Ol Bigfala Famle We Oli Joengud Long Wok Blong God

Man blong raetem ol sam i talem se: “Ol pikinini ya blong yumi, hemia wan presen we jeova i givim long yumi, wan gudfala samting we hem i givim blong leftemap yumi. Ol pikinini we man i bonem taem i yang yet, be taem hem i kam olfala, olgeta oli olsem ol ara long han blong soldia. Man we i gat plante pikinini olsem, bambae i save harem gud.”​—⁠Ol Sam 127:​3-5.

YES, ol pikinini oli olsem wan blesing we Jeova i givim. Mo olsem wan man blong sutum ara we i save gud olsem wanem blong kasem mak blong hem, ol papa mama oli glad tu taem oli lidim pikinini blong olgeta long rod ya we i go kasem laef we i no save finis.​—Matiu 7:​14.

Longtaem bifo, fulap famle long medel blong ol man blong God oli ‘gat plante pikinini.’ Eksampel, tingbaot ol man Isrel taem oli slef long Ijip plante yia: “Olgeta ya oli gat plante pikinini blong olgeta, we namba blong olgeta i stap kam plante we plante, mo oli stap kam strong we i strong. Nao olgeta ples long Ijip i stap kam fulap gud long olgeta.” (Eksodas 1:⁠7) Taem yumi skelem namba blong ol man Isrel we oli kam long Ijip wetem namba blong olgeta we oli aot, yumi ting se wanwan blong olgeta famle oli gat raonabaot ten pikinini.

Biaen, Jisas i gruap long wan famle we sam man tede, oli save ting se hem i bigwan. Jisas hem i fasbon pikinini blong Josef mo Meri. Be tufala i gat fo narafala pikinini boe mo sam gel bakegen. (Matiu 13:​54-​56) I sua se Meri mo Josef oli gat plante pikinini. Ating samting ya nao i mekem se taem oli lego Jerusalem blong gobak long ples blong olgeta, oli no luksave we Jisas i no stap long grup wetem olgeta.​—Luk 2:​42-​46.

Ol Bigfala Famle Tede

Tede, sam Kristin famle oli tekem disisen blong no karem plante pikinini. Oli gat defren risen blong mekem disisen ya, maet hem i wan risen long saed blong spirit, long saed blong mane, long saed blong laef no sam narafala risen bakegen. Nating se i olsem, bighaf blong ol man raon long wol oli gat ol bigfala famle. The State of the World’s Children 1997, i ripotem se ol kantri we ol woman oli karem plante moa pikinini, hemia ol kantri long saot blong Sahara long Afrika. Long ol kantri ya, klosap olgeta woman wanwan oli stap karem samwe long sikis pikinini.

Tru tumas, i no isi long ol Kristin papa mama we oli gat wan bigfala famle, blong halpem ol pikinini blong olgeta blong lavem Jeova God. Be plante oli winim finis. ?Olsem wanem? Samting ya i dipen long fasin joen gud blong ful famle long klin wosip. Mesej we aposol Pol i sanem i go long kongregesena blong Korin, i gud long ol Kristin famle tede tu. Hem i raetem se: “Ol brata mo sista, . . . mi mi talem strong long yufala, se mi wantem tingting blong yufala i mas kam wan nomo. Bambae yufala i no moa seraot long ol narnarafala grup. Yufala i mas joen gud we yufala i gat wan tingting nomo, mo we fasin blong yufala i wan nomo.” (1 Korin 1:​10) ?Olsem wanem fasin joen gud olsem, i save kamtru?

Ol Papa Mama Oli Mas Kam Strong Long Saed Blong Spirit

Wan impoten samting se, papa mama tufala i mas ona fulwan long God. Tingbaot ol tok ya we Moses i talem long ol man Isrel: ‘!Ol laen blong Isrel! !Yufala i lesin gud! Jeova i God blong yumi, mo hem wan nomo i God. Mo yufala i mas lavem hem long olgeta tingting blong yufala, mo long olgeta laef blong yufala, mo long olgeta paoa blong yufala. Ol tok ya we mi mi stap givim long yufala tede, oli mas stap long hat blong yufala. Oltaem, yufala i mas tijim ol pikinini blong yufala long hem. Sipos yufala i stap long haos, no yufala i stap wokbaot, no yufala i go blong slip, no yufala i girap bakegen, be yufala i mas tokbaot ol samting ya.’​—Dutronome 6:4-7.

