Ol Man Blong Tijim Tok Blong God Oli Gohed Blong Wok

LONG ol manis we oli jes pas, plante taosen tija oli kam wanples blong kasem tijing. Stat long Mei 2001, oli joen wanples long ol Distrik Asembli ya “Ol Man Blong Tijim Tok Blong God” we ol Witnes blong Jeova oli holem long olgeta ples long wol. Olgeta man long asembli ya oli kasem tok we i pulum olgeta blong tijim olgeta wan, blong kam naf moa blong wok, mo blong mekemgud wok blong olgeta olsem tija.

?Yu yu bin stap long wan long ol asembli ya? Sipos yes, i sua se yu tangkiu from ol kakae long saed blong spirit we oli givimaot long ol asembli ya blong ol man blong wosip long trufala God, Jeova. Naoia, yumi lukluk bakegen long program blong asembli ya.

Faswan Dei​—Ol Tok Blong Baebol Oli Stretgud Blong Tijim Man

Brata we i jeaman long asembli ya i welkamem ol man wetem tok ya, “Man Blong Tijim Tok Blong God i Mas Kasem Trening.” Jisas i kam wan Tija, from we hem i kasem tijing blong Jeova we i ‘Bigfala Man blong Tijim yumi.’ (Aesea 30:​20, NW; Matiu 19:16) Hemia i sem mak long yumi. Sipos yumi wantem kam gud moa olsem man blong tijim Tok blong God, yumi mas letem Jeova i tijim yumi.

Nekis tok we i kam, hem i “Tijing Blong Kingdom i Karem Gudfala Frut.” Ol man we oli gat ekspiriens long wok blong tijim Tok blong God oli tokbaot ol glad mo blesing we i kamaot long wok blong mekem disaepol.

Wan tok we i gat paoa i kam biaen we nem blong hem, “ ‘Ol Bigbigfala Wok Blong God’ Oli Pulum Yumi.” Long faswan handred yia, “ol bigbigfala wok” long saed blong Kingdom blong God i pusum ol man blong oli mekem wok. (Ol Wok 2:​11) Yumi tu yumi save pusum ol man blong mekem wok taem yumi talemaot “ol gudgudfala wok” ya, olsem tijing blong Baebol long saed blong ransom, laef bakegen long ded, mo niufala kontrak.

Nekis tok i leftemap tingting blong evriwan blong oli “Haremgud Long Stret Fasin Blong Jeova.” (Ol Sam 35:27) Yumi kasem help blong folem stret fasin taem yumi lanem blong lavem ol fasin we oli stret mo no laekem nating ol fasin we oli nogud. Mo tu, yumi lanem samting ya taem yumi stadi Baebol, taem yumi gohed blong agensem ol samting we oli save spolem yumi long saed blong spirit, mo taem yumi wokem tingting daon. Ol samting ya bambae oli protektem yumi long ol rabis fren, ol sas samting blong wol, ol rabis fasin long saed blong seks mo ol pleplei we oli raf.

Stamba tok ya, we nem blong hem “Nafgud Blong Tijim Tok Blong God” i mekem yumi tingbaot se Jeova i yusum Baebol, tabu spirit blong hem, mo ogenaesesen blong hem long wol, blong mekem yumi kam ol man blong tijim gud tok blong Hem. Brata we i mekem tok ya, hem i tokbaot fasin blong yusum gud Tok blong God. Hem i se: “Mak blong yumi i blong tekem ol mesej we i stap long Baebol mo putum olgeta long hat blong ol man we oli stap lesin long yumi.”

Stamba tok blong faswan tok we i gat tri haf blong hem hemia “Tijim Yu Wan Mo Tijim Narafala Tu.” Faswan haf i makem klia se yumi wanwan i mas folem ol semfala rul long saed blong klin fasin we yumi stap tijim ol narafala blong folem. Nekis haf i toktok long yumi blong ‘holem trutok stret.’ (2 Timoti 2:​15, NW ) Blong tijim yumi wan, fasin blong stadi dip oltaem long Baebol i impoten tumas, nomata we yumi mekem wok blong God longtaem finis no nogat. Laswan haf blong tok ya i soem we Setan i stap wajem yumi, blong luk sipos yumi gat fasin flas, sipos yumi gat tingting blong independen, sipos yumi tingting se yumi impoten moa, yumi jalus, yumi gat griri fasin, yumi kros, no yumi stap faenem poen long ol narafala. Be, sipos yumi agensem Setan, hem bambae i ronwe long yumi. Blong yumi agensem hem, yumi nidim blong kam klosap long God.​—Jemes 4:​7, 8.

