Ol Man Blong Jehova Oli ‘Livim Ol Fasin We i No Stret’

1. ?Wanem samting i impoten moa long wosip blong yumi?

LONG plante ples, nem ya Jehova i stap long ol bigfala haos mo long sam samting we oli stap long ol musium. Sipos yu luk samting ya finis, ating yu yu glad tumas. Yumi ol Witnes blong Jehova, yumi tinghae long nem blong God. Nem ya i impoten long wosip blong yumi. I no gat wan narafala man we i yusum nem ya olsem yumi. Nao from we yumi gat blesing ya blong stap olsem ol Witnes blong Jehova, yumi mas mekem sam samting we bambae i leftemap nem blong hem.

2. ?Sipos yumi wantem se God i glad long yumi, yumi mas mekem wanem?

² Sipos yumi wantem se Jehova i glad long wosip blong yumi, yumi mas mekem sam moa samting i bitim we yumi yusum nem blong hem nomo. Yumi mas folem ol rul blong hem mo yumi no mas laekem nating “ol rabis fasin.” (Sam 34:14) Aposol Pol i makemgud poen ya, taem hem i talem se: “Olgeta man we oli stap talem se oli man blong Hae God, oli mas livim ol fasin ya we i no stret.” (2 Tim. 2:19) ?Be olsem wanem blong “livim ol fasin ya we i no stret”?

YUMI “GOWE” LONG OL RABIS MAN

3, 4. ?Sam man oli faenem i had blong kasem save long wanem tok, mo from wanem?

³ Ridim 2 Timoti 2:19. Long vas ya, Pol i tokbaot “strongfala fandesen blong bilif we God i putum finis.” Long fandesen ya, i gat tu toktok. Faswan se, ‘Jehova i save ol man blong hem.’ Tok ya i kamaot long Namba japta 16:5. (Yu luk fas stadi.) Nambatu se, “Olgeta man we oli stap talem se oli man blong Hae God, oli mas livim ol fasin ya we i no stret.” Sam man oli faenem i had blong kasem save long tok ya. ?From wanem?

⁴ From we i luk olsem se tok ya i kamaot long wan narafala vas long Hibru haf blong Baebol. Be i no gat wan narafala vas we i klosap sem mak long samting we Pol i talem. Taswe, ?Pol i minim wanem taem hem i talem se: “Olgeta man we oli stap talem se oli man blong Hae God, oli mas livim ol fasin ya we i no stret”? Fas toktok blong Pol i kamaot long Namba japta 16, we i tokbaot taem ya we Kora wetem ol man blong hem, oli agensem Moses mo Eron. Taswe maet nambatu toktok i stanap long stori ya tu.

5-7. ?Wanem stori we Pol i tingbaot taem hem i raetem 2 Timoti 2:19? (Yu luk pija long stat blong stadi.)

⁵ Datan mo Abiram tufala i go joen wetem Kora, nao trifala i kam lida blong ol man we oli agensem Moses mo Eron. (Nam. 16:1-5) Olgeta ya oli no obei long Moses, mo oli no gat respek long hem olsem lida blong olgeta we Jehova i jusumaot. Oli kam wan denja long ol man Isrel, from we oli gohed blong stap wetem olgeta. Ale, bifo we Jehova i soemaot se hu i man blong hem, hem i talem klia samting we ol man Isrel oli mas mekem.

⁶ Baebol i talem se: “Nao Hae God i talem long Moses se, ‘Yu talem long olgeta man, se oli mas gowe long ol haos tapolen blong Kora mo blong Datan mo blong Abiram.’ Nao Moses wetem ol lida blong Isrel oli go luk Datan mo Abiram. Nao Moses i talemaot long olgeta man se, ‘Yufala i mas gowe long ol haos tapolen blong ol man nogud ya. Hae God bambae i tekemaot olgeta, wetem ol sin blong olgeta. Yufala i no mas tajem olting blong olgeta. Sipos no, bambae yufala tu i lus wetem olgeta.’ Nao ol man oli gowe long ol haos tapolen blong trifala ya.” (Nam. 16:23-27) Biaen, Jehova i kilim i ded olgeta man we oli agensem hem. Be hem i sevem olgeta we oli obei long hem, from we oli “livim ol fasin ya we i no stret,” mo oli gowe long Kora mo ol man blong hem.

