Taetas “Wan Brata We i Wok Blong Givhan Long Yufala”

SAMTAEM, sam problem oli kamaot long Kristin kongregesen long faswan handred yia. Ol brata oli mas stretem ol problem ya, mo blong mekem olsem oli nidim strong tingting mo fasin obei. Wan man we i stretem plante problem olsem, hemia Taetas. Hem i wan long olgeta we oli wok wetem aposol Pol, mo hem i traehad blong halpem ol narafala blong mekem ol samting olsem we Jeova i wantem. Taswe Pol i talem long ol Kristin long Korin se Taetas i ‘wan brata we i wok blong givhan long olgeta.’​—2 Korin 8:​23.

?Hu ya Taetas? ?Olsem wanem hem i givhan blong stretem sam problem? ?Mo yumi save lanem wanem samting taem yumi tingbaot ol fasin blong hem?

Kwestin Long Sakomsaes

Taetas i wan man Gris mo hem i no sakomsaes. (Galesia 2:3)a Ating Pol i bin tijim Taetas long saed blong trutok, from we hem i tokbaot Taetas olsem ‘stret pikinini blong hem, long fasin ya blong bilif we tufala i joen long hem.’ (Taetas 1:4; skelem wetem 1 Timoti 1:2.) Taetas i stap wetem Pol, Banabas, mo ol narafala brata blong Antiok, Siria, taem oli go long Jerusalem raonabaot long 49 K.T.,b blong tokbaot kwestin blong sakomsaes.​—Ol Wok 15:​1, 2; Galesia 2:1.

Ating Taetas i go long Jerusalem wetem ol narafala aposol ya blong stretem toktok long saed blong ol hiten man we oli kam Kristin be oli no sakomsaes. Taetas i save pruvum se God i glad long eni man, ol man Jyu mo ol hiten man tu, nating sipos oli sakomsaes no nogat. Sam Kristin brata long kongregesen blong Jerusalem, we bifo oli ol Farisi, oli stap talem se ol hiten man oli mas sakomsaes mo oli mas folem Loa sipos oli wantem kam Kristin. Be tingting ya i no stanap. Sipos oli fosem Taetas mo ol narafala hiten man blong sakomsaes, hemia i min se oli stap agensem trutok ya se, God i sevem ol man from kaengud fasin blong hem mo from bilif long Jisas Kraes, be i no from we ol man oli mekem ol wok we Loa i talem. Mo tu, oli soem se oli sakemaot pruf we i soemaot se ol hiten man, no ol man blong narafala kantri, oli kasem tabu spirit blong God finis.​—Ol Wok 15:​5-​12.

Oli Sanem Taetas Long Korin

Afta we hed kampani i stretem kwestin blong sakomsaes, ol brata oli givim wok long Pol mo Banabas blong go prij long ol man we oli no laen blong Isrel. Long semtaem, tufala ya i gat strong tingting blong no fogetem ol puaman. (Galesia 2:​9, 10) Sikis yia biaen, Baebol i tokbaot Taetas bakegen, taem Pol i sanem hem i go long Korin blong mekem wan kleksin blong givhan long ol tabu brata mo sista. Taem Taetas i go mekem wok ya, hem i faenem se plante brata oli wari from wan samting.

Fastaem we Pol i sanem leta blong hem i go long ol Kristin long Korin, hem i raetem se oli “no mas joen wetem ol man we oli stap mekem ol fasin nogud wetem woman.” Hem i talem long olgeta blong putumaot wan man we i slip wetem wan woman we i no woman blong hem, mo i no wantem tanem tingting blong hem. Yes, Pol i raetem wan strongfala leta long olgeta, mo ‘hem i krae tumas’ taem hem i raetem leta ya. (1 Korin 5:​9-​13; 2 Korin 2:4) Long sem taem, Pol i sanem Taetas i go long Korin blong mekem kleksin long ples ya, blong givhan long ol Kristin blong Judia we oli nidim help. Mo tu, ating Pol i sanem Taetas blong save wanem we ol Kristin blong Korin bambae oli mekem taem oli kasem leta blong hem.​—2 Korin 8:​1-6.

?Ol Kristin blong Korin oli mekem wanem taem oli kasem advaes blong Pol? Ating Pol i wari tumas long samting ya, taswe hem i sanem Taetas i aot long Efesas mo i krosem Aejian Si, go kasem Korin, blong luk wanem i hapen mo sanem ripot i kambak long hem kwiktaem. Long kantri ya, long kol taem (we i stat long medel blong manis Novemba), ol sip oli stap angka nomo long haba. Taswe, sipos Taetas i finisim wok blong hem bifo long taem ya, hem i save tekem sip blong mitim Pol long ples we tufala i jusum finis, long Troas, no hem i save wokbaot long longfala rod we i pas tru long Hellespont. Pol i bin plan blong stap smoltaem long Efesas, be ol man blong wokem silva oli statem wan rao agensem hem, mo hem i mas aot long ples ya. Taswe, ating hem i kasem Troas bifo long Taetas. Pol i wari tumas, mo hem i wet longtaem lelebet long Troas. Be taem hem i kasem save se bambae Taetas i no tekem sip blong kam long Troas, hem i stat blong wokbaot long rod, blong faenem hem kwiktaem moa, samples long rod. Taem hem i kasem Yurop, i sua se Pol i tekem rod ya ‘Via Egnatia,’ mo biaen, hem i mitim Taetas long Masedonia. Tingting blong Pol i no moa trabol mo hem i glad tumas blong harem se Taetas i karem sam gudfala nius long saed blong Korin. Kongregesen ya i obei gud long ol advaes blong aposol Pol.​—2 Korin 2:​12, 13; 7:​5-7.

