Visitim Bakegen Ol Man We Oli Mekem Sabskripsen
1 Novemba i namba tu manis blong wok ya blong seremaot sabskripsen. I gat plante man we oli mekem sabskripsen blong fastaem long manis Oktoba. I gud we yumi gobak long olgeta blong traem statem wan Baebol stadi wetem olgeta. ?Olsem wanem yumi save mekem samting ya?
2 Plante long olgeta we oli jes mekem sabskripsen, oli no kasem wan magasin long postofis yet. Taswe, yumi save karem ol nyufala magasin i go long olgeta. Afta we yumi mekem plante visit olsem, yumi stat blong frengud wetem olgeta. Plante taem, yumi save statem wan gudfala storeyan, sipos yumi yusum wan no tu haf blong magasin we man ya i save intres long olgeta. Blong mekem samting ya, yumi mas savegud ol magasin mo soemaot fasin fren taem yumi mekem visit. Man we i mekem sabskripsen i mas luksave se yu intres long hem, mo se ol save we yu wantem serem i impoten long laef blong hem mo blong mekem hem i glad.
3 Eksampel, sipos man blong haos i karem “Wajtaoa” blong Novemba 1, ating yu save talem se:
◼ “Lastaem we mi mi kam, yumitu tokbaot ol enjel. Yumi luk se oli folem wan gudfala plan, oli no olbaot. ?Yu yu ting se oli save mekem sam samting long laef blong yumi naoia? [Wet blong man i ansa.] Long buk blong Revelesen, makemgud samting we aposol Jon i luk long wan vison long saed blong taem blong yumi. [Ridim Revelesen 14:6, 7.] Bifo long ‘taem blong jajmen,’ ol enjel oli joen long wan wok blong prij we i go kasem olgeta ples blong wol. Makem tok we i stap long Wajtaoa long saed blong vas ya. [Jusum sam tok long haf 2 no 3 long pej 8.] I impoten tumas we yumi lesin naoia long gud nyus ya blong Kingdom. Stret olsem Jisas i talem, gud nyus ya i stap go long olgeta ples blong wol naoia bifo we en i kam.” Ridim Matyu 24:14, mo askem man blong haos blong stadi Baebol, no soem ol nyufala magasin.
4 Rimemba, mak we yumi wantem kasem, i blong statem wan Baebol stadi wetem ol man we oli bin mekem sabskripsen. I no naf we oli gat save nomo. Man Itiopia tu i gat buk blong Aesea, be hem i nidim Filip blong eksplenem long hem. (Wok 8:27-36) Filip i askem stret long man ya, mo wantaem nomo hem i statem wan Baebol stadi we i karem frut. I gud blong mekem sem samting long ol man we oli tekem sabskripsen. Askem man blong haos sipos yu save kambak mo stadi Baebol wetem hem. Wan rod blong mekem samting ya hemia:
5 From we yumi gat prapa sabskripsen blong yumi, bambae yumi save stret taem we ol magasin ya oli kamtru long postofis. Taswe afta we sam dei i pas, yumi save gobak mo soem sam haf long ol nyufala magasin we maet oli pulum intres blong man. Samtaem i gud blong sidaon wetem man we i bin tekem sabskripsen mo ridim sam haf tugeta, sipos yumi save mekem olsem. Plante taem fasin ya blong storeyan gud tugeta, i save lidim man blong statem wan Baebol stadi.
6 Taem yumi mekem ol visit olsem, yumi save talem “halo” wetem smael mo talem samting olsemia:
◼ “Ating yu jes kasem Wajtaoa [no Wekap!] long postofis [talem weswan magasin], from we mi tu mi jes kasem blong mi. Mi tingbaot yu taem mi ridim haf ya. [Soem stampa tok.] Sipos magasin blong yu i stap kolosap, mi laekem blong soem long yu wan poen we mi rili intres long hem.” Ol visit olsem oli sot nomo, be yumi save mekem oli kam longfala moa, mo yumi save talem moa, taem yumi fren moa wetem olgeta. I no longtaem, bambae oli wet long yu evri wik blong storeyan long saed blong Baebol. Long stret taem, yu save statem wan Baebol stadi.
7 Mifala i hop se bambae yu kasem plante sabskripsen, mo biaen yu statem plante Baebol stadi wetem olgeta ya we oli soem intres long Tok blong God. Rimemba, yumi wantem givhan long olgeta blong oli kam ol trufala disaepol blong Jisas Kraes. (Mat. 28:19, 20) Soem se yu wan fren taem yu mekem ol visit bakegen. Mekem ol man oli save se yu rili intres long olgeta mo long famle blong olgeta. Halpem olgeta blong luksave olsem wanem Wajtaoa mo Wekap! we oli stap kasem, bambae oli givhan long olgeta blong kasem moa save long saed blong God mo ol promes blong hem. Long stret taem, askem olgeta sipos yu save stadi Baebol wetem olgeta. Biaen, yu no mas mestem blong gobak blong visitim olgeta, blong halpem olgeta blong kasem save ya we i lidim olgeta long laef we i no save finis.—Jon 17:3.