Yumi Mas Tinghae Long Ol Fasin Blong Jehova

1. (1) ?Wanem fasin blong Jehova we maet yu tingbaot? (2) ?Taem yumi stadi long ol fasin blong Jehova, samting ya i givhan long yumi olsem wanem?

?TAEM yu stap tingbaot ol fasin blong Jehova, wanem fasin blong hem we yu yu tingbaot moa? Maet yu tingbaot se Jehova i gat lav, i kaen, i gat paoa mo i waes. Yes, yumi save se Jehova i gat plante gudfala fasin. Sipos yumi mekem wan lis blong ol fasin blong Jehova, bambae yumi luk se ol magasin blong yumi oli tokbaot moa long 40 defren fasin blong hem. Mo sipos yumi stadi long ol fasin ya wanwan long prapa stadi blong yumi, no long famle wosip, bambae yumi sapraes long ol samting we yumi lanem long saed blong Jehova. ?Ol stadi olsem oli givhan long yumi olsem wanem? Oli mekem se yumi tinghae moa long Papa blong yumi long heven. Ale, taem yumi tinghae long hem, bambae yumi wantem tumas blong kam klosap long hem, mo folem fasin blong hem.—Jos. 23:8; Sam 73:28.

2. (1) Yu eksplenem olsem wanem yumi save tinghae moa long ol fasin blong Jehova. (2) ?Bambae yumi tokbaot wanem long stadi ya mo long tufala stadi we i kam biaen?

² ?Be yumi save mekem wanem blong yumi “tinghae” long wan samting? Yumi mas luksave se samting ya i impoten tumas. Fasin blong yumi blong tinghae long samting ya, i kamaot sloslo. Yu traem tingbaot se yu wantem traem wan kakae we yu neva testem bifo. Fastaem yu lukluk mo yu smelem, blong save ol samting we oli yusum blong mekem kakae ya. Afta yu testem, ating yu luk se i gud tumas. Nao biaen bambae yu nomo yu kukum kakae ya. Long sem fasin, sipos yumi wantem tinghae moa long wan fasin blong Jehova, fastaem yumi mas kasem save long fasin ya. Afta yumi tingting dip long hem blong luk olsem wanem Jehova i soemaot fasin ya, mo biaen, yumi folem fasin ya long laef blong yumi. (Efes. 5:1) Taswe long stadi ya mo long tufala stadi we i kam biaen, bambae yumi tokbaot sam long ol fasin blong Jehova. Long ol stadi ya wanwan, bambae yumi faenemaot ansa blong trifala kwestin ya se: ?Man we i gat fasin ya, hem i olsem wanem? ?Jehova i soemaot fasin ya olsem wanem? ?Yumi save folem fasin ya blong Jehova olsem wanem?

JEHOVA I WAN GOD WE OL MAN OLI NO FRAET BLONG KAM LONG HEM

3, 4. (1) ?Wan man we narafala i no fraet blong kam long hem, hem i olsem wanem? (2) ?Jehova i soemaot olsem wanem se hem i wan God we man i no fraet blong kam long hem?

³ Fastaem, bambae yumi tokbaot fasin ya blong Jehova, hemia se ol man oli no fraet blong kam long hem. ?Wan man we narafala i no fraet blong kam long hem, hem i olsem wanem? Hem i wan man we i kaen, i rere blong lesin, mo ol man oli no fraet blong toktok long hem. Plante taem, yu save luksave man olsem, taem yu lesin long wanem we hem i talem, yu lukluk fes blong hem mo fasin blong hem, nating se hem i no toktok.

⁴ ?Jehova i soemaot olsem wanem se hem i wan God we ol man oli no fraet blong kam long hem? Nating se Jehova i wokem olgeta samting long heven mo long wol, be hem i wantem tumas blong lesin long prea blong yumi. Mo hem i stap ansa long ol prea blong yumi. (Ridim Ol Sam 145:18; Aesea 30:18, 19.) Yumi save toktok long Jehova, long eniples mo enitaem, olsem we yumi wantem. Hem i no save tok nogud long man we i askem samting long hem. (Sam 65:2; Jem. 1:5) Baebol i tokbaot Jehova long wan fasin we i mekem se yumi wantem kam klosap long hem. Deved i talem se: “Hae God i stap lukluk” yumi mo ‘raethan blong hem i stap holem’ yumi, nao yumi stap gud. (Sam 34:15; 63:8) Profet Aesea i talem se Jehova i olsem wan man blong lukaot long sipsip. Hem i talem se Jehova “i stap holem ol pikinini blong sipsip, i stap karem olgeta i kam wanples.” (Aes. 40:11) !Yu traem tingbaot! Jehova i wantem se yumi kam klosap long hem, olsem wan smol sipsip we man blong lukaot long sipsip i stap karem hem. !Yes, fasin ya blong Jehova i mekem se yumi lavem hem moa! ?Yumi save folem fasin ya blong Jehova olsem wanem?