Tok ya “Agensem Ol Rabis Buk Mo Video We Oli Spolem Wol” i stret long taem blong yumi. Hem i soemaot wanem samting we yumi mas mekem long denja ya we i save spolem yumi long saed blong spirit. Profet Habakuk i tokbaot Jeova se: “Yu yu tabu we yu tabu. Yu no wantem nating blong luk ol rabis fasin, mo ol samting nogud we ol man oli stap mekem, oli no stret nating long ae blong yu.” (Habakuk 1:​13) Yumi mas “agens long ol rabis fasin.” (Rom 12:9) Papa mama i kasem strong tok we i pusum olgeta blong oli wajem ol pikinini blong olgeta taem oli yusum Internet no lukluk televisin. Brata we i mekem tok ya i talem se olgeta we ol rabis buk mo video i stap pulum olgeta oli mas kasem help long wan fren we i bigman long saed blong spirit. Bambae i gud tu sipos oli lanem baehat mo tingting dip long ol vas olsem Ol Sam 97:10; Matiu 5:​28; 1 Korin 9:​27; Efesas 5:​3, 12; Kolosi 3:5; mo 1 Tesalonaeka 4:​4, 5.

Nekis tok, “Letem Pis Blong God i Sevem Yu” i mekem yumi haremgud se sipos ol wari blong yumi oli hevi tumas, yumi save putum baden blong yumi i go long Jeova. (Ol Sam 55:22) Sipos yumi talemaot olgeta samting we oli stap long hat blong yumi long prea, Jeova bambae i givim “pis blong God” long yumi, pis mo kwaet tingting we i kamaot from nambawan fasin fren blong yumi wetem hem.​—Filipae 4:​6, 7, NW.

Laswan tok blong faswan dei i mekem yumi glad wetem stamba tok ya, “Jeova i Flasem Ol Man Blong Hem Long Laet,” mo tok ya i eksplenem buk blong Aesea japta 60 we i kamtru. Long wol ya we i tudak, ol “strenja” ya hemia bigfala grup blong man we oli olsem sipsip, mo grup ya i stap kam bigwan moa. Olgeta ya oli haremgud long laet blong Jeova tugeta wetem ol tabu Kristin. Brata we i mekem tok ya i tokbaot vas 19 mo 20 mo i eksplenem se: “Jeova bambae i neva ‘godaon’ olsem san mo mun. Bambae hem i gohed blong givim laet long ol man blong hem blong flasem olgeta. !Yumi haremgud tumas blong save samting ya taem yumi stap laef tru long ol lasdei blong wol ya we i tudak!” Long en blong tok ya, brata i talemaot niufala buk ya, Isaiah’s Prophecy​—Light for All Mankind, Buk Tu. ?Yu yu ridim niufala buk ya finis?

Namba Tu Dei​—Oli Nafgud Blong Tijim Narafala

Afta we oli tokbaot vas blong dei blong namba tu dei, yumi rili intres blong lesin long wan narafala tok we i gat tri haf blong hem, nem blong hem, “Ol Minista We Oli Pulum Narafala Blong Bilif.” Ol brata we oli joen long tok ya we i gat tri haf blong hem oli tokbaot tri step we yumi mas tekem blong givhan long ol man blong oli kam man blong bilif​—talemaot mesej blong Kingdom, mekem intres blong ol man we yumi faenem i gru, mo tijim olgeta we oli intres blong oli folem tijing blong Kraes. Ol tok we sam brata sista oli talem mo ol pleplei oli givhan long yumi blong yumi save olsem wanem blong tijim ol narafala man blong oli kam disaepol.

Stamba tok blong nekis tok hem i “Stanap Strong, Mo Tu, Stap Fasgud Long God.” Brata we i mekem tok ya i soemaot se samting we i moa impoten hem i blong “stanap strong gogo olgeta samting ya i finis.” (Matiu 24:13) Yumi mas yusum olgeta samting we God i givim long yumi​—olsem prea, stadi wanwan, ol miting, mo wok blong prij​—blong wokem fasin blong fasgud long God. Yumi nidim blong blokem ol wok mo samting we wol i wantem blong oli no spolem fasin fasgud blong yumi long God.

