetem Barbour long saed blong Baebol, Russell i mekem disisen blong no moa joen long Herald. Stat wetem kopi blong Jun 1879 blong magasin ya, nem blong Russell i no moa kamaot olsem namba tu man blong raetem ol tok blong magasin ya. Wan manis biaen, Russell we i gat 27 yia i stat blong prentem magasin ya, Zion’s Watch Tower and Herald of Christ’s Presence (naoia Wajtaoa i Talemaot Kingdom Blong Jeova), we long stat hem i bin leftemap ol trutok blong Baebol, olsem hemia blong ransom.

⁵ Long ol 114 yia we oli pas, Wajtaoa magasin, olsem wan loea we i gat gudhan, i tok long saed blong ol trutok blong Baebol mo ol tijing blong hem i stap olsem wan samting blong protektem ol trutok mo tijing blong Baebol. From samting ya, magasin ya i bin mekem se plante milyan man we oli ridim hem oli bilif. Hem i strong yet blong sapotem ransom. (Eksampel, lukluk Wajtaoa blong Febuwari 15, 1991.) Mo hem i stap yet olsem wan impoten tul blong ‘slef we i stret mo waes’ mo Hed Kampani blong hem blong talemaot Kingdom blong Jeova we i stanap finis mo blong givim kakae long saed blong speret ‘long stret taem blong hem.’​—⁠Matyu 24:​14, 45.

6, 7. ?Wanem bigfala plan blong magasin ya The Golden Age, mo wanem i soem se ol man we oli stap tingtinggud oli harem mesej blong hem?

⁶ ?Olsem wanem long Wekap! magasin? Long stat blong hem, Wekap! tu i bin leftemap trutok. Fastaem, nem blong hem The Golden Age, oli wokem magasin ya blong seremaot long pablik. Long saed blong plan blong magasin ya, faswan namba, Oktoba 1, 1919, i talem se: “Plan blong hem i blong eksplenem wetem laet blong waes blong God, trufala mining blong bigfala samting we bambae i kamaot long taem blong yumi. Mo blong pruvum long olgeta we oli stap tingting gud wetem strong pruf mo i mekem man i bilif se taem blong bigfala blesing blong olgeta man i kolosap nao.” Ol man we oli stap tingtinggud oli akseptem mesej blong magasin ya The Golden Age. Long sam yia, oli seremaot plante moa kopi blong magasin ya bitim hemia blong Wajtaoa.b

⁷ Be, Wajtaoa mo Wekap! magasin tufala i go moa long fasin blong talemaot nomo ol trufala tijing mo eksplenem ol impoten profet tok long fasin blong wol ya. Antap moa long laswan ten no twante yia we oli pas, ol magasin blong mifala oli bin tajem hat blong ol man from wan narafala risen.

Ol Atikol Long Stret Taem We Oli Gat Paoa Long Laef Blong Ol Man

8. ?Jud i raet blong stretem wanem samting, hem i talem long ol man we oli ridim leta blong hem blong oli agensem wanem samting ya insaed long kongregesen?

⁸ Samwe long 30 yia afta we Jisas Kraes i ded mo i laef bakegen, Jud, man ya blong raetem Baebol i fesem wan hadtaem. Ol man we oli gat rabis fasin, ol man we oli gat fasin olsem blong anamol nomo oli bin haed i kam insaed long medel blong ol Kristin. Jud i gat strong tingting blong raet long ol Kristin brata sista long saed blong wan stampa tijing​—⁠rod blong sef we ol tabu Kristin oli gat. Be, wetem tabu speret we i lidim hem, hem i luk se i stret blong talem long ol man we oli ridim leta blong hem se oli mas agensem ol kruked fasin insaed long kongregesen. (Jud 3, 4, 19-23) Blong stretem trabol ya, Jud i givim advaes long stret taem we i stret long ol nid blong ol Kristin brata blong hem.

9. ?I nidim wanem long fasin blong putum ol atikol long ol magasin blong yumi long stret taem blong hem?

