?Yu Yu Gat Fasin Waes?
TAEM Moses i stap putumap ol jaj blong Isrel, hem i traem blong faenem ol man we oli ‘gat save, mo oli waes, mo oli gat fasin luksave.’ (Dutronome 1:13) I nidim plante yia blong gat plante save, be i no save hem nomo we i impoten. Fasin waes mo fasin luksave tu oli impoten.
Man we i waes, hem i skelemgud ol toktok mo fasin blong hem. Webster’s Ninth New Collegiate Dictionary i talem se man we i gat fasin waes, hem i “naf blong mekem waes i stap kwaet.” Yes, i gat “taem blong man i toktok,” mo i gat “taem blong man i stap kwaet.” Man we i gat fasin waes, hem i luksave stret taem blong toktok mo stret taem blong stap kwaet. (Prija 3:7) Plante taem, i gat gudfala risen blong stap kwaet, from we Baebol i talem se: “Taem man i stap toktok tumas, i isi nomo blong hem i mestem tok blong hem, nao i foldaon long sin, be man we i waes, hem i save satem maot blong hem, i no tok.”—Ol Proveb 10:19.
Ol Kristin oli mas waes gud taem oli stap wok wetem wan narafala Kristin. Taem wan man i toktok oltaem no i toktok strong, hemia i no min se man ya i moa impoten no i save evri samting, nogat. Tingbaot, Moses i wan “strong man blong toktok,” be hem i no naf blong lidimgud nesen blong Isrel, go kasem we hem i wokem ol fasin olsem longfala tingting, tingting daon, mo bos long tingting. (Ol Wok 7:22) From samting ya, olgeta we oli gat wok blong lukaot long ol narafala, oli mas traehad blong mekem i stret oltaem mo oli no mas mekem i strong tumas long ol narafala.—Ol Proveb 11:2.
Olgeta we Jisas Kraes i putum “olgeta samting blong hem” long han blong olgeta, Tok blong God i talem se oli olsem “slef we i stret mo waes.” (Matiu 24:45-47, NW) Oli no traem blong gat wan tingting we i soem se oli go fastaem long Jeova; mo oli no ting nating long wan bisnes we God i mekem i kam klia. Oli save se i gat wan taem blong toktok, mo wan taem blong stap kwaet mo wet long ol save blong Baebol blong i kam moa klia. I gud we olgeta Kristin oli folem fasin blong bilif blong grup ya we i olsem “slef,” be tu, i gud we oli gat fasin waes olsem “slef” ya.—Hibrus 13:7.