?Meri i Ded From Ol Samting Olsem Sik Mo Olfala We Oli Kasem Olgeta Man?

NYUSPEPA blong Vatikan, L’Osservatore Romano, i tokbaot Katolik tijing ya blong Asamsen, i talem se: “Vejin ya we i no gat sin, mo we i fri long eni fol we i kamaot from sin blong Adam, hem i go antap long gudfala laef long heven wetem bodi mo sol blong hem, taem laef blong hem long wol ya i finis.” Nyuspepa ya i talem se tijing ya i pusum sam man we oli mekem dip stadi long saed blong Katolik skul, blong talemaot se Meri “i no ded mo wantaem nomo, hem i livim laef long wol blong go antap long gudfala laef long heven.”a

I no longtaem i pas, Pop Jon Pol 2 i tokbaot tijing ya long wan fasin we i defren. Long Bigfala Miting blong Vatikan, long Jun 25, 1997, hem i talem se: “Nyutesteman i no talem olsem wanem Meri i ded. Samting ya i pulum yumi blong bilif se Meri i ded from ol samting we oli kamaot long yumi evriwan, olsem sik mo olfala, taswe i no gat wan impoten toktok i kamaot long saed ya. . . . Sam man oli talem se Meri i no ded olsem ol narafala man, be oli no gat wan pruf nating blong soemaot samting ya.”

Ol tok blong Pop Jon Pol oli soemaot klia se i gat wan mastik long tijing ya se ‘Meri i no gat sin taem hem i bon.’ Sipos mama blong Jisas i rili “fri long eni fol we i kamaot from sin blong Adam,” ?olsem wanem hem i ded from “ol samting olsem sik mo olfala we oli kasem yumi evriwan,” tru long sin we Adam i pasem long yumi? (Rom 5:​12) Trabol long saed blong tijing ya i kamaot from we Katolik Jyos i gat wan rong tingting long saed blong mama blong Jisas. Yumi no sapraes se kwestin ya i seraotem Katolik Jyos, mo i mekem se tingting blong plante Katolik i fasfas.

Baebol i soemaot se Meri i gat tingting daon, strong bilif, mo i strong long wosip blong hem. Be Baebol i no talem se Meri i wan “vejin we i no gat sin taem hem i bon.” (Luk 1:​38; Ol Wok 1:​13, 14) Baebol i talem nomo se: “Olgeta evriwan oli mekem nogud finis, mo oli stap longwe long ol gudgudfala fasin blong God.” (Rom 3:​23) Yes, Meri i bon wetem sin mo hem i no stretgud olgeta, sem mak olsem ol narafala man, mo i no gat wan samting we i pruvum se hem i no ded from ol samting olsem sik mo olfala we kasem yumi evriwan.—Skelem wetem 1 Jon 1:⁠8-​10.

[Futnot]