?Wanem Tingting Blong Jisas?
Plante man we oli bilif long God oli ting se i stret we ol skul oli joen long politik. Tingting blong olgeta se ol skul oli save givhan long ol gavman blong winim ol trabol. Be sam narafala oli ting se skul mo politik tufala i no save wok wanples. ?Wanem tingting blong yu? ?Yu ting se i stret blong tufala i joen? Skul mo politik i gat bigfala paoa long ol man.
OL MAN oli talem se Jisas i “gat moa paoa long laef blong ol man, i bitim ol narafala man we oli wosipim God.” Yu tingbaot sipos yumi askem long Jisas se, ?I stret blong ol skul oli joen long politik? ?Yu ting se bambae hem i ansa olsem wanem? Taem Jisas i stap long wol, ol tok mo ol fasin blong hem oli soemaot tingting blong hem long kwestin ya. Long ol tok we Jisas i talem antap long hil, hem i givhan long ol man blong hem blong oli save wanem i stret mo wanem i no stret, taem oli joen wetem ol narafala. I gud yumi tokbaot sam samting we Jisas i talem.
Oli Mekem i Gud Long Narafala
Jisas i tokbaot fasin we ol man blong hem oli mas mekem long ol man. Hem i talem long olgeta se: “Yufala i olsem sol long ol man long wol. Be sipos sol i no moa konkon, bambae i no moa gat samting blong mekem i konkon bakegen. Sol ya i no moa gud blong wan samting, i blong sakem nomo, blong ol man oli purumbut nomo long hem. Yufala i olsem laet long ol man long wol. . . . Laef blong yufala i olsem laet, mo yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao, bambae olgeta oli save leftemap nem blong Papa blong yufala, we i stap long heven.” (Matiu 5:13-16) ?From wanem Jisas i talem se ol man blong hem oli olsem sol mo laet?
Jisas i talem se ol man blong hem oli olsem sol long olgeta man. Mo hem i talem se oli olsem laet long olgeta man we oli wantem save God. Ol tok blong Jisas i soemaot se hem i no wantem we ol man blong hem oli stap olgeta nomo. ?From wanem?
From we sipos ol Kristin oli no joen wetem ol narafala man, oli no save mekem i gud long ol narafala. Yu traem tingbaot sol. Sol i save mekem kakae i stap gud longtaem. Sipos yumi no putum sol long kakae, bambae sol i no save mekem wok blong hem. I sem mak long wan laet. Sipos laet i no stap long ples we i tudak, hem i no save saenaot. Taswe, Jisas i no talem se ol man blong hem oli mas stap olgeta nomo, longwe long ol narafala man. Mo hem i no talem se oli mas stap wetem ol man blong skul nomo, be oli mas joen wetem ol narafala man.
“Oli No Man Blong Wol Ya”
Ol tok blong Jisas i mekem yumi tingbaot sipos i stret blong ol Kristin oli joen long politik. Bifo we Jisas i ded, hem i prea from ol man blong hem, i talem se: “Mi mi no askem long yu blong yu tekemaot olgeta long wol ya. Mi wantem blong yu blokem man nogud ya Setan, blong i no kam spolem olgeta, yu holem olgeta oli stap gud oli sef. Mi mi no man blong wol ya, mo long sem fasin, olgeta tu oli no man blong wol ya.” (Jon 17:15, 16) I tru se ol Kristin oli mas joen wetem ol narafala man, be oli no mas man blong wol ya. ?Oli save mekem samting ya olsem wanem? Hemia wan impoten kwestin we yumi mas save ansa blong hem. Be fastaem, i gud yumi tokbaot tufala kwestin ya:
• ?Jisas i joen long politik?
• ?I stret blong ol Kristin oli joen long politik?