?Yumi Nidim Blong Luk Wan Merikel Blong Bilif Long God?
ALBERT i gat bitim 20 yia taem hem i stat lukaot God. Hem i go long plante defren skul, be i no gat wan we hem i haremgud long hem. Taem hem i ridim sam haf blong Baebol, hem i faenemaot ol samting we God i bin mekem long ol man olsem Noa, Ebraham, Sera, mo Moses. Albert i harem se hem i laekem fasin blong God ya we Baebol i tokbaot. Be, ?Albert i save sua se God i rili laef i stap?
Wan naet, Albert i draevem trak blong hem i go long wan ples longwe long ol man, ale hem i prea i se, “Plis God, givim wan saen long mi—enikaen samting blong pruvum se yu yu rili laef i stap.” Albert i wet blong longtaem. Hem i rimemba se, taem hem i luk we i no gat wan samting i hapen, ‘tingting blong hem i foldaon, i olsem we hat blong hem i emti, mo hem i kros,’ from we hem i no luk samting we hem i wantem.
Plante man olsem Albert, oli harem se oli lukaot God blong nating nomo from we oli no save faenem hem. Maet tingting blong olgeta i fasfas from toktok blong ol lida blong jyos, no oli lusum bilif from ol prija long televisin we oli toktok long fasin we i olsem se oli stap salem wan samting. Samfala oli luk fasin tu fes blong plante man raonabaot long olgeta we oli stap talem se oli Kristin, nao oli no moa sua wanem samting i stret blong bilif long hem. Nating se i olsem, King Deved blong Isrel bifo, i talem long pikinini blong hem Solomon se: “Sipos yu lukaotem [God], bambae hem i letem yu yu faenem hem.”—1 Kronikel 28:9.
Ale, ?olsem wanem God i stap soemaot hem wan? ?I stret we yu wet long wan saen—wan merikel we i pruvum long yu se God i rili laef i stap? Folem wan stadi we nyuspepa ya Time i tokbaot, bitim tu long evri tri man long Yunaeted Stet oli bilif long ol merikel. Nyuspepa ya i talem tu se, “ol jyos we namba blong ol memba blong olgeta i stap kam antap moa i bitim ol narafala jyos long Amerika, hemia ol Karismatik mo Pentekostal jyos, we wosip blong olgeta i joen plante long ol ‘saen mo merikel.’ ”
?Yumi rili nidim blong luk ol ‘saen mo merikel’ blong bilif long God? I tru se God i bin yusum ol merikel long taem bifo. Tingbaot eksampel blong Sol blong Tasas, we i mekem trabol long ol disaepol blong Pikinini blong God, Jisas Kraes. Wan narakaen samting i kasem hem long rod, taem hem i aot long Jerusalem blong go long Damaskas. Merikel ya we i mekem se Sol i toktok wetem Jisas we i laef bakegen long ded, i pulum hem blong i kam wan Kristin. (Ol Wok 9:1-22) Long fasin ya, wan man we bifo i stap mekem trabol long ol man blong God, i kam aposol Pol —!wan man we i sapotem fulwan Kristin skul!
Be, ?merikel i pulum man blong jenisim laef blong hem evritaem? ?I nidim we wan man i luk wan merikel blong hem i kasem trufala bilif long God?
[Tok blong pija long pej 3]
Pikinini blong God i toktok wetem Sol blong Tasas long wan merikel. ?I stret we yu wet blong luk wan merikel tu?