?Wanem Kaen Nem We Yu Yu Gat?
SAMTAEM Baebol i yusum tok ya “nem” blong soemaot se fasin blong wan man i olsem wanem. Eksampel, waes King Solomon i raetem se: “Sipos yu yu gat gud nem long fes blong ol man, hemia i gud moa long yu, i winim we yu putum gudfala senta ya we praes blong hem i antap tumas. Nao dei ya we bambae yu yu ded long hem bambae hem i bigfala dei ya we yu yu bon long hem.” (Prija 7:1; skelem wetem Proveb 22:1.) Ol tok ya blong Solomon oli soemaot se wan man i no bon wetem wan gud nem. Be, tru long ol samting we oli hapen long laef, wanwan man bambae i kasem wan nem long fes blong ol narafala man, we i laenap wetem fasin blong hem. Nem we hem i gat long fes blong ol man, i laenap wetem ol fasin we hem wan i stap soem. Maet hem i gat fasin blong givim wetem gladhat no hem i tingbaot hem wan nomo, maet hem i gat fasin sore no hem i strong tumas, maet hem i gat tingting daon no hem i flas, mo maet hem i gat stret fasin no rabis fasin.
Tingbaot eksampel blong Deved. Taem hem i king, hem i soemaot se hem i gat strong tingting mo hem i holemstrong long God. Long semtaem, Deved i luksave ol mastik blong hem mo i tanem tingting blong hem long ol bigfala sin we hem i mekem. Taswe, i stret nomo we profet blong Jeova i talem se Deved i wan “man we i stret gud long fes blong [God].” (1 Samuel 13:14) Yes yangfala Deved i gat wan gud nem finis wetem God.
Joram, wan King blong Judia i defren. King ya i kasem wan nogud nem from we hem i pulum ol man we oli stap aninit long rul blong hem blong oli lego wosip blong Jeova, mo tu hem i kilim i ded sikis brata blong hem mo samfala prins blong Judia. Ale, Jeova i panisim hem wetem wan strong sik, we i mekem hem i safa bigwan gogo hem i ded. Baebol i talem se Joram i “gowe mo i no gat wan man we i wantem tumas blong luk hem bakegen,” no olsem Today’s English Version i talem, “taem hem i ded, i no gat wan man nating i sore long hem.”—2 Kronikel 21:20.
Ol samting we oli hapen long laef blong Deved mo Joram oli soemaot se tok blong Proveb long Baebol i tru, se: “Gudfala man, sipos hem i ded, bambae ol man oli stap tingbaot hem longtaem, from we Hae God i bin yusum hem blong blesem olgeta, be man nogud, bambae i no longtaem, ol man oli fogetem hem.” (Proveb 10:7) Taswe, yumi evriwan i mas tingting gud long kwestin ya se: ‘?Wanem kaen nem we mi mi stap karem long fored blong God mo ol man we oli stap raonabaot long mi?’