STADI LONG WIK BLONG

Stadi ya i pulum yumi blong trastem se Jehova i King oltaem, mo i soemaot olsem wanem Jehova i bos long ol samting we hem i mekem long heven mo long wol. Bambae hem i pulum yumi blong folem eksampol blong ol man bifo we oli jusum blong wosipim Jehova, King ya we i rul blong olwe.

Stadi ya bambae i pulum yumi blong luksave ol samting we Kingdom blong Mesaea i mekem finis long 100 yia we hem i rul. Bambae hem i leftemap tingting blong yumi wanwan blong yumi stap aninit long rul blong Kingdom ya. Mo stadi ya i pulum yumi blong tingting dip long stamba vas blong yia 2014.

?Bambae mi mekem wanem long laef blong mi? Hemia wan impoten kwestin we eniman we i givim laef blong hem long Jehova i mas tingbaot. Fastaem, bambae yumi tokbaot wanem we ol yangfala Kristin oli save jusum, sipos oli wantem mekem wok blong Jehova long fulhat blong olgeta. Biaen, bambae yumi tokbaot sam spesel janis we ol Kristin we oli stap kam olfala, blong oli mekem moa long wok blong Jehova.

Tede, plante man oli no bilif se en i klosap from we oli no luksave mining blong ol samting we oli stap hapen long wol, mo oli tingbaot moa wanem we oli wantem ronem long laef blong olgeta. Mo plante man oli stap ronem ol samting we olgeta nomo oli wantem. Stadi ya bambae i pulum yumi blong tingtingbak long trifala risen we oli pulum ol Kristin, blong oli trastem Kingdom blong God se bambae i no longtaem, hem i finisim ol rabis fasin long wol.