?Yu Stap Tingbaot Mared?
Sipos yumi tekem pija tok blong wan etkwek, blong tokbaot ol divos long ful wol, i olsem se Yunaeted Stet nao i ples we etkwek ya i strong moa bitim ol narafala ples. Long wan yia we i pas i no longtaem, bitim wan milyan mared i seraot long kantri ya, i olsem se wan mared i seraot long evri tu menet. Ating yu save finis se, i no long Yunaeted Stet nomo we ol mared oli fesem bigfala trabol.
WAN stadi i soem se stat long yia 1970, namba blong ol divos long Kanada, Engglan mo Wels, Franis, Gris mo Holan, oli go antap tu taem.
I klia se, bighaf blong ol man mo woman we oli mared, oli laeklaekem olgeta mo oli wantem stap tugeta, long ful laef blong olgeta. Be sore tumas, from we plante taem tingting ya blong kasem wan gudfala mared, i wan drim nomo. Taem oli kasem save wanem ya mared, samfala oli talem se oli bin mared kwiktaem tumas, no oli mared long wan we i no stret long olgeta, no maet oli bin mekem tufala mastik ya wantaem.
?From wanem plante mared oli brok? Wan woman, we i raetem wan buk long saed blong fasin fren bitwin ol boe mo gel, i talem se: “Stamba risen, hemia se oli no rere. Taem mi toktok wetem ol man mo woman we oli mared mo oli fesem trabol long mared blong olgeta, tu filing oli kamaot long mi—fasin sore mo fasin kros. Mi sore long olgeta from we oli no kasem mak blong olgeta blong haremgud taem oli joen tugeta. Mo mi kros from we oli no naf blong kasem save se mared i no wan isi samting.”
Tru ya, plante man we oli wantem mared, oli gat smol save nomo, no oli no gat save nating, long saed blong olsem wanem blong mekem mared blong olgeta i wokgud. Be, yumi no sapraes long samting ya. Wan tija i talem se: “Olgeta pikinini blong yumi we oli go long hae skul, oli save stadi fasin blong ol rat mo bigae, be oli no lanem wan samting long saed blong fasin blong wan hasban mo waef.”
?Yu yu gat tingting blong mared? no ?Yu yu stap tingbaot mared we yu stap long hem naoia? Sipos i olsem, yu mas kasem save klia se, trufala fasin blong joengud long mared i defren long ol stori we oli kamaot long sinema, long televisin, mo long ol buk we oli tokbaot lav. Nating se i olsem, i tru se mared blong tu man we oli bigman finis long tingting mo we oli rili laekem tufala, hemia wan blesing we i kamaot long God. (Proveb 18:22; 19:14) Taswe, ?Olsem wanem blong suagud se yu rere blong mared? ?Yu mas tingbaot wanem samting taem yu jusum wan man no woman? Mo sipos yu mared finis, ?Olsem wanem yu save mekem se yu faenem moa glad oltaem, long mared blong yu?