⁹ Mo tu, fasin blong mekemrere ol atikol long ol magasin blong yumi long stret taem blong hem i wan bigfala responsabiliti. Ol taem oli stap jenis, mo fasin blong man tu i stap jenis​—⁠ol nid mo intres blong olgeta oli no sem mak long ol ten no twante yia we oli pas. I no longtaem wan elda blong goraon i talem se: “Taem mi kam wan Wetnes biaen long 1950, fasin blong stadi Baebol wetem ol man i stanap long fasin ya blong tijim stampa bilif​—⁠tijim olgeta long trutok long saed blong Triniti, helfaea, sol, mo ol narafala tijing bakegen. Be naoia, i luk olsem, se i gat plante problem mo hadtaem long laef blong ol man mekem se mifala i mas tijim olgeta long rod we oli save folem long laef.” ?From wanem i olsem?

10. ?From wanem yumi no mas sapraes se fasin blong laef blong ol man i bin foldaon bigwan stat long 1914?

¹⁰ Long saed “blong Lasdei,” Baebol i talem se: “Ol man nogud, mo ol man blong gyaman oli save gohed moa yet, bambae oli save gyaman moa long ol man, mo bambae olgeta tu oli save bilif long ol gyaman tok blong olgeta.” (2 Timote 3:​1, 13) From samting ya, yumi no sapraes se fasin blong laef blong ol man i bin foldaon bigwan stat long yia 1914, taem ya we lasdei blong wol i stat. Setan, we naoia taem blong hem i sot moa bitim bifo, i stap mekem kros blong hem i kasem grup blong ol man naoia bitim bifo. (Revelesen 12:​9, 12) Frut we i kamaot se, tingting mo ol gudfala fasin blong famle oli jenis i kam defren olgeta long fasin we oli gat long ol 30 no 40 yia bifo. Bighaf blong man oli no moa gat strong tingting long skul olsem ol man long ol yia we oli jes pas. Fasin blong brekem loa i go antap bigwan mekem se ol man oli stap folem ol woning we oli no bin harem long ol 20 no 30 yia we oli jes pas.​—⁠Matyu 24:⁠12.

11. (a) ?Wanem samting i stap long tingting blong ol man, mo olsem wanem grup blong slef we i stret mo waes i givhan long olgeta? (b) Givim wan eksampel long wan atikol blong Wajtaoa no wan Wekap! we i bin gat paoa long laef blong yu.

¹¹ Ale, yumi no sapraes se plante man oli stap tingting tumas long trabol long saed blong filing, sosaeti blong man mo famle. Grup ya blong slef we i stret mo waes i bin wok strong blong prentem ol atikol long Wajtaoa mo Wekap! long stret taem blong hem we ol man oli rili nidim mo i kasem stret ol samting long laef blong olgeta. Tingbaot sam eksampel.

12. (a) ?From wanem oli rere blong prentem ol atikol long saed blong ol famle we hasban no waef nomo i stap, long Wajtaoa 1980? (b) ?Olsem wanem wan sista i soem fasin tangkyu blong hem long wan atikol long saed blong ol famle we hasban no waef i stap olgeta nomo?

¹² Magasin long saed blong famle. Taem wol ripot i soem se namba blong ol famle we hasban no waef i stap olgeta nomo i stap go antap kwiktaem, oli mekem rere ol atikol blong Wajtaoa blong Septemba 15, 1980, we i tokbaot nyufala stampa tok ya “Ol Famle We Hasban no Waef i Stap Hem Wan​—⁠Winim Problem ya.” Ol atikol ya oli gat tu plan: (1) blong givhan long ol hasban no waef we oli stap olgeta nomo blong winim ol defren problem we oli fesem mo (2) blong givhan long ol narafala blong gat moa save blong soem ‘filing long narafala’ mo blong ‘lukaot’ long ol famle we ol hasban no waef oli stap olgeta nomo. (1 Pita 3:⁠8; Jemes 1:27) Plante man we oli ridim oli raetem leta blong talem tangkyu from ol atikol ya. Wan waef we hasban blong hem i no stap i raetem se, “Ol wora blong ae blong mi oli ron taem mi luk skin blong magasin ya, mo taem mi openem mo mi ridim, hat blong mi i fulap gud wetem fasin tangkyu long Jeova from save we hem i givim long taem ya we mi rili nidim.”

13. ?Oli prentem wanem tok long tingting we i foldaon insaed long Wekap! long 1981, mo wan we i ridim i talem wanem?

