Ol Gudfala Fasin Oli Karem Gudfala Frut
LONG wan smol aelan long saot blong Japan, i gat wan mama mo tri pikinini blong hem we oli stat stadi Baebol wetem ol Witnes blong Jeova. Ol man long aelan ya we oli stap longwe long taon oli strong blong folem ol fasin we ol bubu bifo oli pasem i kam. Taswe, taem oli luk samting we mama ya mo trifala pikinini oli mekem, oli no moa talem halo long olgeta. Mama ya i talem se: “Mi harem nogud taem oli no wantem talem halo long mi, be samting we i mekem mi mi harem nogud moa hemia taem oli lukluk nogud long man blong mi mo ol pikinini blong mi tu.” Be, Mama ya i talem long ol pikinini blong hem se: “Yumi mas gohed nomo blong talem halo long ol man raonabaot long yumi, from we yumi man blong Jeova.”—Matiu 5:47, 48.
Long haos, mama ya i tijim ol pikinini blong hem se oli mas soemaot gudfala fasin nating se ol man oli agens long olgeta. Oltaem, taem oli stap ron long trak blong go long hot springwota, ol pikinini oli stap praktis bakegen mo bakegen blong talem halo. Taem oli kam insaed long bilding ya, oltaem ol pikinini oli glad mo oli singaot se, “!Konnichiwa!” —“Gud Dei.” Wetem longfala tingting famle ya i gohed nomo blong talem halo long ol man, nating se ol man raonabaot long olgeta oli no smael mo talem halo. Be, ol man oli luk ol gudfala fasin we ol pikinini ya oli soemaot.
Sloslo, wan man afta narawan oli stat talem tok ya, “Konnichiwa.” Afta tu yia i pas, klosap evriwan long taon oli talem halo long famle ya bakegen. Mo tu, ol man raonabaot oli stat talem halo long olgeta bakegen mo oli soemaot kaen fasin. Deputi mea i wantem givim wan smol samting i go long ol pikinini ya from gudfala fasin blong olgeta we i pulum ol man blong jenisim fasin blong olgeta. Be, mama blong ol pikinini i talem long mea se, ol pikinini oli mekem nomo wanem we ol Kristin oli mas mekem. Biaen, long wan kompetisin blong givim wan tok we ful aelan i joen long hem, wan long ol boe blong famle ya i talemaot olsem wanem mama blong hem i trenem olgeta blong talem halo long ol narafala man, nomata wanem fasin ol man oli mekem long olgeta. Tok we boe ya i givim i winim fas praes mo oli putum long niuspepa blong taon ya. Tede, famle ya i glad from we taem oli folem ol Kristin fasin, samting ya i karem ol gudfala frut. I moa isi blong talemaot gud nius long ol man taem oli gat kaen fasin.