?Yu Wantem Wanem Fyuja Blong Ol Pikinini Blong Yu?

?YU YU tingbaot ol pikinini blong yu olsem wan presen we i sas tumas? (Ol Sam 127:3) ?No yu yu tingbaot wok blong tijim olgeta olsem wan samting we i hevi tumas long yu long saed blong mane, mo we maet i no gat gudfala frut tu? I tru se bambae yu no winim mane from wok blong tijim ol pikinini blong yu. Bambae yu lusum mane gogo ol pikinini oli naf blong lukaot long olgeta nomo. Blong mekemgud wok blong papa mo mama, yu nidim blong plan gud, olsem wan man we i kasem bigfala mane, i mas plan gud blong yusum mane ya long waes fasin.

Olgeta papa mama we oli gat lav, oli wantem se ol pikinini blong olgeta oli gat wan gudfala laef. Nating se plante nogud samting mo plante samting we oli mekem yumi harem nogud tumas oli kamaot long wol ya, ol papa mama oli save mekem plante samting blong protektem ol pikinini blong olgeta. Tingbaot Werner mo Eva we yumi bin tokbaot fastaem finis.a

Taem Papa Mama Oli Rili Kea

Werner i talem se papa mama blong hem tufala i no jes letem ol samting oli gohed olsem nomo, be tufala i intres gud long ol samting we i hapen long skul. Werner i talem se: “Mi mi glad tumas long ol gudfala advaes we tufala i givim long mi, mo mi harem olsem se tufala i rili kea long mi mo sapotem mi. Samtaem tufala i strong long mi, be mi save se tufala i trufala fren blong mi.” Mo Eva tu, taem hem i kam sik mo tingting blong hem i foldaon from skulwok blong hem nao hem i no moa save slipgud, papa mama blong hem, Francisco mo Inez, tufala i spenem plante taem wetem hem. Tufala i toktok wetem hem mo givhan long hem blong no moa wari, mo blong gat stret tingting long saed blong speret.

?Francisco mo Inez i mekem wanem blong traem protektem ol pikinini blong tufala mo mekem olgeta oli rere from laef olsem ol bigman? Stat long taem we tufala pikinini ya oli smol nomo, evri dei, papa mama ya we oli gat lav, oli pulum ol pikinini ya blong joen wetem tufala blong mekem ol samting tugeta. Inez mo Francisco oli tekem tufala pikinini ya wetem olgeta long evri ples we oli go long hem. Papa mama ya i no jes joen oltaem wetem ol fren blong olgeta nomo. Tufala ya i laekem ol pikinini blong tufala, ale tufala i lidimgud boe mo gel blong tufala. Inez i talem se: “Mitufala i tijim tufala pikinini ya blong lukaot long haos, blong no westem mane, mo blong wasem ol klos blong tufala. Mo mitufala i givhan long tufala wanwan blong jusum wan wok, mo blong skelem ol narafala wok wetem ol samting long saed blong speret.”

!I impoten tumas blong savegud ol pikinini blong yu mo lidimgud olgeta olsem ol gudfala papa mama! Naoia, bambae yumi lukluk tri rod blong mekem samting ya: (1) Givhan long ol pikinini blong yu blong jusum wan gudfala wok; (2) mekem tingting blong olgeta i rere blong winim ol traem we oli save spolem filing blong olgeta, long skul mo long wok; (3) soem long olgeta olsem wanem blong kasem ol samting we oli nidim long saed blong speret.

Halpem Olgeta Blong Jusum Wan Gudfala Wok

Wok i no jes givim mane long wan man, be i tekem taem blong hem tu. Taswe, blong givhan gud long pikinini long saed ya, ol papa mama oli mas tingbaot ol samting we ol wanwan pikinini oli laekem blong mekem, mo ol samting we oli naf blong mekem. Eniman we i gat stret tingting i no wantem kam wan baden long ol narafala. Taswe, ol papa mama oli mas tingting gud, olsem wanem blong mekem pikinini blong olgeta i rere blong lukaot long hem wan, mo lukaot long prapa famle blong hem biaen. ?Boe no gel blong yu i nidim blong lanem wan spesel wok blong kasem naf mane blong laef? Blong soem se yu rili kea long pikinini blong yu, yu mas traehad oltaem blong halpem hem blong kasem ol gudfala fasin, olsem fasin blong wantem wok strong, fasin blong wantem lanem plante samting, mo fasin blong joengud wetem ol narafala.

Tingbaot Nicole. Hem i talem se: “Papa mama blong mi i pulum mi blong wok wetem tufala long wan bisnes blong klinim ol ples. Tufala i talem se i gud mi yusum haf pei blong mi blong givhan blong pem ol samting blong haos, mo mi save yusum haf we i stap blong pem samting we mi nomo mi wantem, no mi save putum mane ya long bang. Ale, samting ya i mekem mi mi tinghevi moa long wok we mi mekem. Mo fasin ya i givhan bigwan long mi long ol yia biaen.”