OL ELDA OLI MAS GAT FASIN YA

5. ?From wanem i impoten we ol elda oli glad taem narafala i wantem toktok wetem olgeta?

⁵ I no longtaem i pas, oli askem long ol brata mo sista we oli blong ol defdefren ples, blong oli ansa long kwestin ya se: “?Wanem fasin blong wan elda, we yu yu tinghae moa long hem?” Bighaf blong olgeta oli talem se oli laekem ol elda we oli “glad taem man i wantem kam toktok wetem olgeta.” I tru se yumi evriwan i mas traehad blong wokem gudfala fasin ya. Be i impoten tumas we ol elda oli gat fasin ya. (Aes. 32:1, 2) Wan sista i talem from wanem i impoten we ol elda tu oli gat fasin ya. Hem i talem se: “Sipos wan elda i glad taem yumi wantem toktok long hem, bambae ol narafala fasin blong hem tu oli save givhan long yumi.” ?Yu yu luksave from wanem i impoten we ol elda oli gat fasin ya? ?Be wanem i save mekem se ol narafala oli no fraet blong kam toktok long yu?

6. ?Wanem i save givhan long yumi blong narafala i no fraet blong kam toktok long yumi?

⁶ Wan samting we i save givhan long yumi blong narafala i no fraet blong kam toktok long yumi, hemia se yumi mas soemaot se yumi tingbaot ol narafala. Sipos wan elda i tingbaot ol narafala, mo hem i glad blong givhan long olgeta, bambae ol brata mo sista, mo ol yangfala oli haremsave se hem i kaen long olgeta. (Mak 10:13-16) Carlos we i gat 12 yia i talem se: “Mi luk ol elda long Haos Kingdom, oli smael mo oli kaen. Mi laekem fasin blong olgeta.” I tru, i no naf we wan elda i talem nomo se hem i glad we narafala i wantem toktok long hem. Be hem tu i mas soemaot se hem i glad long olgeta. (1 Jon 3:18) ?Hem i save mekem samting ya olsem wanem?

7. Yu tokbaot olsem wanem baj blong asembli i save pulum ol man blong oli wantem storian. ?Yumi lanem wanem long stori ya?

⁷ Yu traem tingbaot samting ya. I no longtaem i pas, afta long wan asembli blong tri dei, wan brata i tekem plen blong gobak long ples blong hem, mo hem i werem yet baj blong hem blong asembli. Woman we i wok long plen i luk tok we i stap long baj ya se: “!Kingdom Blong God Bambae i Kam!” Ale, hem i talem long brata ya se: “Yes, i gud i kam. Yumi mas storian moa long samting ya.” Biaen, tufala i storian gud, mo woman ya i glad blong tekem ol magasin. Plante long yumi oli gat sam stori olsem. ?From wanem ol baj we yumi werem long asembli, oli givhan long yumi blong statem wan storian long Baebol? Hemia from we, taem man i luk baj ya, hem i no fraet blong kam toktok long yumi. I olsem we baj ya i stap talem long ol man se: “Yufala i no fraet blong kam toktok wetem mi. Yu kam askem long mi se mi mi stap go wea.” Baj ya i olsem wan saen blong mekem ol man oli save se yumi wantem talemaot bilif blong yumi long olgeta. Long sem fasin, ol elda oli mas mekem sam samting we i olsem wan saen blong talem long ol brata mo sista se: “Yufala i no fraet blong kam toktok wetem mi.” ?Wanem sam long ol saen ya?

8. ?Wanem sam samting we ol elda oli mekem we i soemaot se oli tingbaot ol narafala, mo hemia i mekem wanem long kongregesen?

⁸ Yumi wanwan i kamaot long ol defdefren aelan mo kantri. Be taem yumi smael long ol brata mo sista, yumi sekhan long olgeta, yumi talem sam gudfala toktok long olgeta, yumi soemaot long olgeta se yumi tingbaot olgeta. ?Hu i mas faswan blong mekem olsem? Yu traem tingbaot eksampol we Jisas i soemaot. Matiu i tokbaot wan miting we Jisas i mekem wetem ol disaepol blong hem. Hem i talem se: ‘Jisas i kam klosap long olgeta’ mo i toktok long olgeta. (Mat. 28:18) Long sem fasin, ol elda oli faswan blong kam klosap long ol brata mo sista mo oli toktok wetem olgeta. ?Samting ya i save mekem wanem long kongregesen? Wan sista we i paenia mo i gat 88 yia, i talem se: “Taem mi go long Haos Kingdom, ol elda oli smael long mi mo oli talem ol gudfala toktok long mi. Samting ya i mekem mi mi tinghae moa long olgeta.” Wan narafala sista i talem se: “Taem wan elda i mekem smol samting ya nomo blong smael long mi, mi mi harem se hemia wan bigfala samting tumas.”

