Oli “Stap Ona Long God”

TAEM ol man Isrel oli stap slef long Ijip, i gat tu woman Hibru, Sifraha mo Pua, we tufala i stap givhan long ol woman blong bonem pikinini. Tufala ya i fesem wan bigfala traem. Fero i no wantem se namba blong ol man Jiu i go antap i bitim namba blong ol man Ijip. Taswe, hem i talem long tufala woman ya se: “Taem yutufala i stap givhan long ol woman blong yufala we oli stap bonem pikinini, sipos yutufala i luk se pikinini i boe, yutufala i mas kilim hem i ded.”​—Eksodas 1:​15, 16.

Sifraha mo Pua tufala i “stap ona long God.” Ale, tingting blong tufala i strong, mo “tufala i no save mekem olsem we king i talem.” Tufala i letem ol pikinini boe oli stap laef, nating se fasin ya i save mekem se tufala i lusum laef blong tufala. From we tufala i sevem laef blong ol pikinini ya, Jeova “i mekem i gud long tufala,” mo i blesem tufala.​—Eksodas 1:​17-​21.

Stori ya i makem klia se, Jeova i soem tangkiu long ol man we oli stap mekem wok blong hem. Maet Jeova i save talem se, strong tingting we Sifraha mo Pua tufala i gat blong mekem wok ya, i wan samting we eni man nomo i save mekem. !I tru se, olgeta woman we oli gat hed, bambae oli neva save kilim wan pikinini i ded! Be, Jeova i luksave se nomata long samting ya, i gat sam man we, from fasin blong fraet long narafala, oli bin mekem samting we i nogud olgeta. Jeova i save se samting we tufala woman ya i mekem, i no jes kamaot from we tufala i laekem givhan long ol man, be hem i from we tufala i gat ona long God, mo tufala i fraetgud long hem.

!Yumi save soem bigfala tangkiu tu long God ya blong yumi, we i luksave ol wok we yumi stap mekem from bilif blong yumi! I tru se, maet i no gat wan long yumi we i fesem wan traem olsem hemia we Sifraha mo Pua tufala i bin fesem. Be, sipos yumi stanap strong long stret fasin​—nomata se hem i long skul, long ples blong wok, no long narafala taem​—Jeova i no ting nating long lav blong yumi. Hem i “stap mekem i gud long olgeta we oli stap traem faenem hem.” (Hibrus 11:6) Yes, God “i no save fogetem ol wok ya we yufala i mekem. Hem bambae i stap tingbaot we yufala i lavem hem, mo we yufala i givhan finis long ol narafala Kristin man, mo we yufala i stap givhan long olgeta yet.”​—Hibrus 6:​10.