⁷ Jehova i luk samting we i stap long hat blong man. Hem i save gud ol man we oli fren gud wetem hem, mo hem i wantem se ol man blong hem oli no joen wetem ol rabis man. I klia se Pol i stap tingbaot stori long Namba japta 16:5, 23-27, taem hem i raetem se: “Olgeta man we oli stap talem se oli man blong Hae God, oli mas livim ol fasin ya we i no stret.” Hemia i laenap tu wetem tok blong Pol we i se: ‘Jehova i save ol man blong hem.’ —2 Tim. 2:19.

“YUMI LEGO OL KRANGKE RAO”

8. ?Ol Kristin oli mas mekem wanem i bitim we oli joen long wan kongregesen?

⁸ Pol i tokbaot ol samting we oli hapen long taem blong Moses, blong mekem Timoti i tingbaot bakegen se hem i no mas letem eni samting i mekem hem i no moa fren gud wetem Jehova. I tru, ol Kristin oli mas joen long wan kongregesen, be i no hemia nomo. Oli mas sakemaot ol rabis fasin, olsem ol man blong Jehova long taem blong Moses oli mekem. Olgeta ya oli no yusum nem blong Jehova nomo, be oli mekem sam moa samting. ?Samting ya i tijim wanem long Timoti? ?Mo ol Kristin oli save lanem wanem long tok ya blong Pol?

9. ?“Ol krangke rao ya” oli spolem Kristin kongregesen olsem wanem?

⁹ Long leta blong Pol, hem i talem olsem wanem blong lego ol fasin ya we oli no stret. Hem i talem long Timoti se hem i no mas “rao from ol toktok we i blong nating nomo,” mo hem i no mas joen wetem olgeta we oli stap “toktok krangke nomo.” (Ridim 2 Timoti 2:14, 16, 23.) ?Ol tok ya oli minim wanem? Samfala long Kongregesen oli stap tijim ol tijing blong ol man blong apostasi. Sam narafala oli talem sam tingting we i mekem oli raorao from. Sam long ol tingting ya oli no agensem Baebol stret, be oli mekem ol Kristin oli no moa joen gud. Taswe, Pol i talem long Timoti blong hem i “mas stap longwe long ol krangke rao ya we oli blong nating nomo.”

10. ?Yumi mas mekem wanem sipos yumi faenem sam tingting blong ol man blong apostasi?

¹⁰ Tede, yumi no save faenem wan man blong apostasi insaed long Kongregesen. Be nating se i olsem, yumi save faenem ol tingting blong olgeta we oli agensem ol tijing blong Baebol. Yumi mas sakemaot ol tingting ya, nomata weples oli kamaot long hem. I no waes blong yumi toktok wetem ol man ya long Intenet, no taem yumi mitim olgeta, no long narafala rod bakegen. Sipos yumi toktok wetem olgeta, yumi no stap obei long God, nating se maet yumi gat tingting blong givhan long olgeta. God i talem se yumi no mas joen nating wetem olgeta.

11. ?Wanem i save spolem pis long kongregesen? ?Ol elda oli save mekem wanem?

¹¹ I gat sam narafala samting tu we oli save spolem pis long Kongregesen. Maet ol brata mo sista oli gat defdefren tingting long wan pleplei. Samfala oli talem se pleplei ya i gud nomo, be sam narafala oli talem se i nogud. Sipos wan Kristin i wantem se ol narafala oli folem tingting blong hem, samting ya i save mekem oli rao from ol samting we “oli blong nating nomo.” ?Be olsem wanem sipos wan Kristin i agri long wan pleplei we i agensem ol rul blong God? Bambae ol elda oli no save letem fasin olsem i stap, jes from we oli wantem pis. Bambae oli stretem fasin ya. (Sam 11:5; Efes. 5:3-5) Be bambae oli lukaotgud blong no folem prapa tingting blong olgeta. Oli mas folem advaes ya blong Baebol, se: “Yufala i mas lukaot gud long ol man we God i givim long yufala, olsem we man blong lukaot long sipsip i stap lukaot gud long ol sipsip blong hem. . . . Bambae yufala i no kam olsem bigfala masta blong olgeta ya we God i putum olgeta long han blong yufala. Yufala i mas soemaot ol stret fasin . . . blong oli save folem.”—1 Pita 5:2, 3; ridim 2 Korin 1:24.

