Seremaot Wajtaoa Long Manis Novemba
1 Afta we Wajtaoa i jes stat blong kamaot long Julae 1879, evri manis oli stap wokem 6,000 kopi blong hem, long wan lanwis nomo. Tede, afta 116 yia, oli stap wokem bitim 16 milyan kopi blong evri Wajtaoa, long 120 lanwis, we kolosap evriwan oli kamaot tu taem long wan manis. Namba ya we i kam antap, i soem se Jeova i glad long tul ya we hem i stap yusum blong talemaot trutok long saed blong Kingdom blong hem.
2 Nating sipos yu bin ridim Wajtaoa blong wan sotfala taem nomo no blong plante yia finis, mifala i sua se yu glad long ol help we hem i givim long yu long saed blong speret. Wajtaoa i givim long yu wan hop we i kamaot long Baebol. Hem i mekem se bilif blong yu i kam strong moa, se Kingdom blong God nomo i save putum pis blong olwe long wol ya. Hem i mekem yu luksave ol denja we oli makemaot ol hadtaem ya se oli ‘ol las dei.’ (2 Tim. 3:1-5) Wajtaoa i givhan long yu blong kasem ol tok blong God long Baebol we i “mekem yumi haremgud” mo i lidimgud yumi. (Rom 15:4; Sam 119:105) Taem yu tingtinggud long ol samting ya mo long ol narafala rod we hem i bin givhan long yu, ?yu no harem se yu wantem go talemaot long ol narafala olsem wanem Wajtaoa i nambawan? Long manis Novemba, bambae yumi seremaot sabskripsen blong wan yia, long 600 VT.
3 Yu mas gat positif tingting: Wajtaoa i tokbaot waes blong God, i no ol tingting blong man. Yumi evriwan tede yumi nidim waes ya tumas. Hem i save mekem laef blong yumi i kam moa gud mo givhan long yumi blong wokem stret tingting we i pusum yumi blong mekem ol samting. Yumi nidim samting ya blong “stap laef.” (Prov. 9:1-6) Sipos yumi bilivim samting ya, bambae yumi gat positif tingting taem yumi askem ol man blong karem sabskripsen. Bambae yumi luksave se yumi gat samting we ol narafala oli nidim. Yu mas tekem taem blong ridim evri magasin blong faenem sam tok we yu ting se bambae oli givhan long man blong haos. Sipos fastaem yu mekemrere olsem, bambae samting ya i givhan long yu blong gat wan positif tingting taem yumi seremaot ol magasin ya long wok blong prij.
4 Praes blong Wajtaoa i nating nomo taem yumi tingbaot ol gudfala samting we man we i ridim i save kasem. Taswe, wetem strong tingting yumi mas tekem evri jans blong askem ol man blong karem sabskripsen. Ating sam pablisa oli wantem blong askem ol man blong karem sabskripsen blong Wekap! long Engglis mo Franis, wantaem wetem hemia blong Wajtaoa. Sabskripsen blong wan yia blong tufala magasin ya hem i 1,200 VT, smol praes nomo taem yumi skelem wetem plante buk blong wol.
5 Wajtaoa i givhan long yumi blong mekem ol disaepol: Yumi mas gat strong tingting blong gobak long ol man we oli karem ol magasin mo mekem intres blong olgeta i gru. Sam oli traem blong statem wan rod magasin wetem ol man we oli karem wanwan magasin. Sipos wan man i ridim wan Wajtaoa no Wekap! nomo, maet samting ya i naf blong pulum intres blong hem. Taswe, yu mas gobak mo soemaot ol nyufala magasin, mo tokbaot wan haf we yu ting se bambae hem i intres long hem. Afta we hem i ridim sam magasin, maet hem i wantem blong mekem wan sabskripsen. Sipos yu gobak blong halpem ol man we oli mekem wan sabskripsen, blong oli faenem ol gudfala poen long ol magasin ya, samting ya i save givhan bigwan long olgeta.
6 Taem yumi seremaot Wajtaoa long manis Novemba, bambae yumi kasem glad mo yumi haremgud. Sipos Wajtaoa i bin givhan long yumi, yumi save gat strong tingting blong seremaot long ol narafala. Taem yumi leftemap tingting blong olgeta blong mekem sabskripsen mo blong ridim ol nambawan magasin ya, yumi save givhan long olgeta blong stanap long saed blong Jeova.