YUMI MAS TOKTOK WETEM OL BRATA MO SISTA

9, 10. (1) ?Jehova i soemaot wanem eksampol? (2) ?Ol elda oli save folem fasin blong Jehova olsem wanem?

⁹ Blong talem stret, sipos yumi wantem se ol narafala oli no fraet blong kam toktok wetem yumi, yumi mas toktok wetem olgeta. Jehova i soemaot wan gudfala eksampol long saed ya. Baebol i talem se: “God ya i no stap longwe long yumi nating.” (Wok 17:27) Ol elda oli soemaot se oli rere blong givhan long narafala, taem oli tekem smoltaem, bifo mo afta long miting blong storian wetem ol yangfala mo ol olfala brata mo sista. Wan brata we i paenia i talem se: “Taem wan elda i askem long mi se mi olsem wanem, mo biaen hem i lesin long ansa blong mi, hemia i mekem mi mi harem se hem i tinghae long mi.” Wan sista we i mekem wok blong Jehova blong klosap 50 yia i talem se: “Taem ol elda oli toktok wetem mi afta long miting, hemia i mekem mi mi harem se mi impoten.”

¹⁰ I tru, ol elda oli gat plante wok blong mekem. Be long ol miting, oli mas tingbaot se oli mas spenem taem blong toktok wetem ol brata mo sista.

JEHOVA I MEKEM I SEM MAK LONG OLGETA MAN

11, 12. (1) ?Wan man we i mekem i sem mak long olgeta man, hem i olsem wanem? (2) ?Jehova i soemaot olsem wanem se hem i mekem i sem mak long olgeta man?

¹¹ Wan narafala gudfala fasin blong Jehova hemia se hem i mekem i sem mak long olgeta man. (Wok 10:34) ?Wan man we i gat fasin ya, hem i olsem wanem? Hem i mekem i stret long evri man. Taswe sipos yumi wantem mekem i sem mak long ol narafala, fastaem yumi mas tingbaot blong mekem i sem mak long evri man. Man we i gat fasin ya, hem i no mekem i gud nomo long man we i naes mo i gat mane. Defren olgeta, hem i mekem i sem mak mo i mekem i gud long enikaen man.

¹² Jehova i soemaot nambawan eksampol long fasin ya. Baebol i talem se hem i “mekem i sem mak long olgeta man” mo taem hem i stap “jajem man, hem i no wok wan saed.” (Ridim Ol Wok 10:34, 35; Dutronome 10:17.) Bambae yumi luk wan samting we i hapen long taem blong Moses, we i soemaot samting ya.

13, 14. (1) ?Ol gel blong Jelofehad, oli kasem wanem trabol? (2) ?Jehova i mekem wanem blong soemaot se hem i mekem i sem mak long olgeta man?

¹³ Bifo we ol man Isrel oli go insaed long graon ya we God i promes blong givim long olgeta, ol faef gel blong man ya Jelofehad, oli gat wan trabol. ?Wanem trabol ya? Papa blong olgeta i ded finis, mo oli save se famle blong olgeta tu i mas kasem graon we i blong papa blong olgeta, olsem ol narafala famle long Isrel. (Nam. 26:52-55) Folem kastom blong ol man Isrel, graon blong Jelofehad i mas go long pikinini boe blong hem. Be Jelofehad i no gat pikinini boe, hem i gat ol gel nomo. (Nam. 26:33) ?Olsem wanem nao? ?Bambae oli givim graon ya i go long ol narafala famle blong Jelofehad? ?Bambae oli lego ol gel ya olsem nomo we oli no gat wan pis graon?

¹⁴ Ol faef gel ya oli kam luk Moses mo oli askem long hem se: ‘?Papa blong mifala i no gat pikinini boe blong hem, be from wanem nem blong hem bambae i mas lus?’ Oli talem strong se: “Mifala i wantem se taem yufala i givim graon long ol famle blong papa blong mifala, bambae yufala i makemaot haf i blong mifala.” ?Olsem wanem? ?Yu ting se Moses i talem long olgeta se, samting we oli askem i agensem loa? Nogat. Moses i “talemaot tingting ya blong olgeta long [Jehova].” (Nam. 27:2-5) ?Wanem ansa blong Jehova? Hem i talem long Moses se: “Samting ya we olgeta oli askem i stret ya. Sipos yufala i givim graon long ol famle blong papa blong olgeta, bambae yufala i mas makemaot haf i blong olgeta. Graon we i blong go long olfala blong olgeta, bambae i mas go long olgeta.” Jehova i no talem hemia nomo, be hem i mekem tok blong hem i kam wan loa, mo i talem long Moses se: “Sipos man i ded we i no gat pikinini boe blong hem, graon blong hem bambae i mas go long ol dota blong hem.” (Nam. 27:6-8; Jos. 17:1-6) Stat long taem ya, evri woman we oli fesem wan problem olsem, oli stap gud nomo.