12, 13. (1) ?Ol Witnes blong Jehova oli jusum ol pleplei olsem wanem, mo wanem ol rul blong Baebol we oli folem? (2) ?Ol rul ya oli save givhan long yumi taem yumi stap jusum wanem?

¹² Ogenaesesen blong Jehova i no stap jekem evri muvi, video gem, buk, mo miusik, blong talem long yumi se weswan nao i stret mo weswan i no stret, nogat. ?From wanem? From we Baebol i talem se yumi wanwan i mas trenem tingting blong yumi, blong yumi save “jusumaot wanem fasin i gud mo wanem fasin i nogud.” (Hib. 5:14) Ol rul blong Baebol oli save givhan long yumi blong yumi mekem ol desisen we oli waes long saed blong pleplei. Taem yumi mekem ol desisen finis, yumi nidim yet blong “traehad blong faenemaot ol fasin we Masta blong yumi i glad long hem.” (Efes. 5:10) Baebol i tijim tu se ol hed blong famle nao, oli save jusum pleplei we famle blong olgeta i save mekem, mo hemia we oli no save mekem.a—1 Kor. 11:3; Efes. 6:1-4.

¹³ Ol rul blong Baebol we yumi jes tokbaot, oli save givhan long yumi blong yumi mekem ol desisen we oli waes. Yumi mas jusum stael blong klos mo hea blong yumi, ol samting long saed blong helt blong yumi, kakae blong yumi, mo sam narafala samting olsem. Samfala oli wantem we ol narafala oli folem tingting blong olgeta, ale samting ya i mekem se oli rao. Be i gud blong tingbaot se, sipos yumi jusum wan samting we i no agensem ol tok blong Baebol, yumi no mas raorao from. Baebol i talem se: “Man blong wok blong Masta blong yumi, hem i no mas man blong faet, hem i mas mekem i gud long olgeta man.”—2 Tim. 2:24.

YUMI NO JOEN WETEM OL RABIS FREN

14. ?Wanem pijatok i soemaot se ol Kristin oli no mas joen wetem ol rabis fren?

¹⁴ Wan narafala rod bakegen we i save givhan long yumi blong “livim ol fasin ya we i no stret,” hemia blong no joen wetem ol rabis fren. I gud yumi luk pijatok we Pol i yusum blong eksplenem samting ya. Afta we hem i tokbaot “strongfala fandesen blong bilif we God i putum,” hem i tokbaot wan “haos blong rijman.” Insaed long haos ya, i gat “plante kaen plet mo besin,” we oli “wokem long gol, no silva, mo sam, oli katem long wud, no oli wokem long graon blong graonpot. Sam, oli blong yusum long lafet, mo sam, oli blong yusum evri dei nomo.” (2 Tim. 2:20, 21) Biaen, Pol i wonem ol Kristin se oli mas “livim,” no oli no mas joen wetem ol man we oli olsem ‘ol plet mo besin we oli blong yusum evri dei nomo.’

15, 16. ?Yumi lanem wanem long pijatok blong “haos blong rijman”?

¹⁵ ?Wanem mining blong pijatok blong Pol? Hem i talem se Kristin kongregesen i olsem “haos blong rijman,” mo ol wanwan brata mo sista oli olsem “plet mo besin.” Yu traem tingbaot. Long wan haos, i gat sam samting blong kuk we oli save givim sik, maet from we oli doti no oli no wasem gud. Ale man blong haos bambae i no miksimap olgeta wetem ol narafala samting we oli gud mo oli klin.

¹⁶ Hemia i sem mak long yumi tede. Sipos yumi wantem se evri haf blong laef blong yumi i klin, yumi mas stap longwe long olgeta we oli stap brekem ol rul blong Jehova oltaem. (Ridim 1 Korin 15:33.) Mo sipos yumi mas lukaotgud long ol rabis fren insaed long kongregesen, yumi mas lukaotgud moa blong no fren nating wetem ol man afsaed long kongregesen tu. Hemia from we plante long olgeta oli ‘wantem mane tumas, oli no save ona long papa mo mama, oli no save tingbaot God, oli man blong lusum hed, oli wael olgeta, oli no wantem ol fasin we i gud, oli agens long hem, oli spolem ol fren blong olgeta, mo oli wantem tumas ol samting we oli stap harem gud long hem, i winim we oli lavem God.’—2 Tim. 3:1-5.

