“Tijimgud Pikinini Blong Yu”

SIPOS yu wantem wokemgud garen blong yu, i no naf blong sakem sid long graon mo kambak sam manis biaen blong tekem ol kakae long garen. Yu yu mas wokhad blong tantanem graon, planem ol sid, givim wora mo karemaot ol rabis gras blong oli save grugud.

Fasin ya i save stap olsem wan gudfala pijatok we i soemaot se tok blong Proveb 22⁠:6 i tru tumas se: “Sipos yu tijimgud pikinini blong yu long fasin we i stret blong hem i folem, taem hem i kam bigman, bambae i no save gowe long hem.” Yes, hadwok blong papa mama i impoten tumas blong trenemgud ol pikinini.

Be long wol blong naoia we i agri long enikaen nogud fasin nomo, plante papa mama oli no folem advaes ya. I gat sam papa mama we oli ting se yumi mas letem ol pikinini oli lan blong winim ol problem blong olgeta nomo. Be fasin ya i wan denja long ol yangfala from we i mekem se i isi nomo long olgeta blong folem ol man olbaot we oli no gat gudfala fasin mo we oli agensem ol stretfala rul.​—Ol Proveb 13:⁠20.

!I moagud ol papa mama oli tijim ol pikinini blong olgeta long ol rul blong Jeova taem oli smol yet! ?I mas stat long wanem taem? Aposol Pol i talem se: “Taem oli pikinini yet”. I hapen olsem wetem yangfala man ya Timoti. Mama blong hem Yunis mo bubu blong hem Loes, tufala i tijimgud “ol tok blong Baebol” long hem, mo oli tajem hat blong Timoti, taswe Timoti i ‘bilif gud long tijing ya.’ ?Wanem frut i kamaot from? Fasin ya i wan impoten samting we i mekem Timoti i kam “waes. . . mo i lidim hem blong stanap strong long bilif blong Jisas Kraes, blong God i save sevem hem.”​—⁠2 Timoti 1⁠:5; 3:14, 15.

Sem mak tede, ol papa mama we oli “no kam slak blong mekem ol gudfala fasin” bambae oli karem plante blesing from ‘ol hadwok blong olgeta.’ (Galesia 6:9) Waes King Solomon i talem se: “Pikinini we fasin blong hem i stret, papa blong hem i save glad tumas from.”​—Ol Proveb 23:24.