?I Fol Blong Hu?

Plante man, taem oli kasem trabol, oli talem se i fol blong God. Wan proveb blong Baebol i talem se: “Krangke fasin blong wan man i spolemgud laef blong hem, mo biaen hem i kros long Masta.” (Proveb 19:3, The New English Bible) Be fasin ya blong talem se God i stampa blong ol trabol blong ol man, i sem mak long fasin blong blemem wan kampani blong wokem trak from plante aksiden we oli kamaot taem ol draeva oli drong.

Tru long Tok blong hem, Baebol, God i givim ol nambawan advaes blong lidim ol man. Taem yumi stadi long laebri ya blong God, mo yumi folem ol loa mo ol rul we laebri ya i soem, yumi save ronwe long plante trap long laef blong yumi. Be sipos yumi no folem ol advaes we God i givim blong lidim yumi, bambae yumi kasem plante trabol. Eksampel, plante taem, ol man we oli kakae bitim mak, oli smok, oli dring bitim mak, mo oli mekem nogud long saed blong seks, oli harem nogud from plante bigfala trabol long saed blong helt. (Luk 21:34; 1 Korin 6:​18; 2 Korin 7:1) Kristin aposol Pol i raetem se: “Wanem sid we man i planem fastaem long garen blong hem, be frut blong hem nomo, man ya bambae i mas kakae. Sipos man i planem rabis fasin we tingting blong hem i wantem, rabis fasin ya blong hem bambae i givim kakae long hem, we i ded nomo. Be sipos hem i planem fasin we Tabu Speret i wantem, Tabu Speret bambae i givim kakae long hem, we i no save finis.”—Galesia 6:⁠7, 8.

!I moagud blong folem ol loa mo ol rul blong God long laef blong yumi! Sipos yumi mekem olsem, ol nambawan promes ya we God i yusum profet Aesea blong talem, bambae oli kamtru long yumi, se: “Mi, Jeova, mi mi God blong yu, God ya we i stap tijim yu blong givhangud long yu. Mi mi stap mekem yu yu wokbaot long rod ya we yu yu mas wokbaot long hem. !Mi mi wantem tumas we yu lesingud long ol oda blong mi! Sipos yu mekem olsem, bambae pis blong yu i kam olsem wan bigfala reva, mo stret fasin blong yu bambae i kam olsem ol wef blong solwora.”​—Aesea 48:17, 18.