?Ol man we oli stap harem nogud tumas oli save harem gud olsem wanem tede? Tok ya “Haremgud Taem Yu Karem Yok Blong Kraes” i ansa long kwestin ya. Wetem kaen fasin, Jisas i singaot ol man we oli folem hem blong oli kam aninit long yok blong hem mo blong lan long hem. (Matiu 11:​28-​30) Yumi save kam aninit long yok blong Jisas taem yumi folem eksampol blong laef blong hem we i no fasfas long plante samting mo we i skel gud. Ol bigfala poen blong tok ya oli kamaot long toktok blong olgeta we oli askem kwestin long olgeta from we oli no mekem laef blong olgeta i fasfas long plante samting.

Taem ol Witnes blong Jeova oli joen wanples blong mekem ol bigfala asembli, wan long ol bigfala samting we i kamaot long taem ya hem i baptaes blong ol niufala man blong wok blong God. Brata we i givimaot tok ya “Baptaes i Rod Blong Gat Moa Janis Blong Tij,” i mekem bigfala welkam long olgeta we oli rere blong tekem baptaes mo i singaotem olgeta blong oli joen moa long wok ya we i bigwan moa. Ol niufala man blong tijim Tok blong God we oli jes tekem baptaes, oli save kasem moa wok insaed long kongregesen sipos oli kasem ol mak we i stap long Baebol.

Taetel blong faswan tok blong aftenun hem i “Folem Fasin Blong Bigfala Tija Blong Yumi.” Plante, plante taosen yia we Jisas i stap long heven, hem i wajem gud mo i folem fasin blong Papa blong hem, nao hem wan i kam Bigfala Tija. Taem hem i stap yet long wol, hem i yusum wan rod blong tijim man we i givhan gud long olgeta, olsem ol kwestin we oli dip mo ol isi pijatok we oli gat paoa. Jisas i mekem tijing blong hem i stanap long Tok blong God mo hem i toktok wetem glad mo lav, mo tok blong hem i gat paoa. Ol samting ya oli mas mekem we yumi wantem folem fasin blong Bigfala Tija ya.

Wan narafala tok we i gat paoa hemia, “?Yu Yu Rere Blong Halpem Narafala?” Tok ya i leftemap tingting blong yumi blong folem eksampol blong Jisas blong halpem ol narafala man. (Jon 13:​12-​15) Brata we i mekem tok ya hem i toktok stret long olgeta man we oli naf se i gud oli mekem olsem Timoti taem oli yusum janis we oli gat blong givhan long ol narafala. (Filipae 2:​20, 21) Ol papa mama oli kasem tok we i leftemap tingting blong olgeta blong folem fasin blong Elkana mo Ana taem oli givhan long ol pikinini blong olgeta blong mekem wok blong prij fultaem. Mo ol yangfala oli kasem tok we i pusum olgeta blong folem eksampol blong Jisas Kraes mo yangfala Timoti taem oli rere blong givim taem mo paoa blong olgeta blong mekem wok. (1 Pita 2:​21) Long taem ya tu, yumi glad blong harem toktok blong olgeta we oli bin tekem janis blong halpem ol narafala.

Nao i gat wan narafala tok wetem tri haf blong hem we nem blong hem, “Kasem Moa Frut From Tiokratik Edukesen.” Faswan brata we i mekem tok i tokbaot olsem wanem i impoten blong kam gud moa long fasin blong putum tingting i stap long wanem we yumi harem. Blong kasem mak ya, yumi save stat taem yumi stap mekem prapa stadi blong yumi wan mo traem mekem i kam moa longfala. Hem i leftemap tingting blong olgeta we oli lesin blong oli jekem ol vas mo blong oli raetem ol not long taem blong ol miting. Namba tu brata we i mekem tok i wekemap tingting blong yumi blong tingbaot nid blong folem “ol tijing we oli stret gud.” (2 Timoti 1:​13, 14, NW ) Blong yumi protektem yumi agens long ol rabis toktok we oli kamaot long radio no niuspepa, waes blong man, ol man blong hae save we oli agensem Baebol, mo tijim blong ol man apostasi, yumi mas pemaot taem blong mekem prapa stadi blong yumi wan mo blong go long ol miting. (Efesas 5:​15, 16) Long laswan tok, brata i makem klia se i impoten tumas blong wokem ol samting we yumi lanem long laef blong yumi nao bambae yumi save harem gud.​—Filipae 4:9.