Tok blong God, Baebol, i no talem wanem kaen wok yumi mas jusum. Be hem i givim gudfala advaes. Eksampel, aposol Pol i talem se: “Man we i no wantem wok, yufala i no givim kakae long hem.” Long leta ya we Pol i raetem i go long ol Kristin long Tesalonaeka, hem i talem tu se: “Mifala i harem nyus we i gat sam long yufala we oli stap les nomo. Olgeta ya oli no save go wok blong olgeta, mo oli stap blokem ol narafala man tu, oli no save wok gud. Long nem blong Jisas Kraes, Masta blong yumi, mifala i givim tok ya blong olgeta ya. Mifala i tok blong wekemap olgeta. Olgeta ya oli mas holem stret fasin, nao oli mas hadwok long han blong olgeta blong kasem kakae blong olgeta.”​—2 Tesalonaeka 3:​10-​12.

Be, i gat moa samting long laef i bitim wan wok mo pei blong hem. Olgeta we oli wantem kasem plante tumas samting mo haenem, ating sloslou, bambae oli no moa glad long samting we oli gat, nao maet oli faenemaot se oli stap “traem blong kasem win nomo.” (Eklesiastis 1:​14) Bitim we ol papa mama oli pulum ol pikinini blong olgeta blong traem kasem haenem mo plante samting, i moagud we oli halpem ol pikinini ya blong luksave olsem wanem tok ya we God i givim long aposol Jon i waes. Hem i se: “I nogud yufala i stap laekem ol fasin blong wol mo ol samting we oli stap long hem. Bambae yufala i no mekem olsem. Man we i laekem tumas ol fasin blong wol, hem i no save laekem Papa blong yumi. Ol fasin ya we i stap long wol oli olsemia. Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ya, oli no kamaot long Papa blong yumi, oli stap kamaot long wol ya nomo. Mo wol ya wetem ol samting we ol man blong hem oli wantem oli stap lus. Be man we i stap mekem ol samting we God i wantem, hem i stap we bambae i no save lus samtaem.”​—1 Jon 2:​15-​17.

?Olsem Wanem Yu Save Mekem Olgeta Oli Haremgud Long Filing?

I gud ol papa mama oli mekem olsem ol man we oli trenem ol narafala long spot. Ol man ya oli no jes givhan long ol man blong spot blong kam strong moa long bodi, we oli save ron kwik, no jyam hae. No gat. Ating bambae oli givhan long olgeta blong winim enikaen nogud tingting tu, maet from we oli ting se oli no naf no wan narafala samting olsem. Long rod ya, bambae oli mekem olgeta oli haremgud long filing blong olgeta. Long saed blong ol pikinini blong yu, ?olsem wanem yu save leftemap tingting blong olgeta, givim paoa long olgeta, mo halpem olgeta blong gat gudfala tingting we bambae i pusum olgeta blong gohed?

Tingbaot Rogério, wan yangfala we i gat 13 yia. From we hem i kasem ol yia we plante jenis oli kamaot long bodi blong yangfala, filing blong hem i olbaot. Antap long samting ya, hem i harem nogud from we papa mama blong hem tufala i no stap joengud, mo tufala i no storeyan plante wetem hem. ?Olsem wanem blong givhan long ol yangfala olsem? I tru se i no gat rod blong protektem ol pikinini blong yu long olgeta wari mo nogud samting we oli save gat paoa long olgeta. Be nating se i olsem, yu neva mas lego wok blong yu olsem wan papa no mama. Wetem fasin we yu no protektem pikinini blong yu bitim mak, yu save stretem hem long kaen fasin mo soem se yu kasem save long filing blong hem. Oltaem yu mas rimemba se ol wanwan pikinini oli defdefren. Sipos yu soem kaen fasin mo lav, yu save givhan bigwan long yangfala blong yu, blong hem i harem se i stap sefgud. Samting ya bambae i mekem se taem hem i gruap, bambae hem i no harem se hem i no naf blong mekem wan gudfala samting, mo bambae hem i no gat problem ya we i no tinghae long hem wan.

Nating se papa mama blong yu i bin mekem yu yu haremgud long filing blong yu no nogat, i gat tri samting we oli save halpem yu blong kam wan papa no mama we i givhan gud long pikinini blong yu: (1) Yu no mas stap tingting tumas long ol prapa trabol blong yu, mekem se yu no lesin long ol smosmol problem blong pikinini blong yu; (2) traehad blong storeyan evri dei wetem ol pikinini blong yu, long fasin we i glad mo long ol samting we oli impoten; (3) halpem hem blong gat wan gudfala tingting blong traem winim ol problem, mo blong traem joengud wetem ol narafala man.

Birgit i tingtingbak long ol yia blong yangtaem blong hem, nao hem i se: “Mi mi bin lanem se yumi no save jenisim ol man blong oli kam olsem yumi wantem. Mama blong mi i bin toktok wetem mi mo i soem se sipos mi luk wan fasin long narafala we mi no laekem, mi mas lukaotgud blong no gat semfala fasin ya. Mo hem i bin talem tu se, taem mi yangfala yet, hemia nao taem blong jenisim ol fasin blong mi.”

