Askem Man Blong Mekem Sabskripsen
1 Tede ol trabol mo wari i mekem laef blong olgeta man long wol i kam nogud. Wo, hanggri, sik mo trabol oli stap kam antap. Ol gavman oli olbaot, oli fraet mo oli no moa gat paoa. Nating se ol man oli traehad fulwan, samting ya i no mekem i kam moagud. Pis i no moa stap. (Rev. 6:4) Ol man oli wantem save from wanem i gat tumas trabol. Wajtaoa i wan nambawan rod blong karem mesej ya i go long ol narafala. Hem i soem long ol man se i no longtaem, Kingdom blong God bambae i spolem ol man we oli mekem i strong tumas long narafala man. Bambae Kingdom ya i mekem wol i kam wan paradaes we i gat fulap pis long hem.
2 From we plante man oli wari long saed blong laef blong olgeta, ating fastok ya i save wekemap tingting blong olgeta:
◼ “Tede plante man raonabaot long yumi, oli faenem se laef i had. Taem mifala i storeyan wetem ol man we oli stap kolosap long yu, bighaf blong olgeta oli talem se trabol we i bigwan moa i blong faenem wan gudfala wok mo wan haos. ?Yu yu agri wetem tingting ya? [Nao yu save jenisim toktok blong yu blong joen wetem ansa blong hem, no yu save gohed olsem.] ?Samtaem yu bin tingbaot isi laef we yumi save gat sipos evriwan i gat wan gudfala wok mo prapa haos blong hem? [Letem man i ansa.] ?Yu yu save promes blong Baebol se i no longtaem bambae yumi save laef olsem? Bambae mi soem long yu wanem promes we God i mekem tru long profet Aesea. [Ridim Aesea 65:17, 18.] I klia se, ol rula long wol ya oli no save mekem samting ya, be Kingdom blong God nomo i save mekem. Wajtaoa i pulum tingting blong yumi i go long Kingdom ya mo long taem we bambae hem i kamtru.” Afta, soem Wajtaoa blong Novemba 15, 1995, mo askem hem blong mekem sabskripsen.
3 Hemia wan narafala rod we yu save yusum:
◼ “Mi sua se yu bin harem plante tok long saed blong ol enjel. ?Yu yu rili bilif se ol enjel oli stap? [Letem man i ansa.] Sipos i olsem, i gud blong save se ol enjel oli kam long weples. Plante man oli bilif se taem man i ded, sol i aot long bodi, nao i kam wan enjel long heven. ?Wanem tingting blong yu? [Wet blong man i ansa.] Makem tok we i stap long Wajtaoa ya long pej 8. [Ridim ol tok we i stap long bokis, go kasem Job 38:4-7. Nao yu save ridim vas ya long Baebol.] Ale, yumi luk se ol enjel oli stap bifo we God i wokem wol ya, ?i tru? Taswe, ?yu ting se oli bin laef long wol ya bifo we oli go long heven? No gat. I klia se God i wokem ol wanwan enjel blong oli laef long heven.” Nao, soem ol narafala tok long bokis long pej 8, mo askem hem blong mekem sabskripsen.
4 Mo yu save traem rod ya:
◼ “Mifala i glad blong faenem yu long haos tede. Mifala i stap storeyan wetem ol man long wan kwestin we plante man oli tingting long hem, taem oli luk we i no gat pis long wol ya. Oli askem se: ‘?From wanem ol nesen oli no save wokgud tugeta blong stretem ol trabol blong olgeta?” (Wet blong man i ansa.) Mo gohed olsem: “Long Matyu 24:7, Jisas i talem se bambae i gat ol trabol i kamaot we i tekemaot pis long wol ya. [Ridim.] Ol ripot long nyus oli soem se ol samting ya oli stap hapen tede. Plante man we hat blong olgeta i stret oli stap askem sipos ol samting bambae oli kam moagud. ?Wanem tingting blong yu? [Wet blong man i ansa.] Matyu 24:13 i talem se bambae sam man oli stap laef tru long taem blong trabol ya. [Ridim.] Wajtaoa blong Novemba 15 i tokbaot ‘Kolosap Nao Bambae Laef i Kam Moagud.’ [Maet yu save yusum wan stret poen long haf ya.] Mifala i stap askem ol man blong mekem sabskripsen blong magasin ya blong wan yia. Yu save kasem 24 magasin blong 600 VT.”
5 Sipos man blong haos i bisi tumas, ating yu save talem smol tok ya:
◼ “Wajtaoa i stap givhan long mi blong save olsem wanem ol samting we oli kamaot long wol oli stret long ol profet tok blong Baebol. Hem i talemaot gud nyus we i leftemap tingting blong ol man, se kolosap nao Kingdom blong God bambae i mekem wol i kam wan nambawan paradaes. Yu save kasem tu magasin evri manis blong wan yia long praes blong 600 VT nomo.”
6 Sipos man blong haos i no gat mane blong karem sabskripsen, yu save mekem plan blong gobak bakegen long wan narafala taem. Sipos no, yu save askem hem blong mekem sabskripsen blong sikis manis blong 300 VT nomo. Yumi save pulum olgeta we oli no wantem mekem sabskripsen blong oli karem nyufala Wajtaoa mo Wekap! blong 60 VT.
7 Samfala oli putum wan stret namba blong sabskripsen we oli traehad blong kasem long taem blong seremaot sabskripsen. Traehad blong kasem namba we yu yu putum, wetem strong tingting mo fasin blong wok had. Holem positif tingting. Sipos yumi mekem olsem mo yumi prea blong Jeova i blesem ol hadwok blong yumi, bambae yumi kasem ol nambawan frut long wok blong seremaot sabskripsen. Bambae glad blong yumi i halpem ol narafala blong luk se ol magasin ya oli rili nambawan. (Jon 15:11) !Yu no mas fraet blong tekem evri jans blong askem ol man blong mekem sabskripsen long wok blong prij!