Makem we Moses i talem se ol loa blong God oli mas stap ‘long hat’ blong ol papa mama. Afta long samting ya nomo, papa mama bambae oli naf blong halpem ol pikinini blong olgeta long saed blong spirit evri dei. Yes, taem papa mama i strong long saed blong spirit, oli wantem tumas blong givim save ya long pikinini blong tufala.

Blong kam wan strong man long saed blong spirit, mo blong laekem Jeova wetem ful hat blong yumi, i impoten tumas blong ridim Tok blong God, tingting dip long hem, mo mekem hem i wok long laef blong yumi. Man blong raetem ol Sam i talem se, ol man ya we oli laekem loa blong Jeova mo we oli ridim hem long “dei mo long naet” bambae oli “olsem ol tri we oli gru long saed blong wota we i stap ron. Ol tri ya oli stap karem frut long stret taem blong olgeta, mo lif blong olgeta i no save drae. Mo long sem fasin, ol man ya tu oli stap win long evri samting we oli stap mekem.”​—Ol Sam 1:2, 3.

Wan tri i save karem gudfala frut sipos yumi givim wota long hem oltaem. Long sem fasin, taem famle i kakae gud long saed blong spirit, hem i save karem gudfala frut we God i glad long hem, mo samting ya bambae i presem Jeova. Stori blong Uwamegwu mo famle blong hem i soemaot klia poen ya. Ful famle ya i stap laef long Wes Afrika. Nomata we Uwamegwu mo woman blong hem oli gat eit pikinini, tufala i mekem wok blong fultaem paenia. Uwamegwu i talem se: “Blong bitim 20 yia, famle blong mifala i gat fasin ya blong stadi Baebol tugeta. Stat long taem we ol pikinini oli smol nomo, mitufala i tijim olgeta blong oli save gud Tok blong God. Oli no kasem tijing ya long taem blong famle stadi nomo. No gat. Oli kasem tijing ya long wok blong prij tu mo long ol narafala taem bakegen. Olgeta pikinini blong mitufala oli talemaot gud nius blong Kingdom, mo lasbon pikinini boe we i gat sikis yia, hem nomo i no tekem baptaes yet.”

Wok Tugeta Olsem Wan Tim

Baebol i talem se: ‘From fasin waes, wan famle i save kam strong moa.’ (Proveb 24⁠:3) Fasin waes ya i mekem se evriwan insaed long famle oli wok tugeta olsem wan tim. Papa i “kapten” blong tim ya; God i jusum hem blong i hed blong famle. (1 Korin 11:⁠3) Tabu spirit i pusum aposol Pol blong makemgud se blong kam hed blong famle, hemia i wan bigfala responsabiliti. Hem i se: “Be man we i no wantem lukaot long olgeta famle blong hem, mo antap long hem, hem i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.”​—1 Timoti 5:⁠8.

Folem advaes ya blong Tok blong God, ol Kristin man oli nidim blong lukaotgud se woman blong olgeta i strong long saed blong spirit. Sipos ol woman oli bisi tumas wetem wok blong haos, oli save kam slak long saed blong spirit. Long wan kantri blong Afrika, wan Kristin brata we i jes tekem baptaes, i go luk ol elda blong kongregesen, from we hem i no glad long woman blong hem. Brata ya i talem se woman blong hem i no rili kea long ol samting long saed blong spirit. Ol elda oli givim advaes long brata ya blong soemaot rod long waef blong hem. Ale, brata ya i stat blong halpem woman blong hem long ol wok blong haos. Mo tu, hem i spenem taem blong halpem woman blong hem blong kam gud moa long fasin blong rid mo long ol save blong Baebol. Woman ya i gohed gud, mo naoia ful famle i joen tugeta long wok blong God.

Mo tu, ol papa oli nidim blong lukaotgud se pikinini blong olgeta oli strong long saed blong spirit. Aposol Pol i raetem se: “Ol papa mo mama. Bambae yufala i no mas mekem ol samting long ol pikinini blong yufala we i save mekem olgeta oli kros. Yufala i mas lukaot gud long olgeta. Yufala i mas stretem olgeta, mo yufala i mas tijim olgeta, olsem we Masta blong yumi, i stap tijim yumi.” (Efesas 6:⁠4) Ol papa mama oli mas folem advaes ya blong no mekem pikinini blong olgeta i kros, mo oli mas tijim pikinini blong olgeta. Nao ol pikinini ya bambae oli harem gud insaed long famle mo bambae oli harem se oli rili memba blong wan tim. From samting ya, ol pikinini blong yu bambae oli givgivhan mo leftemap tingting blong olgeta blong kasem sam mak long saed blong spirit.

