?From Wanem Ol Merikel Nomo Oli No Naf Blong Mekem Man i Bilif?

TAEM man i luk wan samting, long taem ya nao hem i save bilif long samting ya. Hemia nao tingting blong plante man. Samfala oli talem se bambae oli bilif long God sipos hem i soemaot hem long olgeta tru long wan merikel. Ating sipos i olsem, bambae ol man ya oli bilif, be ?yu ting se bambae oli kasem trufala bilif?

Tingbaot trifala man Isrel ya Kora, Detan, mo Abiram. Baebol i talem se trifala ya i luk wetem prapa ae blong olgeta taem God i mekem ol bigbigfala merikel, olsem taem ol ten trabol oli kasem ol man Ijip, taem Isrel i krosem Red Si blong ronwe, mo taem Fero blong Ijip wetem olgeta ami blong hem oli lus. (Eksodas 7:⁠19 kasem 11:10; 12:29-​32; Ol Sam 136:15) Mo tu, Kora, Detan, mo Abiram oli harem toktok blong Jeova i kamaot long heven, taem oli stap antap long Bigfala Hil blong Sinae. (Dutronome 4:​11, 12) Nating se i olsem, smoltaem nomo afta we ol merikel ya oli kamaot, trifala man ya oli lidim plante narafala blong rebel agensem Jeova mo ol man we hem i jusum.​—Namba 16:​1-​35; Ol Sam 106:16-​18.

Raonabaot 40 yia biaen long taem ya, wan profet we nem blong hem Balam, hem tu i luk wan merikel. Wan enjel i traem blokem hem blong i no go joen wetem ol enemi blong God, hemia ol man Moab. Nating se Balam i luk merikel ya, hem i gohed nomo, ale hem i girap agensem Jeova God mo ol man blong Hem. (Namba 22:​1-​35; 2 Pita 2:​15, 16) Be, fasin blong Balam blong no gat bilif, i smol nomo taem yumi skelem hem wetem Judas Iskariot. Nating se fastaem Judas i wan gudfala fren blong Jisas, mo hem i luk wetem prapa ae blong hem ol bigfala merikel we Jisas i mekem, biaen, hem i salem Jisas i go long han blong ol enemi blong hem, blong tate selva mane.​—Matyu 26:14-​16, 47-​50; 27:​3-5.

Ol lida blong ol man Jyu tu oli save se Jisas i mekem plante merikel. Afta we hem i mekem Lasros i laef bakegen long ded, olgeta ya oli talem stret se: “Man ya i stap mekem plante saen ya.” Be, taem oli luk se Lasros i laef bakegen finis, ?samting ya i mekem strong fasin blong olgeta i jenis, mo i mekem se oli bilif? No gat. !Oli go moa nogud we oli mekem plan blong kilim Jisas mo Lasros tufala tugeta i ded!​—Jon 11:47-​53; 12:10.

Taem God hem wan i toktok, hemia tu i no naf blong mekem ol rabis man ya oli bilif. Wan taem, Jisas i stap long eria blong haos prea, mo hem i prea wetem bigfala voes se: “Papa, plis yu leftemap nem blong yu.” Nao Jeova i ansa long wan voes we i kamaot long heven se: “Mi mi leftemap nem blong mi finis, mo bambae mi save leftemap bakegen.” Be, merikel ya i no mekem ol man we oli stap long taem ya oli bilif long hat blong olgeta. Baebol i talem se: “Hem i mekem plante saen finis blong soemaot paoa blong God long fes blong ol man Isrel, be olgeta oli no bilif long hem.”​—Jon 12:28-​30, 37; skelem wetem Efesas 3:​17.

From Wanem Ol Merikel Oli No Mekem Man i Bilif

?Olsem wanem ol man ya oli no save bilif, nating se oli luk plante merikel olsem? Taem yu tingbaot se long stret taem we Jisas i statem minista wok blong hem, ol man Jyu oli stap ‘wet’ long ‘Kraes,’ no Mesaea, blong kamtru, ating i hadwok blong kasem save from wanem ol lida blong skul blong ol man Jyu oli no bilif long Jisas. (Luk 3:​15) Be, risen we i pusum olgeta blong wet long hem, hemia nao problem blong olgeta. Wan man blong raetem diksonari, W. E. Vine, i talemaot tok blong wan bigfala man blong stadi long Baebol, se ol man Jyu oli tingting bitim mak long Mesaea ya we bambae i kam, from we oli bilif se bambae hem i “mekem olgeta oli win long laef blong olgeta long wol ya,” mo bambae hem i “givim plante sas samting” long olgeta. Taswe, oli no stap wet long wan man olsem Jisas blong Nasaret, we tingting blong hem i stap daon, mo we hem i no joen nating long politik, taem hem i kamtru olsem trufala Mesaea long yia 29 K.T.a Ol lida blong skul oli fraet tu se bambae ol tijing blong Jisas oli gat paoa long ol man, mo se bambae hem i spolem haeples we olgeta oli gat. (Jon 11:48) Ol tingting blong olgeta mo fasin blong tingbaot olgeta nomo, i mekem se oli no luksave mining blong ol merikel blong Jisas.

