Amagedon—?Samfala Oli Talem Se Hem i Wanem?

“Trifala i tekem ol king oli kam wanples long ples ya we long lanwis blong ol laen blong Isrel nem blong hem ‘Amagedon.’”—REVELESEN 16:16.

?WANEM tingting blong yu taem yu harem tok ya “Amagedon”? Ating yu tingbaot wan bigfala trabol. Nating se tok ya i stap wan taem nomo long Baebol, be ol man blong nius mo ol lida blong jos oli talem tok ya plante taem.

?Olsem wanem? ?Tingting we ol man oli gat long Amagedon i folem wanem we Baebol i tijim? I gud blong save ansa blong kwestin ya. ?From wanem? From we sipos yu save trutok long saed blong Amagedon bambae yu no moa fraet, bambae yu save se i gat wan gudfala fiuja blong ol man, mo bambae yu tingbaot God long wan fasin we i defren.

Plis yu tingbaot trifala kwestin we oli kam biaen, mo yu traem luk sipos tingting we plante man oli gat i folem wanem we Baebol i rili tijim.

1. ?HEM I WAN BIGFALA TRABOL WE OL MAN OLI MEKEM?

Plante taem ol man blong nius mo ol man blong lukaot ol save, oli yusum tok ya “Amagedon” blong tokbaot ol bigfala trabol we ol man oli mekem. Oli tokbaot tufala bigfala faet we i bin kasem fulwol se hemia Amagedon. Afta long tufala bigfala faet ya, ol man oli fraet se Yunaeted Stet mo Soviet Yunion, bambae oli yusum ol bom we oli wokem long posen gas, blong mekem faet. Ol man blong nius oli talem se niuklia faet ya hem i “Amagedon.” Tede, ol man blong lukaot ol save oli fraet se ol doti we ol man oli sakem long win, bambae i mekem weta i jenis bigwan, i kam nogud olgeta. Oli singaot hemia tu se “Amagedon.”

Tingting ya i soemaot se: Ol man oli ting se oli bos long fiuja blong wol ya mo long ol laef samting we i stap long hem. Sipos ol gavman oli no waes, bambae wol i nogud olgeta.

Baebol i tijim se: Bambae God i no letem ol man oli spolem wol fulwan. Baebol i talem se Jehovaa i no mekem wol “blong i ples nating nomo,” be hem i mekem “blong man i save stap long hem.” (Aesea 45:18) Yes, bambae God i no letem ol man oli spolem wol fulwan. Be bambae hem i “spolem ol man ya we oli stap spolem wol.”—Revelesen 11:18.

2. ?HEM I WAN DISASTA OLSEM OL NARAFALA DISASTA?

Samtaem ol man blong nius oli yusum tok ya “Amagedon” taem oli tokbaot ol bigfala disasta. Long yia 2010, wan ripot i tokbaot “‘Amagedon’ long Haiti.” Ripot ya i stap tokbaot taem graon i seksek bigwan long Haiti mo i spolem plante samting, plante man oli harem nogud, mo plante man oli ded. Ol man blong nius mo ol man blong wokem ol muvi, oli yusum tok ya taem oli tokbaot ol samting we i hapen finis mo ol samting we oli fraet se bambae i hapen. Oli yusum tok ya “Amagedon” blong tokbaot bigfala trabol we bambae i kasem wol sipos wan bigfala ston long skae i foldaon, i kilim wol.

Tingting ya i soemaot se: Amagedon i wan trabol we i kilim i ded ol gudfala man wetem ol man nogud. I no gat samting we yu save mekem blong stap sef long taem ya.

Baebol i tijim se: Amagedon i no wan trabol we i spolem eniman nomo. Defren olgeta, long taem blong Amagedon, bambae ol rabis man nomo oli ded. Baebol i promes se bambae i no longtaem, “ol man nogud oli lus. Bambae yu save lukaot olgeta, be bambae yu no save faenem olgeta.”—Ol Sam 37:10.

3. ?GOD BAMBAE I SPOLEM WOL LONG AMAGEDON?

Plante man we oli stap go long jos oli bilif se bambae i gat wan bigfala faet, we ol gudfala man oli faet agensem ol nogud man. Nao wol we yumi stap long hem bambae i lus. Wan stadi we Princeton Survey Research Associates i mekem long Yunaeted Stet, i faenemaot se 40 pesen blong ol man we oli askem kwestin long olgeta, oli ting se wol bambae i lus long “wan bigfala faet long Amagedon.”

Tingting ya i soemaot se: God i no mekem ol man blong oli stap long wol blong olwe. Mo hem i no mekem wol blong i stap olwe. Tingting blong God taem hem i mekem ol man, hemia se wan dei bambae olgeta man oli ded.

Baebol i tijim se: God i “putum wol ya i stap strong long fandesen blong hem, we bambae hem i no save muf nating.” (Ol Sam 104:5) Baebol i tokbaot ol man we oli stap long wol, i se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29.

I klia se plante tingting we ol man oli gat i no folem wanem we Baebol i talem long saed blong Amagedon. Ale, ?wanem trutok long saed blong Amagedon?

[Futnot]