?Yu Yu Stap Ridim Ol Magasin?
1 Wan brata mo waef blong hem we tufala i misinari long Afrika, oli tokbaot ol magasin blong yumi, tufala i talem se: “Wajtaoa i halpem mifala blong wekapgud long saed blong spirit long teritori blong mifala. Evri magasin i leftemap tingting mo i givim paoa long mifala.” ?Yu tu yu gat bigfala tangkiu from ol magasin ya? ?Yu yu wantem tumas ridim olgeta?
2 I tekem fulap taem blong mekem rere ol haf blong magasin we yumi save ridim long sam menet nomo. Taem yu tingbaot samting ya, yu yu mekem wanem? ?Yu jes luk kwiktaem nomo ol defren haf, yu luk ol pija nomo, no wanwan taem yu jes ridim ol haf ya nomo we oli kasem intres blong yu? No, yumi waes sipos yumi mekem moa long samting ya. Yumi mas tekem taem blong ridim mo stadi long olgeta haf long olgeta magasin we yumi kasem. Wajtaoa i stamba magasin blong yumi we i givim kakae long saed blong spirit we i kamaot long stret taem. Wekap! i karem sam nambawan haf we oli tijim yumi long plante defren samting. Ol samting we yumi lanem long tufala magasin ya oli mekem se yumi kam strong moa long saed blong spirit, be tu oli givhan long yumi blong kam moa gud long wok blong prij. Taem yumi stap ridim oltaem ol magasin ya, ale bambae yumi wantem tumas blong soemaot ol magasin long ol narafala.
3 Olsem Wanem Kam Moa Gud Long Fasin Blong Ridim: ?Yu save kam moa gud long fasin blong ridim ol magasin oltaem? Yes. Hemia tufala rod we oli givhan long plante man blong mekem olsem: (1) Putumap wan program blong ridim evri dei. Sipos yu tekem 10 no 15 menet nomo blong ridim evri dei, bambae yu sapraes blong luk olgeta samting we yu ridim long wan wik nomo. (2) Yu mas gat wan rod blong save wanem yu ridim finis. Ating yu save putum wan mak long evri haf we yu ridim finis. Sipos yu no mekem olsem, ating bambae yu mestem blong ridim wan haf no wan ful magasin. I impoten we yu wokem wan gudfala program blong rid mo folemgud program ya.—Skelem wetem Filipae 3:16.
4 “Slef we i stret mo waes” i luksave se ol samting oli stap jenis. Taswe hem i wokem sam haf blong magasin ya we oli laenap wetem ol samting we ol man oli rili nidim. (Mat. 24:45) I tru se, ol magasin oli stret long laef blong yumi. Bambae yumi gohed blong gru long saed blong spirit sipos yumi gohed blong folem wan gudfala tiokratik program blong ridim. Olgeta ya we oli tekem taem blong ridim olgeta magasin ya, bambae oli kasem sam nambawan blesing long saed blong spirit.