Blong wok olsem wan tim, i nidim blong givim kwiktaem sam responsabiliti long ol pikinini we oli naf. Wan papa, we i wan Kristin elda, mo i gat 11 pikinini, i wekap eli long evri moning blong mekem stadi long sam blong ol pikinini blong hem bifo we hem i go long wok. Afta we ol fasbon pikinini oli tekem baptaes, oli halpem papa blong olgeta blong mekem stadi long ol narafala smol brata sista blong olgeta. Papa ya i lesin taem ol fasbon pikinini oli tijim ol smol wan, mo hem i presem olgeta from ol traehad we oli mekem. Sikis blong ol pikinini oli tekem baptaes finis, mo ol narawan oli gohed blong wok kasem mak ya.

Toktok Gud Tugeta, Mo Traem Kasem Wan Mak Tugeta

Tede, blong mekem famle i joen gud, i impoten tumas blong toktok gud tugeta mo traem kasem ol mak long saed blong spirit tugeta. Gordon, hem i wan Kristin elda we i stap laef long Naejeria. Hem i gat seven pikinini, fasbon i gat 27 yia mo lasbon i gat 11 yia. Sikis blong olgeta oli paenia olsem papa mo mama. Lasbon pikinini boe i jes tekem baptaes i no longtaem. Hem i joen oltaem long wok blong mekem disaepol wetem famle blong hem. Tu boe we oli bigman finis, oli man blong givhan long kongregesen.

Gordon hem wan i bin mekem stadi wetem ol pikinini blong hem wanwan. Antap long samting ya, famle ya i gat wan program blong stadi we i givhan long olgeta blong kasem moa save long Baebol. Evri moning oli kam tugeta blong storeyan long vas blong dei, mo blong rerem ol miting blong kongregesen.

!Wan mak we evri memba blong famle ya i wantem kasem, hemia blong ridim olgeta haf blong Wajtaoa mo Wekap! I no longtaem, oli ademap Baebol riding, long program blong olgeta evri dei. Taem evri memba blong famle oli tokbaot wanem oli stap ridim, samting ya i leftemap tingting blong olgeta wanwan blong gohed long gudfala fasin ya blong ridim Baebol evri dei.

Famle ya i traehad blong stadi Baebol evri wik. From samting ya i no nidim blong talem bakegen mo bakegen, se i taem blong stadi. Evri wan i wantem tumas blong joen long famle stadi. Long ol yia we oli pas, ol samting we famle i save stadi long hem, ol plan mo taem we famle i spenem blong Baebol stadi, i jenis folem nid blong ol pikinini mo yia blong olgeta. Oltaem famle i joengud wetem ol narafala man blong God we oli stanap strong long trutok. Samting ya i halpem ol pikinini bigwan.

Olsem wan famle we i joengud, oli mekem plante samting tugeta mo oli tekem taem blong pleplei tu. Wan taem long wan wik oli gat wan “famle naet,” hemia wan taem we evriwan i joen tugeta blong askem kwestin, pleplei, tok fani, plei piano, mo talem ol stori. Samtaem, oli go long solwota, no long wan narafala ples bakegen.

Trastem Jeova

I no gat wan long ol famle we yumi tokbaot finis we bambae i talem se i isi blong lukaotgud long wan bigfala famle. Wan Kristin brata i talem se: “Blong kam wan gudfala papa blong eit pikinini, i rili wan traem. I nidim fulap samting long saed blong bodi mo long saed blong spirit tu blong halpem olgeta. Mi mas wok had blong kasem i naf mane blong halpem olgeta pikinini blong mi. Ol fasbon oli stap long yangtaem blong olgeta, mo olgeta eit pikinini evriwan oli stap skul. Mi save se i impoten tumas blong givim tijing long saed blong spirit long ol pikinini, be sam long ol pikinini blong mi oli stronghed mo samtaem oli no wantem obei. Oli mekem mi mi harem nogud. Be, mi mas rimemba we, mi tu samtaem, mi mekem sam samting we Jeova i no glad long hem, mo hem i fogivim mi. Ale, mi mas gohed blong mekem sem mak mo halpem ol pikinini blong mi, go kasem we oli luksave stret rod.