15. (1) ?Jehova i soemaot wanem fasin long ol man blong hem, antap moa olgeta we oli kasem trabol? (2) ?Wanem sam narafala stori we i soemaot se Jehova i mekem i sem mak long olgeta man?

¹⁵ Fasin ya we Jehova i mekem, i soemaot se hem i kaen mo hem i mekem i sem mak long olgeta man. !Hemia i nambawan tumas! I isi nomo blong man i spolem ol gel ya. Be samting we Jehova i mekem i soemaot se hem i tinghae long olgeta, olsem we hem i mekem long ol narafala man Isrel. (Sam 68:5) Hemia wan long ol stori blong Baebol we i soemaot nambawan trutok ya se: Jehova i mekem i sem mak long olgeta man blong hem.—1 Saml. 16:1-13; Wok 10:30-35, 44-48.

YUMI SAVE FOLEM FASIN BLONG JEHOVA

16. ?Yumi save mekem wanem blong yumi gat fasin ya blong mekem i sem mak long olgeta man?

¹⁶ ?Yumi save folem fasin blong Jehova olsem wanem? Yumi mas tingbaot se sipos yumi wantem mekem i sem mak long ol narafala, fastaem yumi mas tingbaot blong mekem i sem mak long evri man. Maet yumi wanwan i ting se yumi gat fasin ya. Be ating, yu agri se i no isi blong soemaot ol fasin ya. Taswe, ?yumi save mekem wanem blong faenemaot sipos yumi gat ol fasin ya? I gud yumi mekem olsem Jisas. Taem hem i wantem save se ol man oli tingbaot hem olsem wanem, hem i askem long ol gudfala fren blong hem se: “?Ol man oli stap tokbaot mi, mi Pikinini blong Man, se mi hu?” (Mat. 16:13, 14) Yumi save mekem sem mak. Yumi save askem long wan gudfala fren blong yumi se, “?Ol man oli tingbaot mi se mi gat wanem fasin?” Ale, sipos hem i talem long yumi se yumi no mekem i gud long ol man from kala blong skin blong olgeta, from kantri blong olgeta, from kastom blong olgeta, ?bambae yumi mekem wanem? Long taem olsem, i gud yumi wanwan i prea long Jehova, yumi talemaot long hem olgeta samting we oli stap long hat blong yumi. Mo yumi plis long hem blong i givhan long yumi, blong yumi jenisim fasin blong yumi. Olsem nao, yumi save folem fasin ya blong hem, blong mekem i sem mak long olgeta man.—Mat. 7:7; Kol. 3:10, 11.

17. ?Long wanem rod, yumi save soemaot se yumi mekem i sem mak long olgeta man?

¹⁷ Long kongregesen, yumi mas mekem i gud long ol brata mo sista blong yumi. Yumi mas tinghae long olgeta mo yumi lavem olgeta. Olsem nao, yumi soemaot se yumi wantem folem fasin blong Jehova blong mekem i sem mak long olgeta man. Ale, taem yumi wantem singaot ol Kristin i kam long haos blong yumi, i gud yumi singaot ol defdefren brata mo sista, olgeta we oli rij, oli pua, oli gat defdefren kaen laef, oli no gat papa mo mama, no oli wido. (Ridim Galesia 2:10; Jemes 1:27.) Long wok blong prij tu, yumi talemaot gud nius blong Kingdom long enikaen man, nating se oli blong narafala kantri. Yumi glad tumas we yumi save gat ol buk we oli tokbaot Baebol long samwe 600 lanwis. !Hemia wan pruf we i soemaot se Jehova i mekem i sem mak long olgeta man!

18. ?Yumi save mekem wanem blong soemaot se yumi tinghae long tufala fasin ya blong Jehova?

¹⁸ Yes, bambae yumi tinghae moa long Jehova, sipos yumi tekem taem blong tingbaot tufala fasin ya blong hem. Wan hemia se man i no fraet blong toktok long hem, mo narawan se hem i mekem i sem mak long olgeta man. Ale, taem yumi tinghae long ol gudfala fasin blong Jehova, bambae yumi wantem moa blong soemaot ol fasin ya long ol brata mo sista blong yumi, mo long ol man we yumi prij long olgeta.