Biaen, ol lida blong skul blong ol man Jyu mo sam narafala man bakegen, oli no bilif long ol pruf we oli soemaot se God i stap sapotem ol man blong Jisas. Eksampel, ol aposol blong hem oli mekem wan man we leg blong hem i nogud taem hem i bon, i kamgud bakegen, nao sam memba blong hae kot blong ol man Jyu oli kros tumas, oli askem se: “?Bambae yumi mekem olsem wanem long tufala ya? Olgeta man long Jerusalem oli save finis we wok ya we tufala i mekem long man ya i bigfala tumas. Mo yumi no save haedem. Be i gud yumi blokem tok blong samting ya i no goraon moa long ol man. Yumi mas tok strong long tufala, se tufala i no moa save yusum nem blong Jisas bakegen blong tok long ol man.” (Ol Wok 3:​1-8; 4:​13-​17) I klia se, nambawan merikel ya i no bin bildimap bilif no mekem bilif i strong long hat blong ol man ya.

Fasin blong wantem kasem haenem, wetem flas tingting mo griri fasin, oli pulum plante man blong mekem hat blong olgeta i kam strong. I luk olsem se samting ya nao i hapen long Kora, Detan, mo Abiram, we yumi bin tokbaot fastaem finis. Fasin jelas, fraet, mo plante narafala nogud fasin, oli blokem plante man tu. Mo yumi save tingbaot ol enjel we oli no obei long God, ol devel, we fastaem oli gat nambawan jans ya blong stanap long fes blong God hem wan. (Matyu 18:10) Olgeta ya oli save se God i stap. Yes, ‘ol devel tu oli bilif, mo oli stap seksek from.’ (Jemes 2:​19) Nating se i olsem, oli no gat bilif long God.

Mining Blong Trufala Bilif

Bilif i minim moa bitim fasin ya we man i save se wan samting i stap. Mo tu, hem i no jes wan filing we man i kasem blong smoltaem nomo, taem hem i luk wan merikel. Hibrus 11:1 i talem se: “Fasin ya we yumi bilif long God, hem i soemaot long yumi we olgeta samting ya we yumi stap putum tingting blong yumi i strong long hem, be oli tru. Fasin ya i soemaot long yumi we olgeta samting ya we yumi no save luk, be oli stap.” Wan man we i gat bilif, hem i sua long hat blong hem se olgeta samting we Jeova God i promes blong mekem bambae oli kamtru. Mo tu, ol klia pruf i bigwan tumas blong soemaot se i gat wan samting i stap we yumi no save luk wetem ae blong yumi, taswe yumi save talem se bilif hem wan i sem mak olsem ol pruf ya. Yes, bilif i stanap long ol pruf. Mo long taem bifo, ol merikel oli givhan long ol man blong kasem mo bildimap bilif. Ol saen we Jisas i mekem, oli givhan blong pruvum long ol man se hem i Mesaea ya we profet tok i bin talemaot. (Matyu 8:​16, 17; Hibrus 2:​2-4) Long sem fasin, ol presen we tabu speret no paoa blong God i givim long ol man long taem ya, olsem merikel ya blong mekem sikman i kamgud bakegen mo fasin ya blong toktok long ol narafala lanwis, oli pruvum se Jeova i no moa luk ol man Jyu olsem ol man we hem i agri long olgeta. Naoia, hem i agri long Kristin kongregesen,b we Pikinini blong hem, Jisas Kraes, i stanemap.​—1 Korin 12:​7-​11.

Wan long olgeta merikel we tabu speret i givim olsem presen long ol man, hemia se oli naf blong talemaot ol profet tok. Taem ol man we oli no bilif, oli luk merikel ya, samfala oli wosip long Jeova, oli se: “Tru, God i stap long medel blong yufala.” (1 Korin 14:22-​25) Be, Jeova God i no gat tingting ya se ol merikel bambae oli stap oltaem olsem wan haf blong Kristin wosip. From samting ya, aposol Pol i raetem se: “Maet sam man oli gat paoa blong talemaot ol tok we God i givim, be fasin ya bambae i finis. Maet sam man oli gat paoa blong tok long ol narafala lanwis, be ol lanwis ya bambae oli no moa yusum.” (1 Korin 13:8) From ol pruf we yumi gat, yumi luk se ol presen ya oli lus taem ol aposol mo olgeta we ol aposol oli givim ol presen ya long olgeta, oli ded.

?Samting ya i minim se ol man oli no moa gat wan samting we bilif i save stanap long hem? Si, oli gat, from we Pol i talem se: “[God] i stap soemaot gud we fasin blong hem i olsem wanem, long ol gudfala wok we hem i stap mekem. Hem i stap mekem ren i foldaon, mo i stap mekem ol garen oli gat kakae long stret taem blong olgeta. Hem i stap givim kakae long yufala, mo hem i stap mekem yufala i harem gud long tingting blong yufala.” (Ol Wok 14:17) Yes, olgeta man we hat blong olgeta i stret mo we oli rere blong letem ol pruf we i stap raonabaot long yumi i go insaed long tingting mo hat blong olgeta, oli luksave ‘ol fasin blong Jeova God we yumi no save luk stret long ae blong yumi. Stat long taem ya we hem i mekem wol ya fastaem, i kam kasem naoia, hem i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya, we hem i bin mekem. From samting ya, ol man [we oli no bilif long God] oli no gat wan tok nating blong talem.’​—Rom 1:​20.

