?Weples Yumi Save Faenem Trufala Glad?

PLANTE man oli ting se oli save faenem glad sipos oli hivimap plante sas samting. ?Wanem tingting blong yu? I tru, ol sas samting oli save givim smol glad, be i no sua se oli save givim glad oltaem. Ol samting we oli mekem laef i isi moa, oli no save givim bilif, mo givim ol samting we yumi nidim long saed blong speret.

Long Bigfala Toktok blong Jisas antap long Hil, hem i talem se: “Olgeta we oli luksave se oli nidim ol samting long saed blong speret, oli save haremgud, from we bambae kingdom blong heven i blong olgeta.” (Matyu 5:​3, NW) Jisas i talem tu se: “Yufala i lukaot gud. Yufala i mas blokem olgeta fasin ya we yufala i wantem samting blong narafala man. Maet man i gat plante samting blong hem, be stampa blong prapa laef blong man i no stap long ol samting ya.”​—Luk 12:15.

Blong faenem glad, plante man oli mekem rabis fasin long saed blong seks mo ol narafala “rabis samting we tingting blong olgeta i wantem.” (Galesia 5:​19-​21) Be, fasin blong haremgud long ol samting we bodi nomo i wantem i no save givim trufala glad we i stap longtaem. Yes, olgeta we oli stap mekem ol fasin olsem, bambae oli no save go insaed long Kingdom blong God.​—1 Korin 6:​9, 10.

Blong faenem glad, sam narafala oli lukluk long olgeta wan bakegen, mo oli traem wokem ol fasin we oli save givhan long olgeta blong tinghae moa long olgeta wan. Ol laebri mo ol stoa we oli salem ol buk, oli fulap long ol buk we oli givim advaes olsem wanem blong kamgud moa. Be ol buk ya oli no givim glad we i stap longtaem. ?Taswe, weples yumi save faenem trufala glad?

Blong kasem trufala glad, yumi mas luksave se yumi bon wetem fasin we yumi nidim ol samting long saed blong speret. Jisas i talem se: “Olgeta we oli luksave se oli nidim ol samting long saed blong speret, oli save haremgud.” I tru, i no save givhan long yumi sipos yumi kasem save long nid ya blong yumi, be yumi no fulumap nid ya. Wan eksampel: Afta we wan man i finisim wan longfala resis, ?wanem bambae i hapen long hem sipos hem i tosta tumas, be i no dring wora? Bambae bodi blong hem i kam slak from i no moa gat wora, mo hem i save kasem sam nara bigfala trabol bakegen. I sem mak, sipos yumi no fulumap ol nid blong yumi long saed blong speret, bambae yumi kam drae long saed blong speret. Samting ya bambae i mekem se yumi no moa haremgud mo glad.

Jisas i luksave fulwan se hem i nidim ol samting long saed blong speret. Oltaem hem i stadi mo tingting dip long Tok blong God. Hem i save faenem mo ridim ol haf blong tabu Baebol isi nomo, mo hem i tijim ol narafala blong mekem olsem. (Luk 4:​16-​21; skelem wetem Efesas 4:​20, 21.) Jisas i talem tu se fasin blong mekem ol samting we Papa blong hem long heven i wantem i olsem kakae. Fasin blong mekem ol samting we God i wantem i karem bigfala glad i kam long hem.​—Jon 4:​34.

Yes, fasin blong hivimap ol sas samting i no save givim trufala glad long yumi. Yumi no save kasem trufala glad tu, taem yumi mekem ol samting we bodi blong yumi we i gat sin i wantem. Trufala glad i wan fasin we i stap long hat, mo i stanap long trufala bilif mo gudfala fasin fren wetem Jeova God. Ale, i stret nomo we man ya blong raetem Ol Sam, Deved, i singsing se: ‘Olgeta we Jeova i God blong olgeta, bambae oli haremgud.’​—Ol Sam 144:15b.

[Tok blong pija long pej 23]

Bilif mo gudfala fasin fren wetem God oli karem trufala glad