Gohed Blong Kasem Ol Gudfala Samting Long Wajtaoa Mo Wekap!

Naoia we i no moa gat sabskripsen blong Wajtaoa mo Wekap! i kam long pos ofis, bambae yumi mas traehad blong meksua se yumi, wetem olgeta we yumi prij long olgeta, oli no mestem wan magasin.

Prapa Kopi Blong Yu: Taem sabskripsen we yu stap kasem naoia i finis, jenisim oda blong ol magasin blong yu long kongregesen i kam bigwan moa. Ol papa mama oli mas oda naf magasin blong mekem se ol wanwan memba blong famle oli gat prapa kopi blong olgeta. I gud blong raetem nem blong yu long prapa kopi blong yu, olsemia nao bambae yu no mestem mo seremaot magasin ya long wok blong prij. Ol brata we oli lukaot long ol magasin long Haos Kingdom bambae oli givimaot ol niufala magasin kwiktaem.

Rod Magasin: Ol pablisa oli mas traehad blong gat wan rod magasin wetem olgeta man we oli intres mo we oli wantem kasem ol magasin. Sipos yumi nomo i karem ol magasin oli go long olgeta, samting ya bambae i givim janis long yumi blong mekem intres blong olgeta i gru moa, mo blong traem statem ol Baebol stadi.—Lukluk Kingdom Wok Blong Yumi, Oktoba 1998, pej 8.

Olgeta We Oli Gat Spesel Nid: Sipos wan man i intres gud be hem i stap long wan ples we i longwe long wan kongregesen, hem i save kasem sabskripsen long pos ofis. Sipos wan man we i rili wantem kasem ol magasin i stap long teritori blong wan kongregesen be i no gat rod blong yu karem magasin evri taem i go long hem, i gud blong storian long bisnes ya wetem Sevis Komiti blong kongregesen. Sipos oli agri, kongregesen i save askem Sosaeti blong sanem wan sabskripsen long man ya we i intres. Oli save yusum ol pepa blong sabskripsen (M-1 mo M-101) blong mekem samting ya.

Yumi save sua se Jeova bambae i gohed blong blesem olgeta traehad blong yumi blong yusum Wajtaoa mo Wekap! blong talemaot Kingdom.