Ripot Long Wok Blong Kingdom

Blesing Blong God i Kamaot Long Malawi From Fasin Blong Stanap Strong

MAN YA Josef we Baebol i tokbaot, i holemstrong long Jeova mo i mekem wok blong Hem. (Hibrus 11:22) Mo tu, hem i gat nambawan fasin ya blong stanap strong longtaem. Ol stret brata blong hem oli agensem hem, oli salem hem olsem wan slef, mo ol narafala man oli salem hem bakegen olsem slef. Biaen, hem i go kalabus from sam gyaman toktok. Be tingting blong Josef i no foldaon olgeta. Hem i stanap strong wetem longfala tingting tru long plante yia blong trabol, mo hem i wet wetem tingting daon, blong kasem blesing blong Jeova.​—Jenesis 37:23-​28, 36; 39:11-​20.

Tede tu, ol Wetnes blong Jeova long Malawi oli bin wet wetem longfala tingting blong kasem blesing blong God. Blong 26 yia, ol Kristin Wetnes ya oli bin stanap strong tru long hadtaem. Gavman i putum tabu long wok blong olgeta, oli kasem strong fasin agens, mo ol man oli mekem plante rabis samting long olgeta. !Be fasin blong olgeta blong stanap strong i karem pei!

Long 1967, taem ol man oli stat ronem ol Wetnes long Malawi, i gat samwe 18,000 man blong talemaot Kingdom long ples ya. Tingbaot bigfala glad blong ol Wetnes taem oli faenemaot se, long stat blong sevis yia 1997, i gat wan nyufala namba blong ol man blong prij, hemia 38,393. !Namba ya i moa long tu taem antap long namba we i stap prij taem gavman i putum tabu long wok blong ol Wetnes! Antap long hemia, i gat bitim 117,000 man we oli kam long 13 Distrik Asembli, “Ol Man Blong Talemaot Pis Blong God,” long Malawi. Tru ya, Jeova i rili blesem bilif mo fasin blong stanap strong we oli soemaot.

Wan store we i soemaot blesing ya, hemia long saed blong wan boe we i gat 14 yia nomo, nem blong hem Machaka. Taem Machaka i agri blong gat wan Baebol stadi wetem ol Wetnes blong Jeova, papa mama blong hem i kros tumas. Tufala i talem se: “Sipos yu wantem joen wetem ol Wetnes, yu mas aot long haos.” Be, strong tok ya i no pusum boe ya blong stopem stadi blong hem. From samting ya, papa mama blong hem i sakemaot ol klos blong hem. Ol Wetnes oli pem sam moa klos blong hem. Taem papa mama blong Machaka i luk samting ya, tufala i talem long hem se: “Sipos ol Wetnes oli wantem pem evri samting we yu nidim blong laef, ale yu save aot mo go stap wetem olgeta.” Machaka i tingtinggud long bisnes ya, nao hem i mekem disisen blong aot long haos blong papa mama blong hem. Wan Wetnes famle long kongregesena blong hem, oli singaot hem blong kam stap wetem olgeta.

Papa mama blong Machaka oli kam kros bitim mak, nao oli girap oli aot long ples ya, blong mekem se oli no moa luk ol Wetnes. Yumi save se Machaka i harem nogud from samting ya. Be ol Kristin brata oli leftemap tingting blong hem wetem ol tok blong Ol Sam 27:10, we i talem se: “Papa mo mama blong mi, maet tufala i save lego mi, be yu, Hae God, bambae yu stap lukaotgud long mi oltaem.”

Taem i pas, nao tingting blong papa mama blong Machaka i jenis lelebet. Ale, hem i mekem disisen blong go stap wetem tufala bakegen. I luk olsem se strong tingting we boe ya blong tufala i soemaot blong mekem wok blong Jeova, i gat bigfala paoa long tufala ya, from we biaen, tufala tu i wantem se ol Wetnes blong Jeova oli kam mekem stadi long tufala. Mo tu, tufala i go long ol tri dei blong Distrik Asembli ya, “Ol Man Blong Talemaot Pis Blong God.” Afta, tufala i talem se: “Tru ya, ol man ya oli rili ol man blong God.”

I tru se, fasin agens i wan bigfala traem long yumi. Be ol man we oli stap tru long God mo gohed blong karem mesej blong hem i go long ol man, oli no kam slak. Wetem strong tingting oli gohed nomo, from oli save se “hadtaem i stap mekem yumi strong, nao yumi save mekem tingting blong yumi i longfala. Nao taem yumi mekem tingting blong yumi i longfala, God i save glad long yumi.” (Rom 5:​3, 4) Ol Wetnes blong Jeova long Malawi, oli save talemaot tru se fasin blong stanap strong bambae i lidim man blong kasem blesing blong God.

[Futnot]