?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• ?Wanem samting we maet wan Kristin i mekem taem hem i kam taed long saed blong spirit mo filing tu?

Yumi mas luksave wanem samting we i stap mekem yumi taed. Maet i gud we yumi jekemap olgeta samting we yumi stap mekem oltaem mo olting blong yumi, nao yumi putumaot evri samting we oli blong nating nomo mo we oli save mekem laef blong yumi i hevi. Yumi save putum sam mak we yumi naf blong kasem mo we oli stret long laef blong yumi. Samting we i impoten hemia blong lukaot long nid blong yumi long saed blong spirit mo hemia i min se yumi mas prea oltaem mo tingting dip.​—8/15, pej 23-26.

• ?From wanem ol Witnes blong Jeova oli talem se namba ya 144,000 i wan trufala namba i no wan pijatok?

Afta we aposol Jon i luk grup ya blong ol 144,000 man long wan vison, hem i luk “wan bigfala hip [“kampani,” NW ] blong man, we i no gat man i save kaontem olgeta.” (Revelesen 7:4, 9) Sipos namba ya 144,000 i wan pijatok nomo i minim se yumi no save stret namba blong hem mo i olsem we tufala grup ya we tufala vas i tokbaot oli sem mak nomo. Jisas i tokbaot ol man we bambae oli rul wetem hem olsem wan “smol kampani blong ol sipsip.” (Luk 12:32 NW )​—9/1, pej 30.

• ?From wanem wan man Isrel i save salem wan anamol we man i jokem nek blong hem nomo, mo we blad i stap yet long hem, i go long wan man we i no man Isrel?

Wan man blong narafala kantri no wan strenja, we i no wan proselaet, hem i no stap aninit long Loa. Taswe wan man Isrel i save givim no salem ol ded anamol ya long hem. (Dutronome 14:21) Be wan proselaet i stap aninit long Loa, taswe hem i no save kakae mit blong wan anamol we blad blong hem i stap yet long hem. (Levitikas 17:10)​—9/15, pej 26.

• ?Wanem ya biomimetics, mo from wanem maet wan Kristin i intres blong save moa long samting ya?

Hemia wok blong ol sayentis we i blong stadigud long olgeta laef samting mo traem kopi long ol samting we Jeova i wokem. Eksampol, Wilbur Wright wetem brata blong hem Orville oli wokem wan plen afta we tufala i stadigud long fasin blong sam bigbigfala pijin blong flae. Taswe, wok blong ol sayentis we oli kolem biomimetics i save pulum wan Kristin blong presem Man we i Wokem olgeta samting.​—10/1, pej 9.

• ?Hu ya man ya we 2 Korin 12:2-4 i tokbaot olsem se i go long paradaes?

Pol i talem ol tok long vas ya jes afta we hem i bin talem plante toktok blong pruvum se hem i wan trufala aposol. Baebol i no talem nem blong wan narafala man we i bin go long namba tri heven, Pol nomo i raetem tok olsem. Taswe, Pol nao i luk vison ya.​—10/15, pej 8.

• ?Wanem sam long ol gudfala fasin blong Jisas we i mekem hem i naf blong kam Lida ya we God i jusumaot?

Jisas i gat fasin ya blong holemstrong long God, fasin blong hem i stret mo i gud oltaem. Hem i givim laef blong hem long God fulwan. Jisas i kea bigwan long ol man mo hem i glad blong wok.​—11/1, pej 6-7.

• ?Ol rabis enjel bambae oli stap wea long Taosen Yia Rul blong Kraes?

I stret nomo blong ting se long taem blong Taosen Yia Rul blong Kraes, ol rabis enjel ya tu bambae oli go long bigfala hol ya wetem Setan. (Revelesen 20:1-3) Jenesis 3:15 i tokbaot taem we bambae Jisas i smasem hed blong snek ya, hemia taem we bambae hem i sakem Setan i go long bigfala hol blong Wan Taosen Yia. Long laen ya blong Setan, i gat ol rabis enjel. Ol rabis enjel oli fraet long bigfala hol ya from we oli save finis se bambae olgeta tu oli go long hol ya. (Luk 8:31, NW )​—11/15, Pej 30-31.

• ?From wanem wan man i mas lukaotgud taem hem i dring waen mo narafala strong dring, nating sipos hem i no kasem mak we hem i drong?

Samfala oli save tekem plante dring be narafala i no save luk wan saen we i soemaot se oli drong. Be, maet wan man i save kam we hem i dipen long dring, ale, hem i kam “slef long fasin ya.” (Taetas 2:​3, NW ) Jisas i givim woning ya blong no ‘westem taem blong yumi long fasin ya we yumi stap ronem lafet, mo yumi stap drong.’ (Luk 21:​34, 35) Wan man we i stap dring i save kam les mo i wantem slip nating se hem i dring gogo i no kasem mak yet we hem i fuldrong. Sem mak long saed blong spirit.​—12/1, pej 19-21.