!Yumi glad tumas blong harem tok ya “Ol Niufala Help Blong Yumi Gru Moa Long Spirit”! Yumi glad tumas blong harem se bambae i no longtaem oli prentem wan niufala buk we nem blong hem Benefit From Theocratic Ministry School Education. Taem brata i stap tokbaot ol samting we i stap insaed long buk ya, yumi harem se yumi wantem tumas blong gat buk ya. Hem i tokbaot haf blong buk ya we i gat ol defren poen long advaes blong fasin blong toktok, i se: “Niufala buk ya i no folem fasin blong ol buk olbaot taem hem i soemaot ol 53 rod ya blong rid gud, toktok gud, mo tij gud. Ol samting insaed long buk ya oli stanap long ol rul blong Baebol nomo.” Buk ya bambae i soemaot olsem wanem ol profet, Jisas, mo ol disaepol blong hem oli soemaot gudhan blong tij. Yes, buk ya mo ol niufala fasin blong Tiokratik Ministri Skul bambae oli rili givhan long yumi blong kam ol man we oli tijim gud moa Tok blong God.

Namba Tri Dei​—Naoia i Stret Taem Blong Tijim Ol Narafala

Afta wan tok long stamba vas blong laswan dei, evriwan oli lesin gud long laswan tok we i gat tri haf long asembli ya, nem blong tok ya, “Malakae i Rerem Yumi From Dei Blong Jeova.” Malakae i mekem wok blong profet klosap wan handred yia afta we ol man Jiu oli kambak long Babilon. Olgeta oli gobak long fasin blong apostasi mo rabis fasin, mo oli sakem doti long nem blong Jeova taem oli no wantem save long ol stret loa blong hem mo taem oli karem ol anamol we oli blaen, we haf bodi blong olgeta i nogud, mo we oli sik blong mekem sakrefaes. Antap moa, oli divos long waef we oli maredem taem oli yang, mo oli go mared long ol hiten woman.

Faswan japta blong Malakae i mekem yumi sua long lav we Jeova i gat long ol man blong hem. Hem i mekem bigfala poen i kamaot se yumi nidim blong fraet gud long God mo gat tangkiu from ol tabu samting. Jeova i wantem we yumi givim beswan blong yumi long hem, we yumi wosipim hem from we yumi rili lavem hem. Tabu wok we yumi mekem i no mas wan samting we yumi mekem olsem nomo, mo yumi mas pembak kaon blong yumi long God.

Narafala brata i soemaot se namba tu japta blong Malakae i stret long taem blong yumi, nao hem i askem se: “?Yumi stap meksua oltaem se ‘fasin blong yumi i stret gud’?” (Malakae 2:6) Olgeta we oli stap tij oli mas sua se samting we oli stap talemaot i stanap long Tok blong God. Yumi mas agensem fasin blong no holem promes blong yumi olsem fasin blong kasem divos long wan rod we i no stret.​—Malakae 2:​14-16.

Laswan brata blong mekem tok long trifala haf ya, i tokbaot, “?Hu Bambae i Sef Long Dei Blong Jeova?” Brata ya i talem se: “!I gud tumas long ol man blong wok blong Jeova blong save se long Malakae japta 3, vas 17, yumi faenem plante samting long hem we oli kamtru finis!” Vas ya i talem se: “Nao hem i talem se, ‘Olgeta ya bambae oli man blong mi, mo long taem ya we bambae mi jajem ol man, bambae mi mekem olgeta oli spesel man blong mi. Mi bambae mi gat sore long olgeta, mi givhan long olgeta, stret olsem we wan papa i gat sore long pikinini blong hem, we i stap wok blong hem.’ ”