¹³ Magasin long saed blong filing. Wajtaoa mo Wekap! magasin oli bin tokbaot poen ya long saed blong tingting we i foldaon stat long ol yia biaen long 1960. (1 Tesalonaeka 5:14) Be long skin blong Wekap! blong Septemba 8, 1981, i gat wan poen we i nyufala mo i nambawan se “!Yu Save Winim Tingting We i Foldaon!” I no longtaem plante man raonabaot long wol oli raetem leta i go long Watch Tower Society blong talem tangkyu long olgeta. Wan sista i raetem se, “?Olsem wanem mi save talem ol filing long hat blong mi long leta? Mi gat 24 yia, mo long ol ten yia we oli pas, plante taem tingting blong mi i foldaon. Be naoia mi harem se mi stap kolosap moa long Jeova mo mi harem gud tumas se hem i stap yusum ol nambawan atikol ya blong givhan long olgeta we tingting blong olgeta i foldaon, mo mi wantem talemaot samting ya long yufala.”

14, 15 (a) ?Olsem wanem ol magasin blong yumi oli bin tokbaot fasin blong mekem nogud long pikinini? (b) ?Wanem atikol long magasin i gat paoa long wan man blong ron long hos long Ostrelya?

¹⁴ Magasin we i laenap long grup blong man. Baebol i talem se “long taem blong Lasdei . . . bambae ol man oli save tingbaot olgeta nomo, . . . oli no man blong sore, . . . oli man blong lusum hed, mo oli wael olgeta. Bambae oli no wantem ol fasin ya we i gud nomo, oli agens long hem.” (2 Timote 3:​1-3) From samting ya, yumi no sapraes se namba blong ol pikinini we oli stap mekem nogud long olgeta i kam antap bigwan tede. Atikol ya “Halpem Olgeta We Wan Memba Blong Famle Nomo i Mekem Nogud Long Olgeta” we i stap long Wajtaoa blong Oktoba 1, 1983, i givim stret advaes long poen ya. Eit yia biaen, store ya “Winim Trabol Blong Pikinini We Oli Mekem Nogud Long Hem Long Saed Blong Seks” we i stap long skin blong Wekap! blong Oktoba 8, 1991, oli mekem blong givim save mo hop long ol pikinini we oli mekem nogud long olgeta mo tu i givim save long ol narafala blong givim help we i save wok. Long histri blong tufala magasin ya blong mifala, ol man we oli ridim ol atikol long ol poen ya, oli haremgud tumas. Wan man we i ridim i raetem se: “Samting we i bigwan moa we i mekem mi mi harem gud, hemia ol gudfala tok blong leftemap tingting mo ol vas blong Baebol we oli stap long ol atikol ya. Mi glad tumas blong save se Jeova i no fogetem mi. Mo tu mi haremgud tumas blong save se mi mi no stap mi wan.”

¹⁵ Wan man blong ron long hos long Melbon, Ostrelya, i telefon long wan longfala ples i go long ofis blong Watch Tower Society long Sidne, blong talemaot trabol blong hem long ples blong resis long hos. Hem i talem se hem i jes ridim Wekap! magasin blong Maj 8, 1993, we oli tokbaot fasin blong fosem woman mo hem i no bin ting se i gat wan nambawan magasin olsem i stap. Hem i tekem 30 menet blong askem kwestin mo hem i glad tumas blong harem ol ansa. ?Olsem wanem long yu? ?Wan spesel haf blong wan atikol we oli prentem long Wajtaoa no Wekap! magasin i bin gat paoa long laef blong yu? Sipos yes, i tru se yu gat bigfala fasin tangkyu long ol magasin blong mifala.

16. ?Olsem wanem yu save soem fasin tangkyu blong yu long ol magasin blong mifala?

¹⁶ ?Olsem wanem yu save soemaot fasin tangkyu blong yu? Yes hemia taem yu wan yu stap ridim ol wanwan namba blong ol magasin ya. Mo taem yu joen bigwan moa blong seremaot ol nambawan magasin ya. ?Olsem wanem yu save mekem samting ya?

!Serem Wetem Ol Narafala!

17. ?Ol kongregesen oli save mekem wanem blong leftemap fasin blong seremaot ol magasin?

