?Yu Save Bilif Se God i Wan Trufala Man?

“YU NO nid blong bilif long God blong stap olsem wan Kristin . . . Naoia, yumi stap long wan taem we ol man oli gat ol nyufala tingting long saed blong skul. Be, biaen long yia 2000, bambae ol jyos oli no moa bilif long God long sem fasin we oli bin mekem long ol yia we oli pas finis.” Hemia toktok blong wan pasta we i wok longtaem finis long wan yunivesiti long Briten. Hem i stap talemaot tingting blong grup ya we oli kolem, Bilif We i Bigwan Olsem Solwora. Bitim wan handred pris long Briten oli agri wetem ol tingting blong grup ya. Ol “Kristin man ya we oli no bilif long God,” oli talem se ol man nomo oli wokem ol skul. Mo tu, oli bilif olsem wan memba blong grup ya i bin talem, se God i olsem “wan tingting we i stap long hed blong man nomo.” Bilif long wan God we i gat bigfala paoa bitim yumi, i no laenap wetem tingting blong olgeta.

Long ol yia biaen long 1960, plante man oli stap talem se “God i ded.” Tok ya i kolosap sem mak long tingting blong wan man Jemani long ol yia 1800, Friedrich Nietzsche, we hem i gat bigfala waes blong wol. Plante yangfala tu oli karem tingting ya, blong mekem eskyus from fasin blong olgeta blong mekem enikaen samting we oli wantem, olsem fasin fri long saed blong seks mo fasin blong tekem drag. ?Be fasin fri blong ol man ya we oli kolem ol hipi, i bin lidim olgeta blong faenem wan laef we i moa glad mo we oli haremgud moa long hem? No gat.

Long ol semfala yia ya, bisop blong Anglikan jyos, John A. T. Robinson, i raetem wan buk we plante man oli agensem, nem blong buk ya, Honest to God. Plante narafala lida blong jyos oli tok agensem man ya, from we hem i ting se God i “olsem wan dip filing nomo we man i gat long laef blong hem.” Wan tija long saed blong bilif long God, Keith Ward, i askem se: “?Olsem wanem? ?Bilif long God i wan kaen gyaman tingting blong bifo nomo, we naoia ol waes man oli sakemaot?” Hem i ansa long kwestin blong hem, i se: “I no gat wan samting we i moa impoten long ol skul tede, i bitim we oli tekembak bilif we oli gat long taem bifo long saed blong God.”

Fasin Blong Safa Mo Bilif ­Se God i Wan Trufala Man

Plante we oli bilif se God i wan trufala man, oli faenem i had blong laenemap bilif ya wetem ol nogud samting mo fasin blong safa we oli luk tede. Eksampel, long Maj 1996, wan man long Dunblen, Skotlan, i sutum i ded 16 pikinini wetem tija blong olgeta. Wan woman we i harem nogud tumas, i talem se: “Mi no kasem save from wanem God i letem samting ya i kamaot.” Ol man oli raetem wan kad blong soemaot olsem wanem oli harem nogud tumas, mo oli livim kad ya wetem sam flaoa oli stap afsaed long skul blong ol pikinini ya. Insaed long kad ya, oli raetem wan tok nomo se, “?FROM WANEM?” Blong traem ansa long kwestin ya, pasta blong Katedral blong Dunblen i talem se: “I no gat wan ansa long kwestin ya. Yumi no save eksplenem from wanem samting ya i hapen.”

Samtaem biaen long semfala yia ya, wan man i kilim i ded wan yangfala pasta blong Jyos blong Engglan, we plante man oli laekem hem. Church Times i talem se, olgeta memba blong jyos we oli harem nogud from samting ya we i hapen, oli lesin long tok blong ajdikon blong Livapul, we i talem se ol man oli stap “kilkilim doa blong God blong askem kwestin ya, ?from wanem? ?from wanem?” Lida ya blong jyos tu i no talem sam tok blong God ya we i wan trufala man, blong mekem se ol man we oli lesin long hem oli haremgud.

Oraet, ?yumi mas bilif olsem wanem? I stret nomo blong bilif se God i olsem wan trufala man. Yes, i impoten blong bilif olsem sipos yumi wantem faenem ansa long ol bigfala kwestin we yumi tokbaot antap. Mifala i singaot yu blong ridim ol pruf long haf we i kam biaen.

[Tok Blong Pija Long Pej 3]

Kad ya i askem se, “?From Wanem?”

[Credit Line]

NEWSTEAM No. 278468/Sipa Press