YUMI MEKEM DESISEN KWIKTAEM

17. ?Ol man Isrel oli mekem wanem blong soemaot se oli ‘livim ol fasin we i no stret’?

¹⁷ Taem Jehova i talem long ol man Isrel se oli mas “gowe long ol haos tapolen blong Kora, Datan mo blong Abiram,” kwiktaem nomo oli “gowe.” (Nam. 16:24, 27) Oli no gat tu tingting, be oli mekem desisen kwiktaem. Oli ‘muvaot long ol haos tapolen blong ol man nogud ya, mo oli go stanap longwe long olgeta.’ Oli wantem tumas blong obei long ol tok we oli harem. Oli soemaot klia se oli sapotem Jehova mo oli agensem ol fasin we i no stret. ?Yumi lanem wanem long stori ya?

18. ?Pol i minim wanem taem hem i talem long Timoti blong i “ronwe long ol krangke fasin blong ol yangfala”?

¹⁸ Yumi glad tumas we yumi fren gud wetem Jehova. Yumi mas mekem desisen kwiktaem blong no letem wan samting i mekem yumi no moa fren gud wetem Jehova. Hemia nao samting we Pol i tingbaot taem hem i talem long Timoti se hem i mas “ronwe long ol krangke fasin blong ol yangfala.” (2 Tim. 2:22) Long taem ya, Timoti i gat bitim 30 yia blong hem. Be ol bigman tu oli save gat “ol krangke fasin blong ol yangfala.” Taswe, sipos Timoti i luk se hem i stap gat ol krangke fasin ya, hem i mas “ronwe” kwiktaem. Hem i mas “livim ol fasin ya we i no stret.” Jisas i tokbaot wan samting we i sem mak, i se: “Sipos ae blong yu i mekem yu yu foldaon, i gud yu tekemaot, yu sakem.” (Mat. 18:9) Ol Kristin we oli wantem obei long tok ya mo oli wantem fren gud wetem Jehova, oli no mas fraet mo oli mas mekem desisen kwiktaem.

19. ?Sam Kristin oli mekem wanem blong oli fren gud oltaem wetem Jehova?

¹⁹ ?Sam Kristin oli mekem wanem blong oli stap fren gud wetem Jehova? Samfala we oli stap dring bitim mak bifo, oli mekem desisen blong lego strong dring fulwan. Sam narafala oli jusum blong no joen long ol pleplei we i save pulum olgeta blong wantem mekem rabis samting. (Sam 101:3) Yu traem tingbaot wan brata we bifo, hem i laekem tumas blong danis long ol doti lafet, we i gat plante nogud fasin blong man mo woman. Be taem hem i save trutok, hem i mekem desisen se bambae hem i no moa danis, nating se long wan lafet we ol Witnes oli mekem, from we hem i no wantem tingbaot bakegen ol rabis samting we hem i mekem bifo. I tru se hemia i no min se ol Kristin oli no mas danis, no oli no mas tekem strong dring, no oli no mas mekem sam narafala samting olsem. Be, yumi evriwan i mas lukaotgud mo no letem eni samting i spolem fasin blong yumi blong fren gud wetem Jehova.

20. Nating se i no isi blong “livim ol fasin ya we i no stret,” ?be yumi harem gud from wanem?

²⁰ !Yes, hem i wan bigfala blesing blong stap olsem wan Witnes blong Jehova! Be yumi mas mekem sam samting i bitim we yumi yusum nem ya mo yumi joen long wan kongregesen. Yumi mas “livim ol fasin ya we i no stret” mo yumi “no moa mekem ol rabis fasin.” (Sam 34:14) I no isi blong mekem samting ya. Be yumi harem gud from we yumi save se oltaem Jehova bambae i lavem olgeta we oli “ol man blong hem,” mo oli obei long hem.—2 Tim. 2:19; ridim 2 Kronikel 16:9a.