¹⁷ Fastaem, i gat wan samting we wanwan kongregesen i save mekem. Informant (naoia Kingdom Wok Blong Yumi) blong Oktoba 1952 i talem se: “Nambawan rod blong givimaot ol magasin hemia, long ol haos wanwan mo long ol stoa wanwan. Taswe Sosaeti i talem se ol rod ya oli mas stap oltaem olsem wan haf blong wok blong seremaot magasin long ol dei blong seremaot magasin.” Tede advaes ya i gud yet. Ol kongregesen oli save mekem wan plan blong putumap Dei blong Magasin we i stap oltaem, wan dei we oli putumap blong seremaot magasin nomo. Long plante kongregesen, ol Sarede oli ol gudfala taem. Yes, i gud wanwan kongregesen i putumap sam spesel dei no aftenun blong seremaot magasin​—⁠long ol haos wanwan, long ol stoa wanwan, long rod, mo long ol man we yumi stap karem magasin i go long olgeta oltaem. Antap moa, ?yu, olsem wan man blong talemaot Kingdom, yu save mekem wanem blong givhan blong seremaot moa magasin?

18, 19. (a) ?Olsem wanem fasin blong savegud Wajtaoa mo Wekap! magasin i save givhan long yu blong seremaot ol magasin? (b) ?Yumi save kasem wanem taem yumi yusum wan sotfala fastok we i go stret long poen taem yumi seremaot ol magasin? (c) ?Wanem i soemaot (se i impoten) blong karem ol magasin i go long haos blong ol man?

¹⁸ Faswan advaes i blong save gud ol samting insaed long “Wajtaoa” mo “Wekap!” Ridim ol magasin ya bifo we yu seremaot. Taem yu ridim ol wanwan atikol, askem yu wan se, ‘?Atikol ya i stret long wanem man?’ Tingbaot sam tok we yu save talem blong pulum intres i go long atikol ya. ?Blong sapotem moa Dei blong Magasin we i stap oltaem, yu save karem sam kopi wetem yu blong yu save go moa blong tekem evri jans blong serem wetem ol narafala​—⁠taem yu stap go long wan narafala ples no long stoa mo taem yu stap toktok wetem ol man we yu wok wetem olgeta, ol man raonabaot long yu, ol fren blong yu long skul, no ol tija?

¹⁹ Yu no talem tumas samting. Wajtaoa blong Desemba 1, 1956, i talem se: “Wan sotfala fastok we i go stret long poen i nambawan taem yu stap seremaot ol magasin. Mak we yumi wantem kasem i blong seremaot plante magasin. Bambae ol magasin nomo oli save mekem prapa ‘tok’ blong olgeta.” Sam pablisa oli faenem se i gud blong jusum wan poen long wan atikol, toktok smol long poen ya, mo givimaot ol magasin. Taem man blong haos i tekem ol magasin, ol magasin ya oli “toktok” long ol narafala man we oli stap kolosap long hemia we i tekem ol magasin long yu. Long Aerlan wan yangfala studen blong yunivesiti i ridim Wajtaoa blong Septemba 1, 1991, we papa blong hem i bin tekem long wan Wetnes. Ol atikol long fasin blong toktok tugeta mo ol narafala poen oli wekemap intres blong hem. Smoltaem biaen we hem i ridim magasin ya, hem i telefon long ol Wetnes, hem i ring long namba we i stap long buk blong telefon. I no longtaem oli statem wan Baebol stadi, mo yangfala woman ya i tekem baptaes long Distrik Asembli “Tijing Blong God” long Julae 1993. !Yes, i gud yumi karem ol magasin i go long ol haos, we long ples ya oli save “toktok” long ol man! Wan elda blong goraon i talem wan smol tingting se: “Tekemaot ol magasin long bag blong yu blong putum buk.” Yes, sipos man blong haos i no intres long samting we yu talem, ale maet ol naes pija long skin blong ol magasin bambae i seremaot magasin blong yu.

20, 21. (a) ?Olsem wanem yu save rere blong jenisim toktok blong yu taem yu joen long wok blong seremaot magasin? (b) ?Blong seremaot moa magasin evri manis, yumi wanwan i save tingbaot wanem mak?

²⁰ Namba tri advaes se rere blong jenisim fasin blong toktok. (Skelem wetem 1 Korin 9:​19-23.) Mekem rere sam sotfala fastok. Tingbaot wan atikol we bambae i pulum tingting blong ol man, wan narafala i pulum tingting blong ol woman. Long ol yangfala, maet yu save tokbaot wan atikol long haf ya “Ol Yangfala Oli Askem . . .” Yu mas rere blong jenisim fasin blong toktok, tu, taem we yu joen long wok blong seremaot magasin. Antap moa long Dei ya blong seremaot Magasin, maet yu save faenem se wok blong prij long aftenun i givim wan nambawan jans blong seremaot ol magasin long ol haos wanwan.