Be, ol pikinini blong yu oli no jes nidim wan wok, mo blong haremgud long filing blong olgeta nomo. Yu save tingbaot se: ‘?Mi mi luk wok blong papa no mama olsem wan wok we God i givim long mi?’ Sipos yes, bambae yu glad blong givim ol samting we pikinini blong yu i nidim long saed blong speret.

Sam Rod Blong Givim Ol Samting Long Saed Blong Speret

Long bigfala toktok blong Jisas Kraes antap long hil, hem i se: “Man we i luksave se hem i nidim ol samting long saed blong speret, bambae hem i haremgud, from we kingdom blong heven i blong hem.” (Matyu 5:​3, NW) ?Wanem i joen wetem fasin blong kasem ol samting we yumi nidim long saed blong speret? Taem ol papa mama oli soemaot wan gudfala eksampel long saed blong bilif long Jeova God, samting ya i save givhan bigwan long ol pikinini blong olgeta. Aposol Pol i raetem tok ya se: “Sipos man i no bilif long God, hem i no save mekem God i harem gud. From we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” (Hibrus 11:6) Be, blong gat bilif we i dip mo tru, yumi mas prea. (Rom 12:12) Sipos yu luksave se yu nidim ol samting long saed blong speret, bambae yu askem God blong givhan long yu. Hemia samting we papa blong pikinini ya we i kam Jaj Samson long Isrel, i mekem. (Jajes 13:8) Bambae yu no jes prea nomo, be bambae yu ridim Tok blong God, Baebol tu, blong kasem advaes.​—2 Timote 3:​16, 17.b

Nating se i hadwok blong lidimgud pikinini blong yumi, mekem hem i haremgud long filing blong hem, mo givhan long hem long saed blong speret, be wok blong papa mama i save givim bigfala glad. Wan papa long Brasil we i gat tu pikinini, i talem se: “Mi no save tingbaot se i olsem wanem blong no gat pikinini. I gat plante tumas gudfala samting we yumi save serem wetem olgeta.” Mama blong tufala pikinini ya i tokbaot from wanem tufala oli stap gohed gud, i se: “Oltaem mifala i stap tugeta, mo mifala i traem mekem laef i glad mo haremgud tugeta. Samting we i moa impoten, oltaem mitufala i prea from ol pikinini blong mitufala.”

Priscilla i tingtingbak long lav mo longfala tingting we papa mama blong hem i bin soemaot taem i gat wan problem i kamaot. Hem i se: “Tufala i trufala fren blong mi mo tufala i givhan long mi long evri samting. Taem mi mi pikinini, mi rili harem se tufala i tingbaot mi olsem ‘wan presen we Jeova i givim.’ ” (Ol Sam 127:3) Yu save mekem olsem plante narafala papa mama, mo makemaot taem blong ridim Baebol mo sam narafala Kristin buk wetem ol pikinini blong yu. Storeyan wetem glad long ol rul mo store blong Baebol. Samting ya i save halpem pikinini blong yu blong suagud long tingting blong hem, mo blong gat wan trufala hop blong fyuja.

Taem We Ol Pikinini Bambae Oli Harem Se Oli Stap Sef

Tede, i luk olsem se plante pikinini oli no save gat wan gudfala fyuja. Be, Baebol i promes se i no longtaem, bambae wol ya i kam wan ples we i sefgud blong ol man oli stap long hem. !Tingbaot nyufala wol we God i promes long hem! !Long taem ya, bambae ol papa mama oli no moa nidim blong wari se pikinini blong olgeta i no sef! (2 Pita 3:​13) Traem tingbaot taem ya we nambawan profet tok ya bambae i kamtru, se: “Wael dog bambae i stap smoltaem wetem smol sipsip, mo bambae lepad i slip kolosap long pikinini nani, mo pikinini buluk mo yangfala laeon mo anamol we i fatfatgud, bambae oli stap tugeta. Mo wan smol boe nomo bambae i lidim olgeta.” (Aesea 11:6) Fasin blong stap sefgud we ol tok ya oli soemaot, i kamtru finis tede long saed blong speret, long medel blong olgeta we oli mekem wok blong Jeova. Taem yu stap joen wetem olgeta, bambae yu harem se God i rili laekem yu mo i kea long yu. Sipos yu soemaot se yu laekem God, yu save sua se bambae hem i kasem save long filing blong yu olsem wan papa no mama, mo bambae hem i givhan long yu blong winim ol wari mo traem. Stadi long Tok blong God mo putum tingting blong yu i stap strong long Kingdom blong hem.

Soem wan gudfala eksampel. Olsemia, yu save givhan long ol pikinini blong yu blong wokbaot long rod we i go kasem laef blong olwe. Sipos yu mekem Jeova God i kam wan sefples blong haed, fyuja blong yu mo fyuja blong ol pikinini blong yu bambae i gud moa i bitim samting we yu save tingbaot. Yu save gat semfala strong bilif olsem man blong raetem Ol Sam, we i singsing se: “Haremgud long Jeova, nao bambae hem i givim ol samting we yu yu wantem tumas long hat blong yu.”​—Ol Sam 37:​4, NW.

[Ol futnot]