WAJTAOA STADI

Wan God we yumi no save luk hem, i mekem wol ya mo heven we yumi save luk. ?Yu yu bilif strong long samting ya? I no evri man we oli bilif. ?Yumi save mekem wanem blong givhan long ol man blong oli save trutok? Mo yumi we yumi bilif finis, ?yumi save mekem wanem blong bilif blong yumi i stap strong? Stadi ya bambae i ansa long tufala kwestin ya.

Baebol i talem se ol Kristin oli mas wok olsem slef blong Jehova. Stadi ya i tokbaot olsem wanem Loa we God i givim long Moses i givhan long ol slef, mo wanem we yumi mas mekem blong yumi no kam slef blong Setan mo wol blong hem. Mo stadi ya i tokbaot pei we yumi kasem, taem yumi wok olsem slef blong God.

Sipos yumi tingting dip long Tok blong God evri dei, ol prea blong yumi bambae oli dip moa. Fas stadi i soemaot samting ya, long wan gudfala prea we ol Livaet oli mekem. Narafala stadi i soemaot wanem we yumi mas mekem blong folem ol tok long prea blong Jisas. Tugeta prea ya oli soemaot se yumi mas tokbaot fastaem ol samting we oli joen wetem samting we Jehova i wantem, biaen, yumi tokbaot samting we yumi wantem.