²¹ Namba fo advaes se putum wan mak. Atikol ya “Ol Magasin Oli Soem Rod Blong Laef,” we i kamaot long Kingdom Wok Blong Yumi long Maj 1984, i talem se: “Olsem wan advaes, ol pablisa oli save putum wan mak, eksampel, blong seremaot 10 magasin long wan manis, i dipen long taem blong olgeta; ol paenia oli save traehad blong seremaot 90. Yes, maet sam pablisa oli save seremaot moa magasin long wan manis, from samting ya bambae oli putum wan mak we i antap moa. Defren olgeta, ol narafala oli save putum wan mak we i daon from we oli no strong long bodi, teritori i defren, no from ol narafala risen bakegen. Jeova i haremgud yet long wok blong olgeta. (Mat. 13:23; Luk 21:​3, 4) Samting we i impoten se yumi ẁanwan i mas gat wan mak.”

22. ?Olsem wanem yumi save soem long Jeova se yumi gat fasin tangkyu long ol magasin blong yumi we oli stap kamaot long stret taem?

²² !Yumi talem tangkyu tumas long Jeova, ‘God ya blong trutok,’ we i bin yusum grup ya blong slef we i stret mo waes mo Hed Kampani blong hem blong givim ol magasin ya long yumi long stret taem blong hem! (Ol Sam 31:⁠5) Gogo kasem taem we Jeova i wantem, bambae tufala magasin ya i gohed blong givim ol samting we ol man oli rili nidim. Bambae tufala magasin ya i gohed blong leftemap ol hae rul blong Jeova long saed blong stret fasin. Bambae tufala i no save stop blong leftemap ol stampa tijing. Mo bambae tufala i gohed blong pulum tingting i go long profet tok we oli makem taem blong yumi olsem taem we Kingdom blong God i stap rul mo ol man oli stap mekem wil blong God long wol ya bitim bifo taem namba blong ol trufala man blong wosip long Jeova i stap go antap. (Matyu 6:10; Revelesen 11:15) !Long Wajtaoa mo Wekap!, yumi gat ol sas samting ya we yumi no pem! I gud yumi gohed blong tekem evri jans blong serem tufala impoten magasin ya wetem olgeta we oli gat tingting daon, we i save givhan long laef blong olgeta mo i leftemap ol trutok blong Kingdom.

[Ol futnot]

?Wanem Ansa Blong Yu?

◻ ?Wanem i soem se Wajtaoa mo Wekap! magasin, tufala i magasin blong trutok?

◻ ?Olsem wanem Wajtaoa mo Wekap! magasin i bin gat paoa long laef blong ol man?

◻ ?Ol kongregesen oli save mekem wanem blong leftemap fasin blong seremaot ol magasin?

◻ ?Wanem ol advaes we oli save givhan long yu blong seremaot moa magasin?

[Bokis blong pija long pej 22]

Sam Atikol We i Gat Paoa Long Laef Blong Ol Man

Long ol yia we oli pas plante man oli bin raet blong talem tangkyu from ol atikol we oli raetem long Wajtaoa mo Wekap! Aninit i gat sam long ol poen we i bin gat paoa long laef blong ol man we oli ridim magasin blong mifala. ?Ol atikol ya no ol narafala oli bin jenisim laef blong yu?

Wajtaoa

“Akseptem Help Blong God Blong Winim Ol Mastik We Oli Haed” (Epril 15, 1985)

“Wokem Fasin Fasgud Long God Long Fasin Blong Lukaot Long Ol Olfala Papa Mama” (Jun 1, 1987)

“Skul From Wan Risen” (Novemba 1, 1992)

Wekap!

“!Yu Save Winim Tingting We i Foldaon!” (Septemba 8, 1981)

“Taem Wan Man We Yu Laekem Tumas i Ded . . .” (Epril 22, 1985)

“!Lukaot Long Ol Pikinini Blong Yu!” (Oktoba 8, 1993)

[Tok blong pija long pej 23]

Long Kanada​—⁠wok blong prij long ol haos wanwan

[Tok blong pija long pej 24]

Long Mianma, oli stap seremaot ol magasin we i soem rod blong laef