Wan narafala bigfala samting we i kamaot long asembli ya hem i drama ya, “Respektem Hae Rul Blong Jeova,” we i tokbaot ol pikinini blong Kora. Nating se papa blong olgeta i rebel agens long Moses mo Eron, be olgeta oli stap tru long Jeova mo ol man we hem i putumap. Kora mo ol man we oli biaen long hem oli ded, be ol pikinini blong hem oli laef i stap. Tok we i kam biaen, nem blong hem “Stap Aninit Long Hae Rul Blong God,” i tokbaot olsem wanem drama ya i stret long wanwan blong yumi. Brata we i givim tok ya i tokbaot sikis samting we i mekem Kora mo ol man we oli biaen long hem oli foldaon: oli no stap tru mo sapotem hae rul blong Jeova; oli letem fasin praod, fasin blong wantem kasem samting we olgeta nomo oli wantem, mo fasin jalus i bos long olgeta; oli lukluk poen long ol man we Jeova i putumap; oli gat fasin blong komplen oltaem; oli kam we oli no moa glad long janis we oli gat blong mekem wok blong Jeova; mo oli tingting moa long ol fren mo famle blong olgeta i bitim we oli stap tru long Jeova.

Stamba tok blong pablik tok hem i “?Hu Ya i Stap Tijim Trutok Long Ol Nesen?” Trutok we brata i tokbaot long tok ya hemia trutok long saed blong stamba tingting blong Jeova we Jisas Kraes i talemaot. Hem i tokbaot trutok we i joen wetem bilif, trutok we i joen wetem fasin blong wosip, mo trutok we i joen wetem fasin blong man. Taem yumi skelem ol Kristin blong faswan handred yia wetem ol Witnes blong Jeova tede, yumi bilif se ‘God i stap long medel blong yumi’ mo hemia i mekem yumi kam strong.​—1 Korin 14:25.

Afta wan sot stadi long Wajtaoa blong wik ya, olgeta man blong tijim Tok blong God we oli stap long taem ya oli lesin long tok ya we i gat paoa, “Hareap Blong Tijim Narafala Man.” Brata we i givim tok ya i tekem smol taem blong tingting bak long ol tok we oli bin kamaot long program. Long tingtingbak ya hem i poenemaot se i impoten blong yusum Baebol taem yumi tijim man, hem i tokbaot wanem rod we i save halpem yumi blong kam ol tija we oli naf gud, mo hem i se yumi nidim blong trastem trutok we yumi stap tijim long ol narafala. Brata we i mekem tok ya i talem strong long yumi blong mekem we ‘ol man oli save luk we yumi stap gohed gud’ mo blong ‘lukaot gud long fasin blong yumi, mo long ol tok we yumi stap tijim ol man long hem.’​—1 Timoti 4:​15, 16.

!Long distrik asembli ya “Ol Man Blong Tijim Tok Blong God,” yumi rili harem gud long kakae long saed blong spirit! I gud yumi folem fasin blong Jeova we i Bigfala Man blong Tijim yumi, mo Jisas Kraes Bigfala Tija blong yumi, taem yumi tijim ol narafala long Tok blong God.

[Bokis blong pija long pej 28]

Ol Niufala Buk Blong Givhan Long Ol Spesel Nid

Olgeta we oli kam long Distrik Asembli ya “Ol Man Blong Tijim Tok Blong God,” oli glad tumas blong kasem tu buk we long sam kantri long wol, bambae i givhan bigwan long wok blong tijim Baebol. Bambae traket ya we nem blong hem ?Yu Yu Gat Wan Spirit We i No Save Ded Samtaem? i wan gudfala tul blong statem storian long ol ples we lanwis i mekem se tufala tok ya “sol” mo “spirit” i gat sem mining nomo. Niufala traket ya i soemaot klia nomo se wan spirit paoa i no sem mak long wan spirit man mo se taem ol man oli ded, oli no kam spirit man.

Buklet ya, A Satisfying Life​—How to Attain It, i kamaot long en blong namba tu dei blong asembli ya. Buklet ya i blong mekem se yumi save statem stadi wetem olgeta we oli no bilif se i gat wan Man we i Wokem olgeta samting, mo we i gat plante gudfala fasin, mo maet oli no gat save tu se God i gat wan buk we hem i pusum ol man blong raetem. ?Yu yu yusum ol niufala buk finis long wok blong prij?

[Tok blong pija long pej 26]

Long Milan, Itali, mo long ol asembli raonabaot long wol, plante handred oli bin tekem baptaes

[Tok blong pija long pej 29]

Drama ya “Respektem Hae Rul Blong Jeova” i bin gat paoa long olgeta we oli bin wajem