“Mi traem blong folem eksampel blong Jeova long saed blong fasin ya blong gat longfala tingting wetem ol man from we Jeova i wantem yumi evriwan i tanem tingting blong yumi from ol sin blong yumi. Mi stadi wetem famle blong mi, mo sam long ol pikinini blong mi oli wantem kasem mak blong baptaes. Mi no dipen long prapa paoa blong mi blong kasem gudfala frut, from we paoa blong mi i smol nomo. Mi traem blong stap klosap moa long Jeova tru long prea mo tu blong mekem Proveb ya i wok long laef blong mi, we i talem se: ‘I nogud yu ting se save ya blong yu naoia, hem i naf blong givhan long yu. Yu mas trastem Jeova long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.’ Jeova bambae i halpem mi blong trenem ol pikinini blong mi.”​—Proveb 3:​5, 6.

!Neva Letem Tingting i Kam Slak!

Samtaem i luk olsem se ol pikinini blong yu bambae oli neva gat tangkiu from bigfala wok we yu mekem blong trenem olgeta. !Be neva letem tingting blong yu i kam slak! !Yu mas gat strong tingting blong gohed! Sipos ol pikinini blong yu oli no glad no oli no folem advaes blong yu naoia, ating long fiuja bambae oli luksave samting ya. Blong wan pikinini i gruap i kam wan Kristin we i karem gudfala frut long saed blong spirit, i nidim plante yia.​—Galesia 5:​22, 23.

Monica we i laef long Kenya, i stap long wan famle blong ten pikinini. Hem i se: “Papa Mama blong mi oli tijim trutok blong Baebol long mifala stat long taem we mifala i smol nomo. Papa i yusum ol Kristin buk blong stadi wetem mifala evri wik. From wok blong hem, Papa i no mekem stadi blong mifala long sem dei oltaem. Samtaem, taem hem i kambak long wok blong hem, hem i luk mifala i stap pleplei afsaed. Ale, hem i singaot mifala mo hem i talem se long faef menet hem i wantem se mifala evriwan i stap long haos blong mekem Baebol stadi. Afta long stadi, Papa i leftemap tingting blong mifala blong askem kwestin no tokbaot problem we mifala i stap fesem.

“Papa i meksua se mifala i fren wetem ol pikinini we oli laekem God. Oltaem hem i go long skul blong askem long ol tija olsem wanem long saed blong fasin blong mifala. Wan dei, hem i harem nius se tri brata blong mi oli faet wetem sam narafala boe bakegen. Mo tu, hem i harem se trifala ya oli swea samtaem. Papa i panisim trifala from ol nogud fasin ya, be hem i tekem taem tu blong eksplenem wetem Baebol, from wanem oli nidim blong soem gudfala fasin we i save presem God.

“Taem Papa mo Mama i halpem mifala blong rerem ol miting, tufala i soemaot from wanem i nambawan tumas blong kam long ol miting. Oli trenem mifala long haos blong kam ol gudfala minista blong God. Stat long taem we mifala i smol nomo, mifala i joen oltaem wetem Papa mo Mama long wok blong prij.

“Tede, tri brata blong mi oli spesel paenia, wan sista i fultaem paenia, wan narafala sista we i mared mo i gat wan famle finis, i wan Witnes we i wok strong. Tu smol sista blong mi, we wan i gat 18 yia mo narawan 16 yia, oli pablisa we i baptaes finis. Mo, tufala laswan pikinini boe oli kasem trening blong kam pablisa wan dei. Mi bin wok tu yia long branj-ofis blong ol Witnes blong Jeova long Kenya. Mi lavem mo mi talem tangkiu long papa mama blong mi from we oli strong long saed blong spirit; oli soemaot wan gudfala eksampel long mifala.”

Nomata hamas pikinini we yu yu gat, neva yu mas letem tingting blong yu i foldaon no i kam slak blong halpem mo lidim olgeta long rod ya we i no save finis. Jeova bambae i blesem ol traehad blong yu. Ale, wan dei, yu tu bambae yu talem tok ya we aposol Jon i raetem se: “Taem mi harem we oltaem ol pikinini blong mi oli stap folem ol tok we i tru, hemia i mekem mi mi harem gud moa, i winim we mi harem gud long ol narafala samting.”​—3 Jon 4.

[Futnot]