Pol i wari blong save olsem wanem ol Kristin blong Korin bambae oli welkamem Taetas. Be God i givhan long Taetas blong mekemgud wok blong hem. Ol brata mo sista blong Korin oli ‘fraet, oli stap seksek,’ be oli glad blong tekem Taetas i go long haos blong olgeta. (2 Korin 7:​8-​15) W. D. Thomas, wan man blong eksplenem Baebol, i talem se: “Yumi save ting se Taetas i givhan long ol Kristin blong Korin wetem gudhan mo waes fasin. Taetas i no traem haedem ol strong tok blong Pol. Be hem i soem se Pol i tok strong olsem ya from we hem i wantem se olgeta oli stap strong long saed blong spirit.” Taem Taetas i stap long Korin, hem i stat blong laekem tumas ol Kristin blong ples ya from we oli gat fasin obei mo oli jenisim ol fasin blong olgeta. Ol nambawan fasin blong olgeta oli leftemap tingting blong hem.

?Olsem wanem long narafala wok we Taetas i mas mekem long Korin, hemia wok blong mekem kleksin blong halpem ol tabu Kristin long Judia? Ol save we yumi faenem long 2 Korin oli soem se Taetas i mekem gud wok ya tu. Maet Pol i raetem leta ya long Masedonia, long en blong yia 55 K.T., smoltaem afta we hem i mitim Taetas. Pol i raetem se Taetas, we i statem kleksin ya, i gobak long Korin wetem tu brata we yumi no save nem blong tufala, we bambae tufala i halpem hem blong finisim wok ya. Taetas i rili intres long ol man Korin, taswe hem i glad tumas blong gobak long olgeta. Taem Taetas i wokbaot blong go long Korin, i sua se hem i karem namba tu leta we Pol i raetem long ol Kristin blong Korin.​—2 Korin 8:​6, 17, 18, 22.

Taetas i wan gudfala man blong wokem plan, mo tu, hem i wan man we ol narafala oli save trastem blong stretem sam problem we oli no isi blong stretem. Hem i no fraet, hem i bigman long saed blong tingting, mo hem i stanap strong. Pol i luksave se Taetas i naf blong stretem ol smosmol traem we oli stap kam antap bigwan long Korin from “ol aposol we oli stap talem se oli nambawan.” (2 Korin 11:5) Yumi luksave ol gudfala fasin ya blong Taetas bakegen, taem Baebol i tokbaot hem long wan narafala bigfala wok we hem i kasem.

Long Aelan Blong Krit

Samtaem bitwin long yia 61 mo 64 K.T., Pol i raet long Taetas, we i stap wok long aelan blong Krit, long Mediterenian Si. Pol i bin lego Taetas i stap long ples ya blong “mekem ol wok ya we i stap yet,” mo blong “putumap ol elda blong jos long evri ples.” Long taem ya, ol man oli save gud ol man Krit olsem ol “man blong giaman oltaem, olsem anamol we oli nogud olgeta, mo olsem man blong les we oli wantem stap kakae oltaem nomo.” Taswe, Taetas i wok long Krit wetem fasin no fraet mo strong tingting. (Taetas 1:​5, 10-​12) Hemia wan wok we i impoten tumas, from we bambae i mekem se Kristin skul i gohed moa long aelan ya. Tabu spirit i pusum Pol blong halpem Taetas blong luksave wanem ol gudfala fasin we ol brata oli mas gat blong kam elda. Tede yet, ol brata oli mas soem ol sem gudfala fasin blong kam elda long kongregesen.

Baebol i no talem wetaem Taetas i livim Krit. Hem i stap long ples ya longtaem lelebet from we Pol i askem hem blong givhan long Sinas mo Apolos, we tufala bambae i pastru long Krit, long wan trep blong tufala, we Baebol i no talem stret taem blong hem. Be Taetas i no stap longtaem moa long aelan ya. Pol i mekem plan blong sanem Atemas no Tikikas i go long ples ya, mo hem i askem Taetas blong mitim hem long Nikopolis, wan bigfala taon long notwes blong Gris.​—Taetas 3:​12, 13.

Long laswan taem we Baebol i tokbaot Taetas, yumi lanem se maet raonabaot long 65 K.T., Pol i sanem hem i go long wan narafala ples. Taetas i go long Dalmesia, wan kantri we naoia oli kolem Kroasia, long is saed blong Adriatik Si. (2 Timoti 4:​10) Baebol i no talem wanem samting Taetas i mekem long ples ya, be samfala oli talem se Pol i sanem Taetas blong stretem sam trabol blong kongregesen mo blong mekem wok blong misinari. Sipos i olsem, Taetas i mekem wan wok we i sem mak long hemia we hem i mekem long Krit.

!Yumi talem tangkiu tumas long Jeova from ol gudfala Kristin elda we oli bigman long saed blong spirit olsem Taetas! Oli gat klia save long ol rul blong Baebol, mo strong tingting blong olgeta blong folem ol rul ya, i halpem kongregesen blong stanap strong long saed blong spirit. I gud yumi folem bilif blong olgeta ya, mo yumi wok strong olsem Taetas blong givhan long Kristin brata sista blong yumi long saed blong spirit.​—Hibrus 13:7.

[Ol futnot]

[Tok Blong Pija Long Pej 31]

Taetas i wan Kristin brata we i gat strong tingting blong givhan long ol Kristin blong Korin mo long plante narafala ples tu