?Yu Yu Laekem Laef?
“LETEM mi mi luk laet.” Hemia ol tok we Giacomo Leopardi, wan man Itali we i raetem ol naesfala vas. Hem i talem tok ya long olgeta ya we oli stap lukaot long hem jes bifo we hem i ded. Ol tok ya oli soemaot klia se ol man oli wantem stap laef, oli no wantem ded. Long tingting blong man, laef i olsem laet.
Fasin ya blong laekem laef i impoten tumas from we hem i save pusum man blong stap longwe long ol denja mo blong mekem olgeta samting we hem i naf blong mekem blong stap laef. Tingting ya we man i gat, i no defren tumas long ol anamol, we olgeta tu oli no gat strong tingting ya blong no wantem ded.
Be, ?wanem kaen laef i rili gud mo i mekem se man i haremgud long hem? Laef i no jes minim fasin blong pulum win mo wokbaot. Mo tu, laef i no jes wan taem we man i gat blong tekem evri jans blong harem gud bifo we hem i ded. Nogat. Tijing blong Epicurus, we i talem se “i gud yumi gohed, yumi kakae, yumi dring, from we tumora bambae yumi ded,” i no karem glad long man tu. (1 Korin 15:32) I gat plante samting we man i nidim long saed blong bodi. Be man i gat intres tu long ol defren kaen kastom, mo fasin blong laef. Mo tu, hem i gat sam nid long saed blong spirit we oli joen wetem bilif long wan God we i Hae Olgeta. Be, sore tumas, plante milyan man oli no harem gud long olgeta samting long laef. Ol trabol we oli kamaot long plante kantri long wol oli mekem se plante man oli safa. Ol man oli stap traehad jes blong kasem ol samting long saed blong bodi—kakae, dring, kasem plante sas samting, haremgud long saed blong seks. Laef blong olgeta i klosap sem mak nomo wetem laef blong ol anamol. Oli no kasem trufala glad from wan laef olsem. Yes, oli no yusum ol impoten samting we laef i givim blong mekem filing mo tingting blong olgeta i haremgud. Antap moa, olgeta ya we oli traem kasem ol samting we olgeta nomo oli wantem blong haremgud long bodi, oli no rili kasem ol blesing we laef i save givim be oli spolem laef blong ol man raonabaot long olgeta, mo tu, oli no kea long samting we ol narafala oli laekem.
Wan jaj we i stap stretem ol bisnes wetem ol yangfala we oli brekem loa, i sapotem tingting ya. Hem i talem se “ol man oli no moa save wanem samting i gud mo wanem samting i nogud, oli tinghae mo oli leftemap ol man we oli gat rabis fasin, mo oli mekem olkaen kruked fasin blong kam rij kwiktaem.” Olgeta fasin ya oli “sapotem tingting ya we man i wantem winim narafala.” Mo tu, oli stap spolem fasin blong laef blong ol narafala man, mo oli pulum plante yangfala blong mekem stronghed, antap moa taem oli tekem drag.
Yufala i save se i gat plante kaen samting long laef we man i save haremgud long hem—spel long ol naesfala ples, rid no stadi, kampani wetem ol gudfala fren, lesin long ol naesfala myusek. Be, i gat sam narafala samting bakegen we oli save mekem man i glad. Olgeta we oli bilif strong long God, antap moa long God ya we Baebol i tokbaot, hemia Jeova, oli gat moa risen blong laekem laef. Trufala bilif i givim paoa mo pis we i save halpem ol man blong winim ol hadtaem. Ol man we oli stap bilif long Trufala God oli save talem se: “Hae God i stap givhan long mi, nao bambae mi mi no save fraet.” (Hibrus 13:6) Ol man we oli luksave se God i gat lav, oli luksave tu se God i lavem olgeta. Ale, olgeta ya oli soemaot long God se oli lavem hem, fasin ya i karem bigfala glad i kam long laef blong olgeta. (1 Jon 4:7, 8, 16) Oli save gat wan laef we i bisi long ol gudfala wok we i blong givhan long ol narafala. Hemia wan stamba rod blong harem gud long laef, olsem Jisas i talem: “Man we i stap givim presen i go, hem i save harem gud moa, i winim man we i stap kasem presen blong hem.”—Ol Wok 20:35.
Be sore tumas, i gat sam narafala samting tu we oli hapen long laef. Plante man oli stap safa, i gat fasin blong mekem i no stret, fasin pua, sik, mo ded—hemia i jes sam long ol nogud samting we oli stap mekem se plante taem i no isi blong haremgud long laef. Waes King Solomon blong Isrel bifo, i rij mo i gat paoa, hem i gat olgeta samting we i save mekem man i glad. Be, i gat wan samting we i mekem hem i harem nogud. Hem i kasem save se, taem hem i ded, bambae hem i mas lego ol gudfala samting we hem i kasem from ‘hadwok’ blong hem. Olgeta samting ya we hem i mekem “long olgeta waes mo save mo gudhan” blong hem, bambae hem i mas lego blong narafala man i harem gud long hem.—Prija 2:17-21.
Olsem King Solomon, plante man oli luksave se laef i sot mo i finis kwiktaem nomo. Baebol i talem se God ‘i putum laef blong olwe long tingting blong yumi.’ (Prija 3:11, Byington) Tingting ya blong wantem laef olwe, i mekem man i luk laef se hem i sot tumas. Sloslou ol yia oli pas, nao from we man i no faenem mining blong laef mo ded, oli stat wari mo harem nogud tumas. Samting ya i save mekem man i stap sore nomo long laef blong hem.
?I gat ansa long ol kwestin blong man? ?Bambae i gat wan rod blong mekem laef i kam gud moa mo i stap longtaem?