Be, i no naf blong bilif nomo se God i laef i stap. Pol i talem se: “Yufala i mas no letem fasin blong yufala i kam olsem fasin blong ol man long wol. Yufala i mas letem God i jenisim tingting blong yufala, blong mekem tingting blong yufala i nyufala olgeta. Nao bambae yufala i save jusumaot ol fasin we God i wantem, wanem i gud, mo wanem God i glad long hem mo wanem i stret gud blong mekem.” (Rom 12:2) Yumi save mekem samting ya sipos yumi stadi dip long Baebol wetem ol narafala Kristin buk, olsem magasin ya. Bilif we i stanap long stret save long saed blong Tok blong God, Baebol, hem i no slak mo hem i no smol nomo. Olgeta we oli luksave wanem samting we God i wantem, mo we oli mekem samting ya wetem bilif, olgeta ya oli stap mekem wan tabu wok blong God.​—Rom 12:1.

Bilif, Nating Se Yumi No Luk

Aposol Tomas i faenem i hadwok blong bilif se Jisas Kraes i laef bakegen long ded. Hem i talem se: “Sipos mi luk ol hol blong nil long han blong hem, mo mi putum fingga blong mi i go long ol hol ya, mo mi pusum han blong mi i go insaed long saed blong hem, bambae mi save bilif long hem, !Be sipos no, no gat!” Biaen, Jisas i karem bodi olsem man blong soemaot ol soa we hem i kasem taem oli nilim hem long pos, nao Tomas i jes bilif folem merikel ya we hem i luk. Be, Jisas i talem se: “Olgeta ya we oli no luk mi, be oli bilif long mi, bambae oli save harem gud.”​—Jon 20:25-​29.

Tede, plante milyan Wetnes blong Jeova oli no stap ‘makem laef blong olgeta from ol samting we oli luk, be oli makem long bilif blong olgeta.’ (2 Korin 5:7) Nating se olgeta ya oli no luk ol merikel we Baebol i tokbaot, oli bilif strong se ol merikel ya oli bin kamaot. Ol Wetnes oli soemaot bilif long God mo Tok blong hem. From tabu speret we i givhan long olgeta, oli naf blong kasem save long ol tijing blong Baebol mo stampa tok blong hem​—hemia se hae rul blong Jeova God bambae i win tru long Kingdom blong hem long heven. (Matyu 6:​9, 10; 2 Timote 3:​16, 17) Ol trufala Kristin ya oli folem ol waes advaes we Baebol i givim long laef blong olgeta, ale, oli kasem plante blesing from. (Ol Sam 119:105; Aesea 48:17, 18) Oli agri long ol klia pruf we i soemaot se ol profet tok blong Baebol oli makemaot taem blong yumi olsem “ol las dei,” mo oli bilif se nyufala wol ya we God i promes blong mekem, i kolosap nomo. (2 Timote 3:​1-5; Matyu 24:​3-​14; 2 Pita 3:​13) Olgeta ya, oli glad tumas blong serem save long saed blong God wetem ol narafala. (Proveb 2:​1-5) Oli save se i gat wan trufala rod nomo blong ol man we oli stap lukaot God oli save faenem hem, hemia tru long stadi blong Baebol.​—Ol Wok 17:26, 27.

?Yu rimemba Albert, we yumi bin tokbaot hem long laswan haf? Sam dei nomo afta we hem i no kasem ansa blong prea blong hem blong luk wan merikel, wan Wetnes blong Jeova i visitim hem. Hem i wan olfala woman we i livim sam buk wetem hem we oli tokbaot Baebol. Afta long samting ya, Albert i agri blong mekem wan Baebol stadi we hem i no pem. Taem hem i kasem save moa long mesej blong Baebol, hem i no moa harem nogud long tingting blong hem, be hem i glad tumas. Hem i stat luksave se naoia hem i rili faenem God.

Baebol i talem se: “Yufala i mas lukaot Jeova taem yufala i gat jans yet blong faenem hem. Yufala i mas singaot long hem taem hem i stap kolosap yet long yufala.” (Aesea 55:6) Yu save mekem olsem, i no long rod ya we yu wet blong luk wan merikel we God i mekem, be hem i tru long fasin ya blong traehad blong kasem stret save long Tok blong hem. Samting ya i impoten tumas, from we ol merikel oli no naf blong givim bilif long yu.

[Ol futnot]

[Tok blong pija long pej 5]

Nating se Jisas i mekem Lasros i laef bakegen long ded tru long wan merikel, samting ya i no pulum ol enemi blong hem blong bilif

[Tok blong pija long pej 7]

Bilif i mas stanap long stret save blong Baebol